Schistosomiasis ရောဂါဆိုတာကတော့ ရေချိုနဲ့ တိုက်ရိုက်ထိတွေ့တဲ့ လူတွေရဲ့အရေပြားကို ထိုးဖောက်ဝင်ရောက်နိုင်တဲ့ ကပ်ပါးကောင်တစ်မျိုးက စတင်တဲ့ ရောဂါဖြစ်တယ်လို့ ပြည်သူ့ကျန်းမာရေးဦးစီးဌာနက ဆိုပါတယ်။



အထူးသဖြင့် လယ်ယာစိုက်ပျိုးရေး နဲ့ ရေလုပ်ငန်းလုပ်ကိုင်နေသူများ၊ ချောင်း၊ မြောင်းတွေမှာ ရေချိုးလေ့ရှိတဲ့ သူတွေကို ကူးဆက်နိုင်သလို ရောဂါပိုးရှိတဲ့သူရဲ့ဆီး၊ မစင်ကနေပြီးတော့လည်း ရေချိုခရုတွေရဲ့ ကိုယ်အတွင်းကို ထိုးဖောက်ဝင်ရောက်နိုင်ပါတယ်။ အဲ့ဒီခရုတွေက ပြန်ထုတ်တဲ့ ကပ်ပါးကနေလည်း လူတွေကို ပြန်ပြီး ကူးစေတယ်လို့ဆိုပါတယ်။



ရောဂါကူးစက်ခံရရင် တစ်ပတ် ကနေ ၁၂ ပတ်အတွင်း အရေ ပြားယားယံ အဖုအပိမ့်ထွက် ခြင်း၊ ဖျားခြင်း၊ ခေါင်းကိုက်ခြင်း၊ ဝမ်းပျက်ဝမ်းလျှောခြင်း၊ ချောင်း ဆိုးခြင်း၊ ကိုယ်လက်နာကျင်ကိုက် ခဲခြင်းကို ခံစားရပါတယ်။ ကူးစက်မှုပမာဏ များပြားရင်တော့ အစာအိမ် အူလမ်းကြောင်းနဲ့ အသည်းရောဂါတွေ ဆီးလမ်း ကြောင်းရောဂါတွေနဲ့ နှလုံး၊ အဆုတ်ရောဂါတွေ၊ ဦးနှောက်အာရုံကြောရောဂါတွေ ခံစားရမယ်လို့ ကျန်းမာရေးဦးစီးဌာနတာဝန်ရှိသူက ဆိုပါတယ်။



လောလောဆယ် ကမ္ဘာ့ကျန်းမာရေးအဖွဲ့ (WHO) ကနေ Praziquantel (၁၅၀၀၀)လုံး၊ ရောဂါစစ်ဆေးတဲ့ ဓာတ်ခွဲပစ္စည်းတွေဖြစ်တဲ့ Kato Kazt Kits (၃၂၀၀)ခု နဲ့ Urine Filtration Tests (၃၀၀)ခုကို ထောက်ပံ့ပေးထားပြီး လိုအပ်ရင် ဆက်လက်ထောက်ပံ့မှုတွေပြုလုပ်သွားမယ်လို့ WHO ကသိရပါတယ်။