ဂျပန်ရုပ်ရှင်ဇာတ်ကားတွေ၊ ကိုရီးယားဇာတ်ကားတွေ ကြည့်ရင် မိမိချစ်သူ၊ ခင်သူတွေအတွက် နေ့လည်စာအဖြစ် ကြက်ဥလိပ်လေးတွေ လုပ်လာတာကို တွေ့ဖူးကြတာပေါ့။ ဂျပန်ကြက်ဥလိပ်ဟာ အာဟာရဓာတ် ကြွယ်ဝပြီး စားလို့ကောင်းတဲ့ နေ့လည်စာလေးတစ်မျိုးဖြစ်ပြီး ထမင်းဖြူနဲ့တွဲဖက် စားသုံးနိုင်သလို ဒီတိုင်းလည်းစားလို့ရပါတယ်။ ဂျပန်ကြက်ဥလိပ်လေးကို အိမ်မှာကိုယ်တိုင် လုပ်စားချင်တယ်ဆိုရင်တော့ အောက်ကပြုလုပ်နည်းကိုကြည့်ပြီး လိုက်လုပ်ကြည့်လို့ရပါတယ်နော်။
ပါဝင်ပစ္စည်းများ
ဂျပန်ကြက်ဥလိပ် ပြုလုပ်ဖို့အတွက် လိုအပ်တဲ့ ပါဝင်ပစ္စည်းတွေကတော့ ကြက်ဥ (၄) လုံး၊ ပဲငံပြာရည် (၁/၄) ဇွန်း၊ ဂျပန်ဆန်အရက် (၁) ဇွန်း၊ ဆား (၁/၄) ဇွန်း၊ နှမ်းဆီ (၁) ဇွန်းတို့ပဲ ဖြစ်ပါတယ်။
ပြုလုပ်နည်း
အရင်ဆုံး အရွယ်တော် ပန်းကန်လုံးတစ်လုံးထဲမှာ ပဲငံပြာရည်၊ ဂျပန်ဆန်အရက် (mirin) ၊ ဆားတို့ကိုထည့်ပြီး သမအောင် ရောမွှေပေးလိုက်ပါ။ ပြီးရင် အဲဒီအရည်ထဲကို ကြက်ဥတွေဖောက်ထည့်ပြီး ဇွန်းတစ်ချောင်းနဲ့ ခလောက်ပေးလိုက်ပါ။ ကြက်ဥနဲ့ တခြားပါဝင်ပစ္စည်းတွေ ကောင်းကောင်းသမသွားပြီဆိုတော့မှ ပန်းကန်လုံးကို ဘေးခနဖယ်ထားလိုက်ပါ။
မီးဖိုကို medium high အပူချိန်လောက်တင်ထားပြီး စတုဂံပုံသဏ္ဍာန် လေးထောင့်ဒယ်အိုးပြား (ဂျပန်ဆိုင်တွေမှာ တွေ့ရတတ်ပြီး ကြက်ဥကြော်ကြော်ရာမှာ အဓိကအသုံးပြုတဲ့ ဒယ်အိုးပြား) တစ်လုံးကို မီးဖိုပေါ်တင်ပြီး အပူပေးလိုက်ပါ။ ပြီးရင် နှမ်းဆီနည်းနည်းပါ ထည့်ပြီး ဆီပူပေးထားလိုက်ပါ။ ခုနက ကြက်ဥအနှစ်ကို ခြောက်ပုံပုံပြီး ပန်းကန်လုံးငယ်လေးတွေထဲမှာ ခွဲထားပေးလိုက်ပါ။
ပြီးမှ တစ်ပုံကိုယူပြီး ဒယ်အိုးထဲကို လောင်းထည့်လိုက်ပါ။ ဒယ်အိုးအောက်ခြေမှာ ကြက်ဥအလွှာပါးပါးလေးပဲ ဖြစ်နေအောင်ကိုတော့ ဂရုစိုက်ရမှာပါနော်။ ကြက်ဥကြော်ကျက်ပြီဆိုရင် ကြက်ဥကြော်ကို သစ်လုံးပုံ (ဖက်ခေါင်းအုံးပုံ) အလိပ်လေးဖြစ်အောင်လိပ်ပြီး ဒယ်အိုးရဲ့တစ်ဖက်ခြမ်းမှာ ထားပေးလိုက်ပါ။ ပြီးရင် ဒယ်အိုးရဲ့လွတ်နေတဲ့နေရာမှာ ကြက်ဥအနှစ် နောက်တစ်ပုံကို ထည့်ကြော်လိုက်ပါ။
အဲဒီကြက်ဥကြော် ကျက်ပြီဆိုရင် ခုနက ဒယ်အိုးထောင့်မှာကပ်ထားတဲ့ ကြက်ဥလိပ်ပေါ်မှာပဲ ဖြည်းဖြည်းချင်းလိပ်ပေးလိုက်ပါ။ ကြက်ဥအနှစ်တွေအားလုံး ကုန်သွားသည်အထိ အထက်ပါလုပ်ဆောင်ပုံအတိုင်း ဆက်ကြော်ပြီး လိပ်ပေးလိုက်ပါ။ (ဒီနေရာမှာ ကြက်ဥလိပ်တဲ့နေရာက ပညာသားပါတဲ့အတွက် မလုပ်တတ်ရင် ယှဉ်တွဲဖော်ပြထားတဲ့ ဗီဒီယိုကိုကြည့်ပြီး လုပ်နိုင်ပါတယ်။)
ကြက်ဥအနှစ်တွေ အားလုံးကုန်သွားပြီဆိုရင်တော့ ကြက်ဥလိပ်လေးက ရုပ်လုံးပေါ်နေလောက်ပါပြီ။ ကြက်ဥလိပ်လေးကို တစ်ကိုက်စာအရွယ် အတုံးလေးတွေဖြစ်အောင် အသားလှီး သစ်သားဘုတ်ပြားပေါ်မှာ တင်လှီးပေးလိုက်ပါ။ တကယ်လို့ ကြက်ဥလိပ်လေးကို သေချာအလှဆင်ချင်တယ်ဆိုရင် စတုရန်းပုံဖြစ်အောင် ထက်ခြမ်းထပ်ခြမ်းပြီး စတုရန်းပုံနှစ်ခုကို ဆက်လိုက်မယ်ဆိုရင် အသည်းနှလုံးပုံ ကြက်ဥလိပ်လေး ပုံပေါ်လာမှာပါ။ မိမိနှစ်သက်ရာ ဆော့စ်နဲ့ တွဲဖက်သုံးဆောင်နိုင်သလို ချစ်သူ၊ ခင်သူတွေကိုလည်း တည်းခံဧည့်ခံနိုင်ပါပြီ။
Source: Stylecraze
Share