ယနေ့နံနက် ၂ နာရီအချိန်မှာ ယှဉ်ပြိုင်ကစားခဲ့တဲ့ ချယ်ဆီးအသင်းနဲ့ မန်ချက်စတာယူနိုက်တက်အသင်းတို့ရဲ့ပွဲစဉ်မှာ မန်ချက်စတာယူနိုက်တက်အသင်းက ၂ ဂိုး ဂိုးမရှိနဲ့ အနိုင်ရရှိသွားခဲ့ပါတယ်။ ပြီးခဲ့တဲ့ ၂၀၁၇-၂၀၁၈ ရာသီက ချယ်ဆီးအသင်းဟာ မန်ချက်စတာယူနိုက်တက်အသင်းကို ဝင်ဘလေကွင်းမှာ ၁ ဂိုး ဂိုးမရှိနဲ့ အနိုင်ရရှိခဲ့ပြီး အက်ဖ်အေဖလားကို ဆွတ်ခူးနိုင်ခဲ့တာဖြစ်ပါတယ်။
ပထမပိုင်းစတင်ချိန်ကတည်းက တစ်ဖက်နဲ့တစ်ဖက်အကြိတ်အနယ်ရှိခဲ့ကြပြီး အပြန်အလှန် ဂိုးသွင်းယူဖို့ ကြိုးပမ်းခဲ့ကြပါတယ်။ ၃၁ မိနစ်မှာ ပေါ့ဂ်ဘာရဲ့ ဖြတ်တင်ပေးပို့မှုကို ဟာရဲရားက ခေါင်းတိုက်သွင်းယူပြီး မန်ချက်စတာယူနိုက်တက်အသင်းက အဖွင့်ဂိုး ရရှိသွားခဲ့ပါတယ်။
ချယ်ဆီးအသင်းဟာ ချေပဂိုး ရရှိဖို့ ကြိုးပမ်းခဲ့ပေမယ့် မန်ချက်စတာယူနိုက်တက်အသင်း နောက်တန်းကို ကျော်ဖြတ်နိုင်ခြင်းမရှိခဲ့ဘဲ ၄၅ မိနစ်မှာ ရက်ရှ်ဖို့ဒ်ရဲ့ ဖြတ်တင်ပေးပို့မှုကို ပေါ့ဂ်ဘာက ပြေးဝင်ခေါင်းတိုက်သွင်းယူပြီး ဒုတိယမြောက်ဦးဆောင်ဂိုး ရရှိခဲ့ပါတယ်။
ဒုတိယပိုင်းမှာ ချယ်ဆီးအသင်းဟာ လူစားလဲလှယ်မှုတွေ ပြုလုပ်ပြီး ကစားအားမြှင့်တင်ဖို့ ကြိုးပမ်းခဲ့ပေမယ့် ထိရောက်တဲ့ တိုက်စစ်ဆင်မှုမျိုး မပြုလုပ်နိုင်ခဲ့ပါဘူး။
မန်ချက်စတာယူနိုက်တက်အသင်းကလည်း ခြေစွမ်းမပြနိုင်တဲ့ လူကာကူနေရာမှာ ဆန်းချက်ဇ်ကို ထည့်သွင်းကစားစေခဲ့ပြီး ကစားအားကျလာတဲ့ မာတာရဲ့နေရာမှာ ပါရဲရားကို ထည့်သွင်းကစားစေခဲ့ပါတယ်။ မန်ချက်စတာယူနိုက်တက်အသင်းဟာ ယနေ့ပွဲစဉ်မှာ အနိုင်ရရှိခဲ့တဲ့အတွက် အက်ဖ်အေဖလား ကွာတားဖိုင်နယ်အဆင့်ကို တက်ရောက်နိုင်ခဲ့ပြီဖြစ်ပါတယ်။