အင်ဒိုနီးရှားနိုင်ငံ ဂျာဗားကျွန်း ကမ်းလွန်မှာ မီးလောင်မှုဖြစ်ပွားခဲ့တဲ့ ကူးတို့သင်္ဘောမှ ပျောက်ဆုံးနေသူ ၃၀ ဦးကို ကယ်ဆယ်ရေးသမားတွေက ယနေ့ (သြဂုတ် ၂၃ ရက်) ရှာဖွေနေကြပါတယ်။
(KM Santika Nusantara ကူးတို့သင်္ဘော မီးလောင်နေမှု) (Photo: Istimewa)
KM Santika Nusantara ကူးတို့သင်္ဘောဟာ အင်ဒိုနီးရှားရဲ့ ဒုတိယအကြီးဆုံးမြို့ ဆူရာဘာယာနဲ့ ဘော်နီယိုကျွန်းပေါ်ရှိ ဘလစ်ခ်ပါပန်မြို့ငယ်ကြား ခုတ်မောင်းသွားနေစဉ် ကြာသပတေးနေ့ (သြဂုတ် ၂၂ ရက်) ညပိုင်းက မီးလောင်မှုဖြစ်ပွားခဲ့ပါတယ်။
မီးလောင်မှုဖြစ်ပွားတဲ့ အဆိုပါ ကူးတို့သင်္ဘောပေါ်မှာ လူ ၂၇၇ ဦး လိုက်ပါသွားခဲ့ကြောင်း အစိုးရပြောခွင့်ရပုဂ္ဂိုလ် Syahrul Nugroho က ရုပ်မြင်သံကြားသတင်းဌာန TV One ကို ပြောပါတယ်။ "လူ ၂၄၅ ယောက်လောက်ကို စက်တပ်လှေငယ်တွေသုံးပြီး ကူးတို့သင်္ဘောပေါ်ကနေ ရွှေ့ပြောင်းပေးခဲ့ပါတယ်၊ သင်္ဘောပေါ်မှာ လိုက်ပါလာတဲ့ ခရီးသည် ၃၀ ပျောက်ဆုံးနေပါတယ်" လို့ ၎င်းကဆိုပါတယ်။
(အင်ဒိုကူးတို့သင်္ဘောတစ်စီးမှာ လိုက်ပါမည့်သူများကို တွေ့ရစဉ်) (Photo: AFP)
ကူးတို့သင်္ဘောပေါ်မှာ မီးလောင်မှုဖြစ်ပွားရတဲ့ အကြောင်းရင်းနဲ့ပတ်သက်ပြီး အာဏာပိုင်တွေက အသေးစိတ် ထုတ်ဖော်ပြောခြင်း မရှိသေးကြောင်း Reuters သတင်းမှာ ဖော်ပြပါတယ်။ ကူးတို့သင်္ဘောမှာ လိုက်ပါတဲ့ခရီးသည် အရေအတွက်ကို ၁၁၁ ဦးအဖြစ် တရားဝင် စာရင်းမှာဖော်ပြထားခဲ့မှုကြောင့် ကယ်ဆယ်ရေးလုပ်ဆောင်ရာမှာ ရှုပ်ထွေးခဲ့ရကြောင်း အာဏာပိုင်တွေက ပြောပါတယ်။
(သြဂုတ် ၁၇ ရက်က မီးလောင်မှုဖြစ်ခဲ့သည့် ကူးတို့သင်္ဘော) (Photo: AFP)
သို့သော် ပင်လယ်ရေလမ်းခရီး ဘေးကင်းလုံခြုံမှု စံချိန်စံညွှန်းတွေကို လိုက်နာမှုနဲ့ အရေးယူဆောင်ရွက်မှုပိုင်း အားနည်းချက်တွေကြောင့် မတော်တဆမှုတွေ မကြာခဏဆိုသလို ဖြစ်ပွားလေ့ရှိပါတယ်။ သြဂုတ် ၁၇ ရက်နေ့ မနက်အစောပိုင်းကလည်း အင်ဒိုနီးရှားနိုင်ငံ ဆူလာဝေစီကျွန်း ကမ်းလွန်မှာ ကူးတို့သင်္ဘောတစ်စီး မီးလောင်မှုဖြစ်ပွားခဲ့ရာ ကလေးငယ်နှစ်ဦး အပါအဝင် လူခုနစ်ဦး သေဆုံးခဲ့ကြောင်း သိရပါတယ်။