မြောက်အိုင်ယာလန်နိုင်ငံ လန်ဒန်ဒါရီမြို့မှာ ဖြစ်ပွားခဲ့တဲ့ အကြမ်းဖက် ဆူပူအုံကြွမှုများအတွင်း အမျိုးသမီးဂျာနယ်လစ်တစ်ဦး သေနတ်ပစ်ခံရပြီး သေဆုံးခဲ့ကြောင်း ရဲတပ်ဖွဲ့က ယနေ့ (ဧပြီ ၁၉ ရက်) ပြောပါတယ်။
(အကြမ်းဖက် ဆူပူအုံကြွမှုအတွင်း မီးလောင်နေသည့် ကားတစ်စီး) (Photo: PA)
ကြာသပတေးနေ့ (ဧပြီ ၁၈ ရက်) ညပိုင်းမှာ ရဲတပ်ဖွဲ့က အဆိုပါမြို့ရဲ့ Creggan နယ်မြေမှာ ရှာဖွေမှုတွေ လုပ်ဆောင်ခဲ့ပြီးနောက် ဖြစ်ပေါ်ခဲ့တဲ့ အကြမ်းဖက် ဆူပူအုံကြွမှုအတွင်း ဂျာနယ်လစ်တစ်ဦးဖြစ်သူ အသက် ၂၉ နှစ်အရွယ် လိုင်ရာမက်ကီး (Lyra McKee) ပစ်ခတ်ခံရပြီး သေဆုံးခဲ့တာဖြစ်ပါတယ်။
လိုင်ရာ ပစ်ခတ်ခံရပြီး သေဆုံးရမှုဟာ အစိုးရဆန့်ကျင်ရေး ရီပတ်ဘလစ်ကင်တွေကြောင် ဖြစ်တယ်လို့ အာဏာပိုင်တွေက အပြစ်တင်ခဲ့ပါတယ်။ ဆူပူအုံကြွမှုများအတွင်း ရဲတပ်ဖွဲ့ရဲ့ Land Rover ကားတွေကို ဓာတ်ဆီဗုံးများဖြင့် ပစ်ခဲ့ကြတယ်လို့ဆိုပါတယ်။
(သေနတ်ပစ်ခံရပြီး သေဆုံးခဲ့သည့် ဂျာနယ်လစ် လိုင်ရာမက်ကီး) (Photo: AFP)
ယခုဖြစ်ရပ်ကို မြောက်အိုင်ယာလန် ရဲတပ်ဖွဲ့က အကြမ်းဖက်လုပ်ရပ်အဖြစ် ကိုင်တွင်ဆောင်ရွက်နေကြောင်း ပြောထားပါတယ်။ အမျိုးသမီးဂျာနယ်လစ် ပစ်ခတ်ခံရမှုဟာ အစိုးရဆန့်ကျင်ရေးအုပ်စု New IRA ရဲ့ လက်ချက်ဖြစ်နိုင်ဖွယ်ရှိပြီး စုံထောက်တွေကို လူသတ်မှုအဖြစ် စုံစမ်းထောက်လှမ်းမှုတွေ လုပ်ဆောင်နေပြီလို့ ရဲတပ်ဖွဲ့ ဒုတိယအကြီးအကဲ ကွန်စတေဘယ်မက်ခ်က ဆိုပါတယ်။
(အကြမ်းဖက် ဆူပူအုံကြွမှု မြင်ကွင်းတစ်ခု) (Photo: PA)
"မနေ့ကည ၁၁ နာရီလောက်မှာ သေနတ်သမားတစ်ယောက် တွေ့ခဲ့ရပြီး သူက ရဲတပ်ဖွဲ့ဝင်တွေကို ပစ်ခတ်ခဲ့တယ်၊ ဒီလို ပစ်ခတ်မှုကြောင့် အသက် ၂၉ နှစ်အရွယ် လိုင်ရာမက်ကီးဆိုတဲ့ အမျိုးသမီး ဒဏ်ရာရသွားတယ်၊ သူမကို ရဲတပ်ဖွဲ့ကားတစ်စီးနဲ့ Altnagelvin ဆေးရုံကို အမြန်ဆုံးပို့ခဲ့ပေမဲ့ ကံဆိုးစွာနဲ့ပဲ သေဆုံးသွားခဲ့ပါတယ်" လို့ ကွန်စတေဘယ်က ပြောခဲ့ကြောင်း BBC သတင်းမှာ ဖော်ပြပါတယ်။
ထပ်မံသိရှိရတဲ့ သတင်းတွေအရ ဂျာနယ်လစ်လိုင်ရာမက်ကီးကို သေနတ်ဖြင့်ပစ်ခတ်ခဲ့တယ်လို့ သံသယရှိရသူကို ဗီဒီယိုမှတ်တမ်းတစ်ခုမှာ မြင်တွေ့ခဲ့ရတယ်လို့ ဆိုပါတယ်။ ဂျာနယ်လစ်အမျိုးသမီး ပစ်သတ်ခံရမှုနဲ့ ဆက်နွယ်နေတဲ့ အသက် ၁၈ နှစ်နဲ့ ၁၉ နှစ်အရွယ် အမျိုးသားနှစ်ဦးကိုလည်း ဖမ်းဆီးထားကြောင်း သိရပါတယ်။