ယူနိုက်တက်နည်းပြ အဲရစ်တန်ဟက်ခ်က ချန်ပီယံလိဂ်ဝင်ခွင့်အတွက် လီဗာပူးက ဖိအားပေးနေပေမယ့် ဒီအပေါ်မှာ အာရုံမစိုက်ကြောင်းနဲ့ အရာအားလုံးက ကိုယ့်ကြမ္မာကိုယ် ဖန်တီးနိုင်ခွင့်ရှိနေဆဲဖြစ်ကြောင်း ပြောကြားခဲ့ပါတယ်။ ယူနိုက်တက်ဟာ ဒီနေ့ညမှာ ဝုလ်ဗ်ကို အိမ်ကွင်းမှာ ဧည့်ခံကစားရမှာပါ။
ယူနိုက်တက်အနေနဲ့ လက်ရှိအချိန်မှာ လီဗာပူးထက် တစ်ပွဲပိုကစား၊ ရမှတ်တစ်မှတ်သာ အသာရထားပြီး လာမယ့်ပွဲတွေမှာ ခြေချော်လို့မရတော့ပါဘူး။ ယူနိုက်တက်ဟာ ရာသီအဆုံးသတ်ခါနီးမှာ ရလဒ်ပိုင်း သိသိသာသာ ကျဆင်းလာပြီး လီဗာပူးက ပုံမှန်ခြေစွမ်းပြနေတာကြောင့် အဆင့် (၄) နဲ့ (၅) နှစ်သင်းကြား ရမှတ်ကွာဟချက်က တစ်မှတ်သာ ရှိတော့တာပါ။
ဒီလိုမျိုး လီဗာပူးက ဖိအားပေးလာတဲ့အပေါ်မှာ တန်ဟက်ခ်က ဝုလ်ဗ်နဲ့ပွဲမတိုင်ခင် အခုလိုမျိုးပဲ ဖွင့်ဟပြောကြားလာခဲ့ပါတယ်။ တန်ဟက်ခ်က “ဒါပေါ့ဗျာ။ လီဗာပူးရဲ့ ဖိအားပေးမှုကို ကျွန်တော်တို့ လျစ်လျူရှုနိုင်ပါတယ်။ ဒါက အရေးမကြီးပါဘူး။ ကျွန်တော်တို့ လက်ထဲမှာ အရာအားလုံးရှိပြီးသားပါ။ ကိုယ့်ကြမ္မာကိုယ် ဖန်တီးနိုင်စွမ်းရှိသရွေ့ ကျွန်တော်တို့ လီဗာပူးကို မှီခိုနေစရာ မလိုပါဘူး”
“အရေးကြီးတာက ကျွန်တော်တို့နဲ့ အခု ရင်ဆိုင်ရမယ့် ပြိုင်ဘက်ပါ။ ဝုလ်ဗ်ပေါ့။ ကျွန်တော်တို့ သူတို့ကို ကောင်းကောင်း ကစားရပါမယ်။ သူတို့က ပုံစံကောင်းတွေပြခဲ့ပြီးပါပြီ။ ကျွန်တော်တို့ ဒါကို အာရုံစိုက်ရပါမယ်။ ကျွန်တော်တို့ရဲ့ အနေအထားနဲ့ ပတ်သက်လို့ ကျေနပ်ပါတယ်။ ကျွန်တော်တို့ရဲ့ အောင်မြင်မှု၊ ပွဲတွေ အများကြီး ကစားခဲ့ရတာ၊ အလုပ်လုပ်ခဲ့ရတာတွေကိုပေါ့”
“အသင်းရဲ့ ဖွဲ့စည်းပုံတွေက ရှင်းပါတယ်။ ဒါပေမယ့် ကျွန်တော်တို့ ဒါကို ရာနှုန်းပြည့် စည်းကမ်းတကျ ဖော်ဆောင်နိုင်ရပါမယ်။ ဒါကို လုပ်နိုင်ရင် ကျွန်တော်တို့ အောင်မြင်ပါပြီ” လို့ ပြောကြားသွားခဲ့ပါတယ်။ ဆက်စပ်သတင်းအနေနဲ့ ယူနိုက်တက်နဲ့ ဝုလ်ဗ်ပွဲမှာ ယူနိုက်တက်ရဲ့ အဓိကတိုက်စစ်ကစားသမား ရပ်ရှ်ဖို့ ဒဏ်ရာကြောင့် လွဲချော်နိုင်ကြောင်းလည်း တန်ဟက်ခ်က အတည်ပြုသွားခဲ့ပါတယ်။