ဂွါဒီယိုလာ စိတ်ပျက်လက်ပျက်ဖြစ်တာကို ရယ်မောနေခဲ့တဲ့ ရွိုင်းဟော့ဒ်ဆန်

ဒီပွဲမှာ မန်စီးတီးက ဂရီလစ်ရှ်၊ လီဝစ်တို့ရဲ့ ဂိုးတွေနဲ့အတူ နှစ်ဂိုးပြတ်နဲ့ ဦးဆောင်နိုင်ခဲ့တာပါ။ ဒါပေမယ့် ခရစ္စတယ်ပဲလေ့စ်အတွက် မာတေတာ၊ အိုလိုက်စ်တို့က ချေပဂိုးတွေ ပြန်လည်သွင်းယူပေးခဲ့တာကြောင့် မန်စီးတီးတို့ အိမ်ကွင်းမှာ သရေတစ်မှတ်နဲ့ ကျေနပ်ခဲ့ရတာဖြစ်ပါတယ်။

မန်စီးတီးအတွက်ကတော့ ပရီးမီးယားလိဂ် နောက်ဆုံး (၅) ပွဲမှာ (၄) ပွဲအထိ နိုင်ပွဲပျောက်ခဲ့တာဖြစ်ပြီး လူတန်တောင်းကိုသာ နောက်ကလိုက်ကစားရင်း အနိုင်ရရှိခဲ့တာပါ။ မနေ့ညကလည်း ၂-၁ ဂိုးနဲ့ ဦးဆောင်ထားချိန်မှာ ပင်နယ်တီပေးခဲ့ရပြီး ဒီပင်နယ်တီကို အိုလိုက်စ်က အမှားအယွင်းမရှိ ကန်သွင်းယူခဲ့ပါတယ်။

ပင်နယ်တီဝင်သွားချိန်မှာ ဂွါဒီယိုလာတစ်ယောက် စိတ်ပျက်လက်ပျက်နဲ့ သူ့ခေါင်းကိုကိုင်ကာ ကြေကွဲနေခဲ့ပြီး ဒီဖြစ်ရပ်ကို ရွိုင်းဟော့ဒ်ဆန်က ရယ်မောရင်း ကြည့်ရှုနေခဲ့တာပါ။ ဒီပုံရိပ်က ပရိသတ်တွေအကြားမှာ တော်တော်လေး ရေပန်းစားနေခဲ့ပြီး မန်စီးတီးနဲ့ ဂွါဒီယိုလာအတွက်ကတော့ စိတ်ပျက်စရာဖြစ်ခဲ့ပါတယ်။

မန်စီးတီးဟာ ပြီးခဲ့တဲ့ရာသီက ဆုဖလားသုံးလုံး ဆွတ်ခူးခဲ့တဲ့ အသင်းဖြစ်ပြီး ဒီရာသီမှာလည်း ပရီးမီးယားလိဂ်ချန်ပီယံဆုကို (၄) နှစ်ဆက်အဖြစ် ရယူဖို့ ပစ်မှတ်ထားနေတာပါ။ အခု ခရစ္စတယ်ပဲလေ့စ်နဲ့ပွဲအပြီးမှာတော့ မန်စီးတီးတို့ ကလပ်ကမ္ဘာ့ဖလားပွဲစဉ်တွေ ကစားဖို့ ခရီးထွက်ခွာရတော့မှာလည်း ဖြစ်ပါတယ်။