အင်တာမီလန်တိုက်စစ်မှူး မားကပ်စ်သူရမ်ဟာ မနေ့ညက ကစားခဲ့တဲ့ အက်သလက်တီကိုနဲ့ ချန်ပီယံလိဂ် ရှုံးထွက် (၁၆) သင်းအဆင့် ဒုတိယအကျော့မှာ ပြိုင်ဘက်နောက်ခံလူ ဆာဗစ်ရဲ့ မတော်ရာနေရာကို လက်နဲ့ညှစ်ခဲ့ပါတယ်။ ဒါကို ရုပ်သံမှတ်တမ်းတွေကလည်း ရှင်းရှင်းလင်းလင်း ဖော်ပြခဲ့ပါတယ်။
နောက်ကနေ လူကပ်ဖို့ ကြိုးစားလာတဲ့ ဆာဗစ်ရဲ့ ငယ်ပါကို သူရမ်က လက်နဲ့ညှစ်ခဲ့တာဖြစ်ပြီး ဆာဗစ်ကတော့ ဒီဖြစ်ရပ်ကြောင့် လဲကျသွားခဲ့ပါတယ်။ ဒီဖြစ်ရပ်အတွက် VAR ပြန်ကြည့်ခဲ့သေးပေမယ့် သူရမ်ကတော့ ကံကောင်းထောက်မစွာနဲ့ပဲ အနီကတ်ပြစ်ဒဏ်ကနေ လွတ်မြောက်သွားခဲ့ပါတယ်။
အဲ့ဒီနောက်မှာ သူရမ်ကို အင်တာမီလန်တို့ လူစားလဲခဲ့ရပြီး ဒီဖြစ်ရပ်အတွက်လည်း ဆိုရှယ်မီဒီယာပေါ်မှာ အမျိုးမျိုး ဝေဖန်နေကြပါတယ်။ သူရမ်နဲ့ ဆာဗစ်တို့အကြားမှာတော့ ဘယ်လိုတင်းမာမှုမျိုးမှမရှိခဲ့ဘဲ ဒီဖြစ်ရပ်ပြီးသွားတဲ့နောက် ပြုံးပျော်စွာနဲ့ ပွေ့ဖက်နှုတ်ဆက်နေကြတာကိုလည်း မြင်တွေ့ခဲ့ရပါတယ်။
ပရိသတ်တွေကတော့ “သူရမ်က ဘောမှားပြီး အာရုံစိုက်နေပါပြီ” “သူရမ်အတွက်တော့ ဒီပွဲမှာ ပထမဆုံး ထိန်းချုပ်နိုင်ခဲ့တဲ့ ဘောပါပဲ” လို့ နောက်ပြောင်နေခဲ့ကြသလို သူ့ရဲ့လုပ်ရပ်ကို အနီကတ်မပြခဲ့တဲ့အပေါ်မှာလည်း ပရိသတ်တွေက ဝေဖန်ပြစ်တင်နေကြပါတယ်။
ဒီပွဲမှာတော့ အက်သလက်တီကိုက သာမန်ပွဲချိန်အတွင်း ၂-၁ ဂိုးနဲ့ အနိုင်ရရှိခဲ့ပြီး ပင်နယ်တီအဆုံအဖြတ်မှာပါ ၃-၂ ဂိုးနဲ့ အနိုင်ရရှိခဲ့တာကြောင့် ချန်ပီယံလိဂ် ကွာတားဖိုင်နယ်အဆင့်ကို တက်ရောက်သွားနိုင်ခဲ့ပါတယ်။