ဗော့ဒ်ကာအရက်မှာ ကာဘိုဟိုက်ဒရိတ်နဲ့ သကြားပါဝင်မှုမရှိတဲ့အတွက် ဘာနဲ့မှမရောဘဲ သောက်မယ်ဆိုရင် ကယ်လိုရီတက်စေနိုင်မှာ မဟုတ်ပါဘူး။ နောက်ပြီး ဒါတွေတင်မကသေးပါဘူး။ ဗော့ဒ်ကာ အရက်မှာ ကျန်းမာရေးအကျိုးကျေးဇူးတွေလည်း ရှိပါသေးတယ်။ ဒါပေမဲ့ ဘာအရာမဆို တန်ဆေးလွန်ဘေးဆိုတော့ သတိထားပြီး ချင့်ချိန်သောက်သုံးပေးရင်တော့ အကောင်းဆုံးပါပဲ။

၁။ စိတ်ဖိစီးမှုပြေပျောက်စေတယ်

တစ်ပတ်လုံး အလုပ်ထဲမှာ စိတ်ရှုပ်ခဲ့ရသမျှ ဘားမှာထိုင်ပြီး ဗော့ဒ်ကာခွက်လေး ကိုင်လိုက်တာနဲ့ ပြေလျော့သွားတယ်လို့ ခံစားရဖူးပါသလား။ ဒါဆိုရင်တော့ ဒီလိုခံစားဖူးတာ ကျွန်တော်တစ်ယောက်တည်း မဟုတ်ဘူးပေါ့။ သိပ္ပံနည်းကျ ရှာဖွေတွေ့ရှိချက် တွေအရဆိုရင် ဗော့ဒ်ကာအရက်ဟာ ခန္ဓာကိုယ်ထဲက စိတ်ဖိစီးမှုကိုဖြစ်စေတဲ့ ဟော်မုန်းနဲ့ တခြားအကြောင်းတရားတွေကို ဝိုင်နီလိုမျိုး တခြားအရက်တွေထက်စာရင် ပိုမိုထိရောက်စွာ တိုက်ဖျက်ပေးနိုင်ပါတယ်။ နောက်ပြီး ဦးနှောက်ကို ပိုမိုတည်ငြိမ်စေပြီး အာရုံစူးစိုက်မှု အားကောင်းစေတဲ့ ဂုဏ်သတ္တိလည်း ဗော့ဒ်ကာအရက်ထဲမှာ ပါပါတယ်။

၂။ ထုံကျင်စေတယ်

နောက်ပြီး ဗော့ဒ်ကာအရက်ကို ပလတ်စတစ်အိတ် တစ်လုံးထဲထည့်ပြီး ရေခဲသေတ္တာထဲမှာ အအေးခံထားလိုက်မယ်ဆိုရင် အဆစ်အမြစ်ရောင်ရမ်းခြင်းနဲ့ ကိုက်ခဲခြင်းဝေဒနာတွေကို သက်သာပျောက်ကင်းစေနိုင်ပါတယ်။

၃။ သွားကိုက်ပျောက်စေတယ်

သွားကိုက်လို့ အိပ်လို့လည်းမရ၊ ထိုင်လို့လည်းမရ၊ ထလို့လည်းမရနဲ့ လူးလိမ့်ခံစားနေရပါသလား။ သွားဆေးခန်းပေးဖို့ကလည်း ညကြီးအချိန်မတော် ဖြစ်နေပါသလား။ ဒါဆိုရင်တော့ အိပ်ခန်းထဲမှာ ဗော့ဒ်ကာအရက်တစ်လုံး ဝှက်ထားမိတဲ့အတွက် ဝမ်းသာရပါလိမ့်မယ်။

၄။ နှလုံးကျန်းမာရေးကောင်းစေတယ်

ဗော့ဒ်ကာသောက်ပေးသင့်တဲ့ နောက်ထပ်အကြောင်းရင်းကောင်း တစ်ခုကတော့ နှလုံးကျန်းမာရေးကို အထောက်အကူပြုပေးတဲ့ ဂုဏ်သတ္တိကြောင့်ပဲ ဖြစ်ပါတယ်။ ဗော့ဒ်ကာသောက်ခြင်းက သွေးကြောတွေကို လှုံ့ဆော်ပေးပြီး သွေးစီးဆင်းမှုကို ပိုမိုမြန်ဆန် ကောင်းမွန်စေပါတယ်။

နှလုံးဆီကို သွေးတွေလွတ်လပ်စွာ အသွားအပြန်စီးဆင်းနိုင်ခြင်းက လေဖြတ်ခြင်းနဲ့ နှလုံးသွေးကြော ပေါက်ခြင်း လိုမျိုး အဓိကကျန်းမာရေးပြဿနာတွေကို တားဆီးပေးနိုင်ပါတယ်။ နောက်တစ်ခုက ဗော့ဒ်ကာသောက်ခြင်းက HDL လို့ခေါ်တဲ့ ခန္ဓာကိုယ်အတွက်ကောင်းတဲ့ ကိုလက်စ်ထရောတွေကိုလည်း များပြားစေနိုင်ပါတယ်။

Source: Organicfacts