ရုရှားနဲ့ ဆက်စပ်တဲ့ ပို့စ်တစ်ခု Share ပြီးနောက် တစ်နာရီခန့်အကြာမှာ Twitter သူဌေးသစ်ဟာ ထူးထူးဆန်းဆန်းအနေအထားနဲ့ သေသွားနိုင်ကြောင်း Tweet တင်ခဲ့ပါတယ်။
Twitter လူမှုကွန်ရက်ကို မကြာသေးခင်ကပဲ ဝယ်ယူခဲ့တဲ့ မတ်စ်ဟာ "အံ့ဩဖွယ် အခြေအနေနဲ့ ကျွန်တော်သေသွားမယ်ဆိုရင် မင်းနဲ့ သိရလို့ ဝမ်းသာပါတယ်" ဆိုပြီး Tweet တင်ခဲ့တာပါ။ ဒီ Tweet မတင်ခင် တစ်နာရီလောက်က သူဟာ ရုရှားဝန်ကြီးချုပ်ဟောင်း ဒီမီထရီ ရိုဂိုဇင်နဲ့ စကားပြောခဲ့တဲ့ ပို့စ်တစ်ခုအကြောင်း Share ထားပါတယ်။ ဒီပို့စ်ထဲမှာ Tesla CEO ဟာ ယူကရိန်းဖက်ဆစ်တပ်ဖွဲ့အတွက် စစ်ဘက်ဆိုင်ရာ ဆက်သွယ်ရေးပစ္စည်းတွေ ထောက်ပံ့မှုမှာ ပါဝင်နေတယ်လို့ ရုရှားမီဒီယာတစ်ခုကို ကိုးကားပြီး ရိုဂိုဇင်ရဲ့ မက်ဆေ့မှာဖော်ပြထားပါတယ်။
"ကျွန်တော်တို့ ရထားတဲ့ သတင်းအချက်အလက်တွေအရ Starlink ပစ္စည်းအစိတ်အပိုင်း ပို့ဆောင်မှုကို Pentagon က လုပ်ဆောင်နေတယ်လို့ တွေ့ရပါတယ်။ ဒီအတွက် အီလွန် ခင်ဗျားလည်း အရူးကွက်ဘယ်လောက် နင်းနင်း အရွယ်ရောက်ပြီးသူတစ်ယောက်အနေနဲ့ တာဝန်ခံရမယ်" လို့ မက်ဆေ့က ရေးထားပါတယ်။
မတ်စ်ဟာ ယူကရိန်းဒုဝန်ကြီးချုပ် နဲ့ ဒီဂျစ်တယ်အသွင်ကူးပြောင်းရေးဆိုင်ရာ ဝန်ကြီး မီခေးလို ဖီဒိုရော့ဗ်ရဲ့ မေတ္တာရပ်ခံချက်အရ ယူကရိန်းနိုင်ငံအတွက် Starlink ဝန်ဆောင်မှုတွေ သုံးနိုင်အောင် စက်တွေ ပေးပို့ခဲ့ပါတယ်။ နောက်ပိုင်းမှာ Starlink ဂြိုလ်တုအင်တာနက် ဝန်ဆောင်မှုကနေ ရုရှားသတင်းအရင်းအမြစ်တွေ ပိတ်ပင်ဖို့ အစိုးရတချို့ (ယူကရိန်းမဟုတ်) က လာပြောကြောင်း Tesla CEO က ပြောခဲ့ပြီး သေနတ်နဲ့ မထောက်မချင်း မလုပ်နိုင်ဘူးလို့လည်း သူက ဆိုခဲ့ပါတယ်။
ယူကရိန်းမှာ အီလွန်မတ်စ် ပို့ပေးထားတဲ့ Starlink ဂြိုလ်တုအင်တာနက်ဖမ်းစက်တွေ နဲ့ နေ့စဉ်အင်တာနက်သုံးနေသူ ၁ သိန်းခွဲခန့် ရှိနေပါတယ်။ "ထူးထူးဆန်းဆန်းဖြစ်ပြီး သေသွားရင် မင်းနဲ့ သိရလို့ ဝမ်းသာပါတယ်" ဆိုတဲ့ မတ်စ်ရဲ့ သေစကား Tweet တက်လာပြီးနောက် သူ့ရဲ့ မိခင်ဖြစ်သူ မေယီမတ်စ်က "ဒါ ရယ်စရာမဟုတ်ဘူး" လို့ အသိပေးခဲ့ပြီး မတ်စ်ကလည်း သူ့အမေရဲ့ tweet အောက်မှာ တောင်းပန်စကား ပြန်ရေးထားပါတယ်။
မတ်စ်ဟာ အရင်ကလည်း Twitter ပေါ်မှာ နောက်ပြောင်တဲ့သဘောနဲ့ Tweet တွေ တင်ခဲ့သူ ဖြစ်တာကြောင့် ဒီတစ်ခါလည်း ဟာသလုပ်တာပဲလို့ အများက ယူဆနေကြပါတယ်။