သဘာဝဘေးအန္တရာယ်ဆိုင်ရာစီမံခန့်ခွဲမှု ဥပဒေပုဒ်မ (၂၅)နဲ့ တရားစွဲခံထားရတဲ့ တရားဟောဆရာဒေးဗစ်လားနဲ့ နဝရတ်တေးသံသွင်းပိုင်ရှင် ဦးဝေထွန်းတို့ကို ဒုတိယအကြိမ်မြောက် တရားခွင်ကြားနာစစ်ဆေးမှုကို ဒီကနေ့ ဇွန်လ (၁၀)ရက်နေ့က မရမ်းကုန်းမြို့နယ်တရားရုံးမှာ ပြုလုပ်ခဲ့ပါတယ်။

“ ဒီနေ့ကတော့ လိုပြသက်သေ (၂)၊ ရပ်ကွက်ရာအိမ်မှူး (၂)ဦးနဲ့ အသင်းတော်က တစ်ဦး အားလုံး(၄)ဦးကိုစစ်ဆေးခဲ့တာပါ။ ဒါမယ့် လူစုလူဝေးနဲ့ ဟောပြောပွဲပြုလုပ်ခဲ့တယ်ဆိုတာကတော့ ဘယ်သူမှ မျက်မြင်သက်သေမရှိဘူး”လို့ ဒေးဗစ်လားနဲ့ ဦးဝေထွန်းတို့ရဲ့ ရှေ့နေ ဦးအောင်ကြည်ဝင်းက ရုံးချိန်းအပြီးမှာ မီဒီယာတွေကိုပြောခဲ့ပါတယ်။

တရားစွဲဆိုထားသလို လူစုလူဝေးနဲ့ ဟောပြောပွဲပြုလုပ်ခဲ့တဲ့ ဆိုတဲ့အချက်က တရားခွင်ရဲ့ ထွက်ဆိုချက်တွေမှာ ကွဲလွဲမှုတွေရှိနေပေမယ်လည်း တရားစွဲထားတဲ့ ပုဒ်မကိုတော့ ပြင်ဆင်ပြောင်းလဲလျှောက်ထားမှာမဟုတ်ဘူးလို့ ရှေ့နေ ဦးအောင်ကြည်ဝင်းကပြောပါတယ်။

ဒီနေ့တရားခွင်မှာတော့ စွပ်စွဲခံရသူဘက်ကနေ အသင်းတော်ဝန်းရဲ့ အဝင်ဝမှာရှိတဲ့ ခြံဝင်းမှာ COVID 19ရောဂါဖြစ်ပွါးနေတာကြောင့် အသင်းတော်ဝန်းအတွင်းမှာကျင်းပမယ့် ဓမ္မတရားဟောအစီအစဉ်ကို ပြောင်းရွေ့လိုက်ကြောင်း ကပ်ထားတဲ့ ဗီနိုင်းကြော်ညာဓာတ်ပုံတွေကို သက်သေအဖြစ်တင်သွင်းခဲ့တယ်လို့လည်းသိရပါတယ်။ ဒီအမှုမှာ တရားလိုပြသက်သေစုစုပေါင်း (၁၄)ဦးတင်ပြထားပြီး ဒီကနေ့မှာတော့ (၄)ဦးကို စစ်ဆေးခဲ့ပြီးဖြစ်ပါတယ်။