COVID-19 ရောဂါကာကွယ်ထိန်းချုပ်ရေးအတွက် လှိုင်သာယာမြို့နယ်မှာနေထိုင်တဲ့ လူဦးရေ တစ်သိန်းခွဲခန့်ကို မေလ ၁၆ ရက်နေ့မှာ ကျန်းမာရေးစစ်တမ်းကောက်ယူသွားမယ်လို့သိရပါတယ်။

“ တစ်ဖွဲ့ကို လူ လေးငါယောက်ပါဝင်တဲ့ အဖွဲ့ပေါင်း ၄၅၀ က လှိုင်သာယာမြို့နယ်အတွင်းက အိမ်တွေကို တစ်အိမ်တက်ဆင်း ကိုယ်အပူချိန်တိုင်းတာတွေ လုပ်မယ်။ ကျန်းမာရေးစစ်တမ်းတွေကောက်ယူမယ်။ ကျွန်တော်တို့ကတော့ လူဦးရေ ၁ သိန်းခွဲလောက်ကို စစ်တမ်းကောက်နိုင်ဖို့ ခန့်မှန်းထားပါတယ်။ ဒါပေမယ့် အခြေအနေအရ လူ တစ်သိန်းကျော်လောက်ပဲ စစ်နိုင်ရင် စစ်မယ်” လို့ လှိုင်သာယာမြို့နယ် လွှတ်တော်ကိုယ်စားလှယ် ဦးမြတ်မင်းသူက Duwun ကိုပြောပါတယ်။

အဆိုပါ ကျန်းမာရေးစစ်တမ်းကောက်ယူရာမှာ COVID-19 သံသယလက္ခဏာ၊ ဖျားနာလက္ခဏာတွေ ရှိလာခဲ့ရင် ကွာရန်တင်းစင်တာနဲ့ ဆေးရုံတွေကို တစ်ပါတည်းပို့ဆောင်နိုင်အောင် စီစဉ်ထားတယ်လို့လည်းသိရပါတယ်။

မြန်မာနိုင်ငံမှာ ရောဂါကူးစက်မှု အများဆုံးဖြစ်ပွားနေတဲ့အင်းစိန်မြို့နယ်မှာတော့ ပြီးခဲ့တဲ့ မေလ (၆) ရက်နေ့က ရပ်ကွက်လေးခုမှာ လူငါးသောင်းနီးပါးကို ကျန်းမာရေးစစ်တမ်းကောက်ယူခဲ့ပါတယ်။

ကျန်းမာရေးစစ်တမ်းကောက်ယူမှုအရ COVID-19 သံသယလက္ခဏာတွေ တွေ့ရှိခဲ့လို့ (၃) ဦးကို အင်းစိန် ဆေးရုံ၊ (၁၆) ဦးကို ကွာရန်တင်းစင်တာ ပို့ဆောင်ခဲ့ပြီးနောက် ဓာတ်ခွဲနမူနာရယူစစ်ဆေးခဲ့ရာမှာတော့ ပိုးမတွေ့ရှိခဲ့ဘူးလို့လည်းသိရပါတယ်။

ပိုးတွေ့လူနာ ၁၈၁ ဦးထဲမှာတော့ Negative နှစ်ကြိမ်ပြလို့ ရောဂါပိုးကင်းစင်သူ ၇၉ ဦးနဲ့ သေဆုံးသူ ၆ ဦးရှိနေပါတယ်။