အိန္ဒိယမှာ ယခုနှစ် မုတ်သုန်ရာသီ မိုးသည်းထန်ပြီ ရေကြီးမှုတွေကြောင့် ကယ်ဆယ်ရေးစခန်းတွေမှာ ခိုလှုံနေရထိုင်ရသူ အရေအတွက် တစ်သန်းကျော်ရှိနေကြောင်းနဲ့ နိုင်ငံအနောက်တောင်ပိုင်း ကီရာလာပြည်နယ်မှာ ရေကြီးမှုများအတွင်း လူ ၄၁၀ ကျော် သေဆုံးခဲ့တယ်လို့ အာဏာပိုင်တွေက ယနေ့ (သြဂုတ် ၂၁ ရက်) ပြောပါတယ်။
Photo: Reuters
ရာစုနှစ်တစ်ခုနီးပါးအတွင်း ရေကြီးမှုတွေ အဆိုးရွားဆုံး ဖြစ်ပေါ်ခဲ့တဲ့ ကီရာလာပြည်နယ်မှာ နေအိမ် ၅၀,၀၀၀ ခန့် ပျက်စီးခဲ့တယ်လို့ ပြည်နယ်လွှတ်တော်အမတ်တစ်ဦးက ဆိုပါတယ်။
ကီရာလာပြည်နယ်အတွင်း အစွန်အဖျားနဲ့ တောင်တန်းဒေသတွေမှာ ရေကြီးမှုကြောင့် သောင်တင်နေသူတွေကို ကယ်ဆယ်ရေးမှာ ထောင်နဲ့ချီတဲ့ ကြည်းတပ်၊ ရေတပ်နဲ့ လေတပ်တို့မှ တပ်ဖွဲ့ဝင်တွေက ပါဝင်ကူညီခဲ့ကြပါတယ်။
Photo: Atul Loke/Getty Images
ကယ်ဆယ်ရေးစခန်း ၃,၂၀၀ ခန့်မှာ စုစုပေါင်း လူဦးရေ ၁,၀၂၈,၀၀၀ လက်ရှိ ခိုလှုံနေထိုင်လျက်ရှိကြောင်း ပြည်နယ်အစိုးရ ပြောခွင့်ရအမျိုးသားက AFP ကို ပြောခဲ့ပါတယ်။
တနင်္လာနေ့ (သြဂုတ် ၂၀ ရက်) က နောက်ထပ် အလောင်းခြောက်လောင်း တွေ့ရှိခဲ့ရပြီးနောက် ကီရာလာပြည်နယ်မှာ ဇွန်လမှစတင်ခဲ့တဲ့ မုန်သုန်ရာသီအတွင်း ရေကြီးမှုတွေကြောင့် သေဆုံးသူအရေအတွက် ၄၁၀ ကျော်အထိ မြင့်တက်လာခဲ့ကြောင်း သိရပါတယ်။
Photo: AFP
ထိုအတောအတွင်း ကီရာလာပြည်နယ်မှာ ရေကြီးမှုဆိုးရွားစွာ ဖြစ်ပေါ်နိုင်ကြောင်း သဘာဝပတ်ဝန်းကျင်ဆိုင်ရာ အိန္ဒိယကျွမ်းကျင်သူတွေရဲ့ ကြိုတင်ခန့်မှန်း သတိပေးမှုကို အစိုးရက လစ်လျူရှုခဲ့ကြောင်း ပြောဆိုမှုတွေလည်း ထွက်ပေါ်လာပါတယ်။