Linkin Park အဖွဲ့က ခေါင်းဆောင်အဆိုတော် Chester ကိုယ့်ကိုယ်ကို သေကြောင်းကြံသွားတာမှ မကြာသေးဘူး။ ပြီးခဲ့တဲ့ ရက်ပိုင်းကလည်း SHINee ဆိုတဲ့ kpop အဖွဲ့က အဆိုတော်တစ်ဦးဖြစ်တဲ့ Jonghyun မိမိကိုယ်ကို အဆုံးစီရင်သွားပါတယ်။ သူတို့လို အောင်မြင်မှုရရှိနေဆဲ အဆိုတော်တွေ သေကြောင်းကြံစည် ရခြင်းရဲ့ အခြေခံအကြောင်းရင်းကတော့ စိတ်ကျရောဂါကြောင့်ပါတဲ့။
ကမ္ဘာပေါ်မှာ စိတ်ကျရောဂါ စွဲကပ်နေသူပေါင်း သန်းနဲ့ချီပြီ ရှိနေနိုင်လို့ ကမ္ဘာ့ကျန်းမာရေးအဖွဲ့ကြီးကတောင် ၂၀၁၇ ဧပြီလ (၇) ရက်နေ့ (ကမ္ဘာ့ကျန်းမာရေးနေ့) ကို စိတ်ကျရောဂါ တိုက်ဖျက်ရေးနေ့အဖြစ် သတ်မှတ်ထားတာဖြစ်ပါတယ်။ အသက် (၁၅) နှစ်နဲ့ (၁၉) နှစ်ကြား မိန်းကလေးတွေအတွက်တော့ စိတ်ကျရောဂါဟာ သေနှုန်းအမြင့်ဆုံး ရောဂါတွေထဲမှာ ဒုတိယလိုက်နေပါတယ်။
ဘာပဲပြောပြော စိတ်ကျရောဂါဟာ သိပ်ကြောက်ဖို့ ကောင်းတဲ့အတွက် မိမိပတ်ဝန်းကျင်မှာ စိတ်ကျရောဂါ ခံစားနေရတယ်လို့ သံသယရှိသူတွေ ရှိနေရင် ကာကွယ်ပေးနိုင်ဖို့အတွက် အချက်လေးတွေကို ဖော်ပြပေးလိုက်ပါတယ်နော်။
၁။ သူတို့တစ်ယောက်တည်း မဟုတ်ဘူးဆိုတာ သိပါစေ
စိတ်ကျရောဂါရဲ့ ကနဦးလက္ခဏာကတော့ သူတို့နားမှာ ဘယ်သူမှမရှိဘဲ အထီးကျန်နေတယ်လို့ ခံစားရတာက စတာပါပဲ။ ပတ်ဝန်းကျင်က လူတွေအားလုံးက သူ့ကိုဝိုင်းကြဉ်ထားတယ်။ သူတစ်ခုခုမှားရင် လှောင်ရယ် ရယ်ကြမယ်လို့ စိတ်ထဲမှာ အထင်ရောက်ပြီး လူတွေနဲ့ဝေးရာကို ထွက်ပြေးနေတာပါ။
မိမိပတ်ဝန်းကျင်မှာ သူများတွေနဲ့ အပေါင်းအသင်းသိပ်မလုပ်ဘဲ တစ်ယောက်တည်းနေတတ်သူ ရှိရင် သူတို့နဲ့ ရင်းရင်းနှီးနှီး သွားစကားပြောပေးပါ။ ကမ္ဘာလောကကြီးထဲမှာ သူတို့တစ်ယောက်တည်း မဟုတ်ဘူးဆိုတာ သိပါစေ။ ဒီလိုလွယ်ကူတဲ့ အပြုအမူလေးတွေက သင့်ကို လူ့အသက်တစ်ချောင်းကို ကယ်တင်လိုက်နိုင်စေမှာပါ။
၂။ အရမ်းကြီးလည်း ဂရုစိုက်မပြပါနဲ့
ဂရုစိုက်ရာမှာလည်း limit လေးတော့ ထားရမှာပါ။ သူတို့ကို စိတ်မကျန်းမာသူလို ဆက်ဆံပြီး နေရာတကာမှာ လိုက်ဂရုစိုက် ပေးနေမယ်ဆိုရင်လည်း သူတို့စိတ်ထဲမှာ တစ်မျိုး အဓိပ္ပာယ် သက်ရောက်သွားမှာပါ။ ဥပမာ ကိုယ်လက်အင်္ဂါ ချို့တဲ့သူတွေဆိုရင် သူတို့ကို လူတွေက အရမ်းဂရုစိုက်ပြီး သနားကရုဏာသက်တဲ့ အကြည့်တွေနဲ့ ကြည့်မှာကို မလိုလားကြပါဘူး။ ဒါကြောင့် သူတို့ကို အရမ်းထိခိုက်လွယ်တဲ့ ကြွေအိုးလေးတွေလို မဆက်ဆံဘဲ ပုံစံသူငယ်ချင်း၊ မိတ်ဆွေတွေလိုပဲ ဆက်ဆံပေးလိုက်ပါ။
၃။ ပျော်ရွှင်မှုကို မျှဝေခံစားပါ
ပျော်ရွှင်မှုပုံစံ အမျိုးမျိုးရှိပါတယ်။ စိတ်ဓာတ်ကျနေသူကို ဖေးမဖို့ အကောင်းဆုံးနည်းလမ်းကတော့ မျှဝေခံစားမှုရဲ့ ပျော်ရွှင်မှုကို နားလည်စေတာပါပဲ။ တစ်နည်းအားဖြင့် ပြောရရင် "sharing is caring" ပေါ့။။ စိတ်ဓာတ်ကျပြီး ကိုယ့်ကိုယ်ကိုသေကြောင်းကြံသူ အများစုဟာ ပျော်ရွှင်မှုအစစ်ကို မကြုံဖူးသူတွေနဲ့ မျှဝေခွင့်မရလိုက်သူတွေ ဖြစ်လေ့ရှိပါတယ်။ ပျော်ရွှင်မှုကို အတူမျှဝေခြင်းဖြင့် ကမ္ဘာကြီးကို ကယ်တင်လိုက်ပါ။
၄။ မေတ္တာတရားအကြောင်းကို နားလည်ပါစေ
"အလျားအနံမရှိပေမယ့် အသွားအပြန်ရှိတဲ့" မေတ္တာတရားဆိုတာ အလွန်အေးချမ်းပါတယ်။ မေတ္တာတရားစစ်နဲ့ ထိတွေ့ဖူးသူတိုင်း ဘယ်လောက်စိတ်ဓာတ်ကျစရာ အခြေအနေကိုပဲ ကြုံလာပါစေ။ လက်မြှောက်အရှုံးပေးဖို့ စဉ်းစားမိကြမှာ မဟုတ်ပါဘူး။ မေတ္တာတရားကို မျှဝေရလို့ မိမိအတွက် ဘာဆိုးကျိုးမှမရှိဘဲ ကောင်းကျိုးတွေပဲရနိုင်ပါတယ်။
၅။ သူတို့ရဲ့စကားသံကို နားထောင်ပေးပါ
စိတ်ကျရောဂါကို ရှိရင်းစွဲထက် ပိုမိုဆိုးဝါးစေတဲ့အရာက သူတို့ပြောတဲ့စကားတွေကို နားထောင်မယ့်သူမရှိတာပါ။ သူတို့ရဲ့ ခံစားချက်တွေကို သေချာနားထောင်ပေးမယ့်လူသာရှိရင် သူတို့စိတ်ဓာတ်ကျနေတဲ့ အခြေအနေ ထင်သလောက်ဆိုးရွားစွာ မဟုတ်ပါဘူး။ ဒါကြောင့် မိမိကို ရင်ဖွင့်ချင်သူရှိလာရင် အချိန်အတိုင်းအတာ တစ်ခုပေးပြီး နားထောင်ပေးကြည့်ပါ။ အပြင်ပန်းမှာ အပေါင်းအသင်းတွေ တရုန်းရုန်းနဲ့ လူချစ်လူခင်များတဲ့ သူတွေမှာတောင် စိတ်ဓာတ်ကျတယ်ဆိုတဲ့ အခြေအနေတစ်ခု ရှိနေနိုင်တယ်လေ။
၆။ သူတို့ရဲ့ကြိုးစားအားထုတ်မှုကို အသိအမှတ်ပြုပါ
လူဆိုတာကလည်း ခက်တော့ခက်သား။ ကိုယ့်အားထုတ်မှုကိုသာ အဟုတ်ထင်တတ်ပြီး သူတစ်ပါးရဲ့အားထုတ်မှုကိုတော့ အသိအမှတ်ပြုဖို့ မေ့လျော့တတ်ပါတယ်။ မိမိအစွမ်းကုန် ကြိုးစားအားထုတ်ထားရတဲ့ အရာတစ်ခုကို အသိအမှတ်ပြု မခံရတာလောက် ဆိုးတဲ့ဝေဒနာမရှိတော့ပါဘူး။ ဒါကြောင့် မိမိပတ်ဝန်းကျင်မှာ ဘယ်သူပဲဖြစ်ဖြစ် အားထုတ်ကြိုးစားနေတာကို မြင်တွေ့ရင် သူတို့ရဲ့လုပ်ရပ် အောင်မြင်သည်ဖြစ်စေ၊ ကျရှုံးသည်ဖြစ်စေ အားထုတ်မှုကိုတော့ အသိအမှတ်ပြုပေးလိုက်ပါ။
Share