အနိမ့်ဆုံးစပါးဈေး ၅၄၀,၀၀၀ ကျပ်သတ်မှတ်မှုက စပါးစိုက်ပျိုးသူတွေ အရှုံးပေါ်မယ့် နှုန်းထားဖြစ်

ဒါပေမယ့် အခုနှစ်မိုးစပါးအတွက် စိုက်ပျိုးစရိတ်က အရင်နှစ်ထက် နှစ်ဆမြင့်တက်ခဲ့တာကြောင့်အနိမ့်ဆုံး စပါးဈေး ၅၄၀,၀၀၀ ကျပ်သတ်မှတ်မှုသည် စပါးစိုက် တောင်သူတွေအတွက်တော့ အရှုံးပေါ်မယ့်အခြေအနေသာဖြစ်တယ်လို့ ဆိုပါတယ်။

" အခုနှစ်က အရင်းအနှီးကကို လယ်တစ်ဧကကို ၂ သိန်းခွဲလောက် ကုန်ကျပါတယ်။ အခုသူတို့သတ်မှတ်တဲ့ဈေးက တော်တော်ကိုအဆင်မပြေတာပါ။ လယ်သမားတွေအပေါ် ဘယ်လိုစိတ်နဲ့များ သတ်မှတ်လည်းမသိတော့ပါဘူး။ တစ်ဧက စပါး ၅၀ ထွက်ရင်ကိုမမြတ်ဘူး။ အဲ့ဒီအောက်လျှော့ရင်တော့ အရှုံးပေါ့။ စပါးအထွက်နှုန်းကလျော့ ၊ ဈေးကမကောင်း တောင်သူတွေဘဝ ဒီထက်ဆိုးဖို့ပဲရှိပါတယ် " လို့ စပါးစိုက်တောင်သူ တစ်ဦးကပြောပါတယ်။

" တောင်သူဘက်မကြည့်ဘဲ ဈေးသတ်မှတ်လိုက်တာလို့ပဲပြောချင်တယ်။ ဒီနှစ်ဒီလောက်အခြေအနေတွေရှုပ်ပြီး ဈေးတွေမတရားတက်နေလို့ တောင်သူတွေငြီးတွားနေတာသိရက်နဲ့ အနိမ့်ဆုံးဈေးက ၅၄၀၀၀၀ ပဲဆိုတော့ လေ။ ခုနှစ် အမြတ်မပြောနဲ့ အကြွေးကျေဖို့တောင်မလွယ်ပါဘူး။ " လို့ စပါးစိုက်တောင်သူက ဆိုပါတယ်။

စပါးစိုက်ခင်း လယ်တစ်ဧကအတွက် ကုန်ကျစရိတ်အနေဖြင့် လယ်ထွန်ယက်ခက ၄၀၀၀၀ ကျပ် ၊မျိုးစပါး စရိတ် ၁၀၀၀၀ ကျပ် ၊ မြက်နူတ်ခ ၂၀၀၀၀ ကျပ် ၊ ရေတင်ခ ၂၅၀၀၀ ကျပ်၊  မြေသြဇာ ၅၇၀၀၀ ကျပ်၊ စပါးရိတ်ချွေစက် ကုန်ကျစရိတ်က ၇၀၀၀၀ ကျပ် ၊ စပါးသယ်ယူပို့ဆောင်ခက ၈၀၀၀ ကျပ်၊ စတဲ့အထွေထွေ အလုပ်သမားငှါးရမ်းခစရိတ်တွေလည်း ကုန်ကျမှုရှိတယ်လို့ သိရပါတယ်။ 

စပါး တင်း ၁၀၀ ကို ၅၄၀,၀၀၀ ထက်လျော့ပြီးမဝယ်ဖို့သတ်မှတ်လိုက်တဲ့ စပါးကတော့ အစိုဓာတ် (၁၄)% နဲ့ အဖျင်း၊ အမှော်၊ ဖုန်၊ သဲ၊ ခဲ ကင်းစင်ပြီး အရည်အသွေးဆိုင်ရာ သတ်မှတ်စံချိန်စံညွှန်းတွေနဲ့ ကိုက်ညီတဲ့ တစ်တင်း (၄၆) ပေါင်ကိုက် စပါး တင်း(၁၀၀) ဖြစ်ရမယ်လို့ သတ်မှတ်ချက်ပါရှိပါတယ်။ 

မနှစ်က မိုးစပါးမှာတော့ စပါးတင်း ၁၀၀ ကိုအနိမ့်ဆုံး ၅၂၀,၀၀၀ ကျပ် သတ်မှတ်ခဲ့ပါတယ်။

အလွတ်တန်းသတင်းထောက် ချစ်ခွန်းချို ပေးပို့ထားသော သတင်း ဖြစ်ပါသည်။