အစကတည်းက Twitter ကို ဒေါ်လာ ၄၄ ဘီလျံ ပေးဝယ်တာ အကြောင်းရှိပါတယ်။ ကမ္ဘာ့အချမ်းသာဆုံးသူဌေးဖြစ်လာပြီးတဲ့နောက် နိုင်ငံရေးမှာပါ ဩဇာလွှမ်းနိုင်ဖို့ပါ။ ပြီးခဲ့တဲ့ ၂၀၂၄ အမေရိကန်ရွေးကောက်ပွဲ ကြည့်ရင် အီလွန်မတ်စ်က သူ့ ပလက်ဖောင်းကို သမ္မတဟောင်း ဒေါ်နယ်ထရမ့် ရွေးကောက်ပွဲနိုင်အောင် ဘယ်လောက် လှုံ့ဆော်နိုင်ခဲ့တယ်ဆိုတာ တွေ့ရမှာပါ။
အခုတစ်ခေါက်တော့ သူ့ရဲ့ မူလရည်ရွယ်ချက်ထဲက တစ်ခုဖြစ်တဲ့ X ကို WeChat လို ဖြစ်အောင် ပုံစံပြောင်းဖို့ စလာပါတယ်။ ဒီနှစ်နှောင်းပိုင်းလောက်မှာ X က ငွေပေးချေတာတွေ လုပ်နိုင်မယ့် X Money ဝန်ဆောင်မှု စတော့မှာပါ။ X Money Account အတွက် Visa နဲ့တောင် ပါတနာလုပ်ထားပြီလို့ ဆိုပါတယ်။
X Money အကောင့်ရှိထားရင် Visa Direct က တစ်ဆင့် ပိုက်ဆံကို တစ်နေရာက တစ်နေရာ ချက်ချင်းလွှဲပြောင်း ထည့်နိုင်သလို debit card နဲ့ အချင်းချင်း ငွေပေးတာမျိုးတွေ ၊ ဘဏ်အကောင့်ထဲ ပိုက်ဆံလွှဲတာတွေ လုပ်နိုင်တော့မှာပါ။ အဲ့ဒီအတွက်လည်း အရင်ကတည်းက ငွေလွှဲလိုင်စင်တွေ X က လုပ်ထားတာရှိပါတယ်။
Twitter ကို ဝယ်ပြီး နောက်တစ်နှစ်မှာပဲ X က အရီဇိုးနား ၊ မစ်ရှီဂန် ၊ မစ်ဆူရီ နဲ့ နယူးဟမ့်ရှိုင်းယားပြည်နယ်တွေမှာ Twitter Payments နာမည်နဲ့ ငွေလွှဲလိုင်စင်တွေ လုပ်ခဲ့တာပါ။ အခုဆို X ပလက်ဖောင်းမှာ ပြည်နယ် ၄၀ က လိုင်စင်တွေ ရထားပြီးပြီလို့ ဆိုပါတယ်။
တကယ်တော့ X ဆိုတဲ့ နာမည်ကလည်း အီလွန်မတ်စ်ရဲ့ ပထမဆုံး အွန်လိုင်းဘဏ်ဖြစ်တဲ့ X.com ကို ပြန်အသက်သွင်းလိုက်တာပါ။ X.com က နောက်ပိုင်း Confinity ဆိုတဲ့ ကုမ္ပဏီတစ်ခုနဲ့ ပေါင်းပြီး PayPal ဖြစ်သွားတာပါ။ X Money ကလည်း ဒီအိုင်ဒီယာကိုပဲ အခြေခံပြီး X app မှာ service တစ်ခုအနေနဲ့ တွေ့ရမှာပါ။
X Money ကို အခုနှစ်ကုန်ပိုင်းမှာ စပြီး အမေရိကန်ဈေးကွက်ထဲ မိတ်ဆက်ဖို့ ပြင်ထားပြီး နောက်နှစ်တွေမှာ တခြားဈေးကွက်တွေပါ ရောက်လာဖို့ ရှိပါတယ်။