ဂျပန်နိုင်ငံမှာ အပူလှိုင်းဖြတ်သန်းမှုကြောင့် မကြုံစဖူး အပူချိန်များ မြင့်တက်နေမှုကြောင့် ပြီးခဲ့တဲ့ သီတင်းပတ်အတွင်း အပူချိန်မြင့်တက်မှုကြောင့် လူ ၈၀ ဦးထက်မနည်း သေဆုံးခဲ့ပါတယ်။ အပူချိန်များ မြင့်တက်နေမှုကို သဘာဝဘေးအန္တရာယ် ကျရောက်မှုအဖြစ် ဂျပန်မိုးလေဝသဌာနက ယနေ့ (ဇူလိုင် ၂၄ ရက်) ကြေညာလိုက်ကြောင်း သိရပါတယ်။
Photo: Getty Images
အပူလှိုင်းကျရောက်ပြီး အပူချိန်များ လျော့ကျသွားမယ့် လက္ခဏာမတွေ့ရသေးကြောင်းလည်း မိုးလေဝသ ခန့်မှန်းသူတွေက ဆိုပါတယ်။
ယမန်နေ့ (ဇူလိုင် ၂၃ ရက်) က ကူမာဂါယာမြို့ (Kumagaya) မှာ အပူချိန် ၄၁.၁ ဒီဂရီဆဲလ်စီးယပ်အထိ မြင့်တက်ခဲ့ပြီး ဂျပန်နိုင်ငံမှာ အမြင့်ဆုံးအပူချိန်အဖြစ် စံချိန်တင်ခဲ့ကြောင်း သိရပါတယ်။
Photo: Getty Images
"နေရာဒေသအချို့မှာ အပူချိန်က မကြုံစဖူး မြင့်တက်နေတာ တွေ့ရပါတယ်၊ အပူလှိုင်းက အသက်အန္တရာယ်ရှိနိုင်တဲ့ ခြိမ်းခြောက်မှုတစ်ခု ဖြစ်ခဲ့ပြီး ဒါကို သဘာဝဘေးအန္တရာယ် ကျရောက်မှုအဖြစ် ကျွန်တော်တို့ သတ်မှတ်ပါတယ်" လို့ ဂျပန်မိုးလေဝသဌာနမှ ပြောခွင့်ရအမျိုးသား မိုတိုအကီ တာကီကာဝါက ပြောခဲ့ပါတယ်။
Photo: Reuters
"တစ်နိုင်ငံလုံးမှာ စံချိန်တင် အပူလှိုင်းကျရောက်နေတာကြောင့် ကျောင်းသူကျောင်းသား ကလေးငယ်တွေ အန္တရာယ်မဖြစ်စေအောင် ကာကွယ်ဖို့အတွက် အရေးတကြီး စီစဉ်ဆောင်ရွက်မှုတွေ လိုအပ်နေပါတယ်" လို့ ၎င်းက ယနေ့ (ဇူလိုင် ၂၄ ရက်) ပြုလုပ်တဲ့ သတင်းစာရှင်းလင်းပွဲမှာ ပြောခဲ့ပါတယ်။
Photo: AFP/Martin Bureau
ဂျပန်မှာ မိုးသည်းထန်စွာရွာသွန်းပြီး ရေကြီးမြေပြိုမှုတွေကြောင့် လူ ၂၀၀ ကျော် သေဆုံးခဲ့တဲ့ သဘာဝဘေးအန္တရာယ် ဖြစ်ရပ်အပြီး အပူလှိုင်းကျရောက်မှု ကြုံတွေ့နေရတာလည်း ဖြစ်ပါတယ်။
အပူချိန်မြင့်တက်မှု ကြုံတွေ့နေရသည့် ကမ္ဘာ့နေရာဒေသများ
- ဥရောပ နေရာဒေသ အများအပြားမှာ အပူချိန်များ ဆက်လက်မြင့်တက်နေပြီး ဂရိနိုင်ငံမှာ တောမီးလောင်မှုတွေ ဖြစ်ပေါ်နေပါတယ်။ ဂရိတောမီးကြောင့် ဇူလိုင် ၂၄ ရက်အထိ စာရင်းတွေအရ သေဆုံးသူအရေအတွက် ၇၄ ဦးထက်မနည်းရှိပြီ ဖြစ်ပါတယ်။
- ဆွီဒင်နိုင်ငံမှာလည်း အပူချိန်မြင့်တက်ရာမှ တောမီးများလောင်မှုကြောင့် လူတစ်ဦးထက်မနည်း သေဆုံးခဲ့ပြီး လူဦးရေး ဒါဇင်အများအပြား ဒဏ်ရာရခဲ့ကြပါတယ်။ အပူချိန်မြင့်တက်မှုနဲ့ ခြောက်သွေ့မှုတွေကြောင့် ဆွီဒင်နိုင်ငံတစ်ဝှမ်း တောမီးလောင်မှုတွေဟာ မြောက်ဘက်စွန်း အာတိတ်စက်ဝိုင်းဒေသအထိ ပျံ့နှံ့ရောက်ရှိခဲ့ပါတယ်။
- နော်ဝေနိုင်ငံမှာလည်း ပြီးခဲ့တဲ့ မေလအတွင်း အပူချိန်များ စံချိန်တင်မြင့်တက်ခဲ့ပြီး တောမီးလောင်မှုတွေ ဖြစ်ခဲ့ပါတယ်။
ဂရိမှာ တောမီးလောင်နေမှု မြင်ကွင်း (Photo: AFP)
- ကနေဒါနိုင်ငံ အရှေ့ပိုင်းတစ်လျှောက်ရှိ မြို့တွေမှာလည်း ဇူလိုင်လ အစောပိုင်းမှစပြီး အပူလှိုင်းကျရောက်မှု ကြုံတွေ့နေရပြီး Quebec ဒေသ တစ်ခုတည်းမှာပင် အပူဒဏ်ကြောင့် လူ ၇၀ ထက်မနည်း သေဆုံးခဲ့ပါတယ်။
- အမေရိကန်နိုင်ငံ ကယ်လီဖိုးနီးယားပြည်နယ် တောင်ပိုင်းမှာ အပူလှိုင်းကြောင့် လော့စ်အိန်ဂျိလစ် အပြင်ဘက်ရှိ Chino မြို့မှာ အပူချိန် ၄၈.၉ ဒီဂရီဆဲလ်စီးယပ်အထိ မြင့်တက်ခဲ့မှု အပါအဝင် အပူချိန်များ စံချိန်တင်မြင့်တက်ခဲ့ပါတယ်။
- အယ်လ်ဂျီးရီးယားနိုင်ငံမှာ Ouargla မြို့မှာ ဇူလိုင် ၅ ရက်နေ့ အပူချိန်ဟာ ၅၁.၃ ဒီဂရီဆဲလ်စီးယပ်သို့ မြင့်တက်ရောက်ရှိခဲ့ပြီး အာဖရိကရဲ့ အမြင့်ဆုံး အပူချိန်အဖြစ် စံချိန်တင်ခဲ့ပါတယ်။
Share