အာဆင်နယ်ပရိသတ်တွေဟာ ချဲလ်ဆီးတိုက်စစ်ကစားသမား ဟာဗက်ဇ်ကို မခေါ်ယူဖို့အတွက် အသင်းကို တောင်းဆိုနေကြပါတယ်။ ပိုလန်ကို ၁-၀ ဂိုးနဲ့ ဂျာမနီတို့ အရေးနိမ့်ခဲ့တဲ့ ခြေစမ်းပွဲမှာ ဟာဗက်ဇ်တစ်ယောက် ပါဝင်ကစားခဲ့ပြီး ဆိုးရွားတဲ့ကစားပုံကို ပြသခဲ့တယ်လို့ အာဆင်နယ် ပရိသတ်တွေက ယုံကြည်နေတာဖြစ်ပါတယ်။
ချဲလ်ဆီးဟာ လက်ရှိနွေရာသီ အပြောင်းအရွှေ့မှာ အသင်းက ကစားသမားအများအပြားကို ရှင်းထုတ်ပစ်ဖို့ ပြင်ဆင်ထားပြီး ဒီအထဲမှာ ဟာဗက်ဇ်လည်း အပါအဝင်ဖြစ်တယ်လို့ သတင်းတွေက ဆိုပါတယ်။ အဆိုပါ ဂျာမနီလက်ရွေးစင် ကစားသမားကို ခေါ်ယူဖို့အတွက် အာဆင်နယ်တို့ သတင်းထွက်နေပြီး ပရိသတ်တွေကတော့ ဟာဗက်ဇ်ရဲ့ ခြေစွမ်းကို စိုးရိမ်နေတာဖြစ်ပါတယ်။
အာဆင်နယ်နည်းပြ အာတီတာက ဟာဗက်ဇ်ကို ခေါ်ယူဖို့အတွက် စိတ်ဝင်စားနေပြီး အသင်းဘက်ကလည်း ချိတ်ဆက်မှုတွေရှိနေတယ်လို့ သိရှိရပါတယ်။ ဒါပေမယ့် အသက် (၂၄) နှစ်အရွယ် ဟာဗက်ဇ်ဟာ ပိုလန်နဲ့ခြေစမ်းပွဲမှာ ဂျာမနီတိုက်စစ်ကို ဦးဆောင်ခဲ့ပြီး ပွဲချိန်ပြည့် ပါဝင်ကစားခွင့်ရခဲ့သည့်တိုင် ဂိုးမသွင်းနိုင်ခဲ့ပါဘူး။
ပိုမိုဆိုးရွားတဲ့အချက်က ဟာဗက်ဇ်အနေနဲ့ သာမန်အနေအထားတွေမှာတောင် ဘောလုံးအထိန်းအသိမ်း မမှန်ကန်ခဲ့သလို အပိုင်အခွင့်အရေးကိုလည်း လွဲချော်ခဲ့ပါတယ်။ ဒါ့အပြင် ဟာဗက်ဇ်တစ်ယောက် ပွဲကို ဖြစ်ကတတ်ဆန်း ကစားခဲ့တယ်လို့လည်း ပရိသတ်အချို့က ယူဆနေပါတယ်။ အဲ့ဒါကြောင့်လည်း အာဆင်နယ်ပရိသတ်တွေက ဟာဗက်ဇ်ကို ခေါ်ယူမယ့်ကိစ္စအပေါ် ကန့်ကွက်နေတာပါ။
အာဆင်နယ်ပရိသတ်တွေက “ဒီကစားသမားကိုသာ အာတီတာ ခေါ်လိုက်ရင် သူက အလေးအနက်မထားတဲ့ နည်းပြတစ်ယောက်ပဲ” “အာတီတာရေ... ဟာဗက်ဇ်ကို မခေါ်ပါနဲ့ကွာ” လို့ မှတ်ချက်ပြု ပြောဆိုခဲ့ကြတာဖြစ်ပါတယ်။ ချဲလ်ဆီးဘက်ကတော့ ဟာဗက်ဇ်ကို ရောင်းချဖြစ်ခဲ့ရင်တောင် ပြည်တွင်းပြိုင်ဘက်အသင်းထံ ရောင်းချလိုခြင်းမရှိဘဲ ပြည်ပအသင်းတစ်သင်းကိုသာ ရောင်းချဖွယ်ရှိကြောင်းလည်း သတင်းတွေထွက်ပေါ်နေပါတယ်။