ဘူကစ်ဂျာလီသို့ သွားရာလမ်း (၁)

ကျွန်တော်တို့ရဲ့ခရီးကို နိုဝင်ဘာ ၂၂ ည မြန်မာစံတော်ချိန် ၇နာရီမှာစတင်ထွက်ခွာခဲ့ပြီး မလေးရှားစံတော်ချိန် ည ၁၁း၃၀မှာ ကွာလာလမ်ပူလေဆိပ်ကို ရောက်ရှိခဲ့ကြပါတယ်။ လေဆိပ်မှာ လူဝင်မှုကြီးကြပ်ရေးကို ဖြတ်တော့ ကိုယ့် ပတ်စ်ပို့ကိုကြည့်ပြီး မလေးရှားအရာရှိက အထင်သေးတဲ့ပုံစံနဲ့ စစ်လားဆေးလားတွေလုပ်ပါတော့တယ်။

နံနက် ၁နာရီကျော်နေပြီဖြစ်ပေမယ့် ပတ်ဝန်းကျင်ကို လေ့လာချင်တာရော ထမင်းမစားရသေးတာကြောင့်ပါ အားလုံးမအိပ်သေးပဲ ထမင်းစားဖို့ ဆိုင်ကို လိုက်ရှာခဲ့ကြပါတယ်။ ဆရီပတ်တလင်းက ဘူကစ်ဂျာလီအားကစားကွင်းနဲ့ အားကစားရုံတွေအနားမှာပဲ ရှိပြီး မြို့သစ်လိုပုံစံမျိုးပါ။

 

ကွန်ဒိုတွေနဲ့ လူနေတိုက်ခန်းတွေနည်းပါးပြီး စားသောက်ဆိုင်နဲ့ ဟိုတယ်တွေ ဘဏ်တွေ၊ ဈေးရုံတွေအများစုရှိပါတယ်။ ည ၂နာရီဝန်းကျင်လောက်မှာ ပတ်ဝန်းကျင်ကို လှည့်ပတ်ကြည့်တဲ့အခါမှာတော့ ထူးခြားတာက လူတွေကားတွေစည်ကားလွန်းနေတာပါပဲ။

ကျွန်တော်တို့အဖွဲ့က မြန်မာတွေဆိုတော့ ထမင်းကိုပဲတောင့်တပြီး ထမင်းစားလို့ရမယ့်နေရာလိုက်ရှာပေမယ့် ဆိုင်အများစုက ခေါက်ဆွဲပဲရောင်းတာတွေ့ရပါတယ်။ ဆိုင်တွေနဲ့လူတွေအားလုံးနီးပါးဟာ တရုတ်လူမျိုးတွေ ဖြစ်တာကြောင့် တရုတ်နိုင်ငံအသေးစားကလေးကို ရောက်သွားသလိုပါပဲ။ ဒါနဲ့ပဲလူရှင်းပြီး အေးဆေးတိတ်ဆိတ်တဲ့ ဆိုင်တစ်ဆိုင်ကို ရွေးထိုင်လိုက်ကြပါတယ်။

ခေါက်ဆွဲဆိုင်မှာ ခေါက်ဆွဲမှာတော့ နှစ်ဖက်စလုံး မတောက်တခေါက် အင်္ဂလိပ်စကားတွေနဲ့တိုင်ပတ်နေချိန်မှာ မထင်မှတ်ပဲ ဆိုင်ရှင် တရုတ်က မြန်မာလားဆိုပြီး မြန်မာလိုပြောချလိုက်တာ လန့်တောင်သွားရပါတယ်။ နောက်တစ်ဆိုင်ကို သွားတော့လည်း တရုတ်တစ်ယောက်က ရုပ်ကြည့်ပြီး မြန်မာလိုပြောပြန်ပါတယ်။

မလေးနဲ့ပွဲမှာ တည်ငြိမ်မှုရှိဖို့နဲ့ ခြောက်ခြားမှု မဖြစ်ဖို့ ဦးဇော်ဇော်တိုက်တွန်း 

ရေသောက်ချင်လိုရေမှာတော့လည်း အသားညိုညစ်ညစ်နဲ့ လူကောင်တောင့်တောင့် စားပွဲထိုးတစ်ယောက် ပြောတဲ့စကားကို နားမလည်လို့ ပြန်ပေးကြည့်တော့ သူကလည်း မြန်မာဖြစ်နေပြန် ပါရော။ မလေးရှားကိုရောက်တဲ့ နာရီပိုင်းအတွင်းမှာပဲ ကျွန်တော်တို့အဖွဲ့ဟာ မြန်မာစကားကိုပဲ အသုံးချပြီး ညစာကိုဖြေရှင်းနိုင်ခဲ့ကြပါတယ်။

ရေသန့်ဘူးလာပေးတဲ့ မြန်မာစားပွဲထိုးကလေးက ကျွန်တော်တို့ကို ဘောလုံးပွဲလာကြည့်တာလားဆိုပြီးမေးပြီး ဘောလုံးကွင်းကို လမ်းလျှောက်သွားလို့ရတဲ့လမ်းကိုပါ သူပဲ ညွှန်ပြပေးခဲ့ပါတယ်။ သူ့ကို ဘောလုံးပွဲလာကြည့်မှာလားမေးတော့ မအားပါဘူးလို့ ပြန်ဖြေရှာပါတယ်။ တဆက်တည်းပဲ ကောင်လေးက ဘယ်အသင်းနဲ့ဘယ်အသင်းကန်မှာလဲ ပြန်မေးတော့ ကျွန်တော်တို့မှာ ရယ်ရမလို၊ ငိုရမလိုဖြစ်ခဲ့ရပါတယ်။

မလေးရှားကို မြန်မာတွေဘောလုံးပွဲလာကြည့်တာ ဘယ်အသင်းနဲဘယ်အသင်းကန်မလဲမေးစရာလိုလို့လားပေါ့။ ဒါပေမယ့် ပြန်စဉ်းစားတော့ နေ့ရောညပါဖွင့်တဲ့ဆိုင်မှာ စားပွဲထိုးနေရတဲ့သူ့အတွက်ကတော့ ဘယ်သိနိုင်မလဲဆိုပြီး စိတ်မကောင်းဖြစ်ခဲ့ရပါတယ်။

ညစာစားပြီးချိန်မှာ အချိန်က နံနက် ၃နာရီကျော်နေပြီဆိုတော့ ကျွန်တော်တို့လည်း မနက်လုပ်စရာတွေကို တိုင်ပင်ပြီး ဟိုတယ်ပြန်ခဲ့ကြပါတယ်။ မနက်ဖြန်နေ့လည် ၁၁း၃၀မှာတော့ မလေးရှား-မြန်မာပွဲကြိုသတင်းစာ ရှင်းလင်းပွဲရှိပြီး Duwun Sports ပရိသတ်တွေအတွက် ဗီဒီယိုနဲ့သတင်းတွေ တင်ပေးဖို့ ကြိုးစားကြရဦးမှာပါ။

ပြီးရင်တော့ မြန်မာအသင်းတည်းခိုတဲ့ဟိုတယ်ကိုသွားမယ်၊ ညနေပိုင်းမှာ မြန်မာအသင်းလေ့ကျင့်မယ့် ဘူကစ်ဂျာလီကွင်းကို ရိုက်ကူးရေးတွေလုပ်ဖို့ ခရီးဆက်ပါမယ်။ စီစဉ်ထားတဲ့အတိုင်းအားလုံးအဆင်ပြေရင်တော့ ကျွန်တော်တို့ မြန်မာကစားသမားတွေရဲ့ပုံရိပ်နဲ့ လေ့ကျင့်မှုတွေကို Duwun Sports ပရိတ်တွေခံစားကြည့်ရှုနိုင်အောင် Live တင်ပေးဖို့ရှိလို့ စောင့်မျှော်အားပေးကြပါဦး..။

မနက်ဖြန်အတွေ့အကြုံတွေကိုလည်း ဘူကစ်ဂျာလီသို့သွားရာလမ်း(၂) အနေနဲ့ ဆက်လက်ဖော်ပြပေးသွားပါမယ်။ ဒီညတော့ ခဏနားပါတော့မယ်။ ဂွတ်နိုက်…. မလေးရှား…..။