မလေးရှားဝန်ကြီးချုပ်ဟောင်း နဂျစ်ရာဇက်ခ်ရဲ့ အမှုကို လာမယ့်နှစ် ဖေဖေါ်ဝါရီ ၁၂ ရက်မှာ စတင်ကြားနာ စစ်ဆေးသွားမယ်လို့ သိရပါတယ်။ နဂျစ်ဟာ ယုံကြည်မှုချိုးဖောက်တဲ့ ရာဇဝတ်မှု၊ အာဏာအလွဲသုံးစားပြုမှုနဲ့ ငွေကြေးခဝါချမှုတို့ဖြင့် စွဲချက်တင်ထားပါတယ်။

(မလေးရှားဝန်ကြီးချုပ်ဟောင်းနဂျစ်) (Photo: AFP)

နဂျစ်ရဲ့အမှုကို တရားရုံး ကြားနာစစ်ဆေးရာမှာ သက်သေ ၅၀ ဝန်းကျင်ကို ဆင့်ခေါ်သွားရန် မျှော်လင့်ထားကြောင်း အစိုးရရှေ့နေတွေက ပြောခဲ့ပါတယ်။ ၎င်းရဲ့အမှုကိစ္စကို တရားစီရင်ခြင်းမပြုမီ မီဒီယာတွေမှာ ဖော်ပြခြင်းမပြုရေး တားမြစ်ပိတ်ပင်ပေးရန် နဂျစ်ရဲ့ လျှောက်ထားမှုကိုလည်း တရားရုံးချုပ်က ပယ်ချလိုက်တယ်လို့ သိရပါတယ်။

(နဂျစ်နဲ့ဆက်နွယ်တဲ့ ကွန်ဒိုတိုက်ခန်းမှ သိမ်းဆည်းခဲ့သည့် သေတ္တာများ) (Photo: AP)

မလေးရှားဝန်ကြီးချုပ်ဟောင်း နဂျစ်ကို ယခုသီတင်းပတ်အတွင်း သြဂုတ် ၈ ရက်မှာ ငွေကြေးခဝါချမှုသုံးခုဖြင့် နောက်ထပ် စွဲချက်တင်လိုက်ပါတယ်။ အသက် ၆၅ နှစ်အရွယ် နဂျစ်ကို ပြီးခဲ့တဲ့ ဇူလိုင်လ အစောပိုင်းမှာလည်း ယုံကြည်မှုဖောက်ဖျက်တဲ့ ရာဇဝတ်မှုသုံးခုနဲ့ အာဏာအလွဲသုံးစားပြုမှုတို့ဖြင့် စွဲချက်တင်ထားခဲ့ပါတယ်။ နဂျစ်ကတော့ ၎င်းကို စွဲချက်တင်ထားမှုတွေအတွက် အပြစ်မရှိကြောင်း ပြောထားပါတယ်။ ဝန်ကြီးချုပ်ဟောင်းနဂျစ်ကို စွဲချက်တင်ထားတဲ့ ငွေကြေးခဝါချမှုတွေဟာ ထောင်ဒဏ် ၁၅ နှစ်အထိနဲ့ တရားမဝင် ငွေလွှဲပြောင်းမှုတစ်ခုအတွက် မလေးရှားရင်းဂစ်ငွေ ၅ သန်း ဒဏ်ငွေချမှတ်နိုင်တယ်လို့ ဆိုပါတယ်။

(နဂျစ်နဲ့ဆက်နွယ်တဲ့ နေရာများမှ သိမ်းဆည်းခဲ့သည့် လက်ဝတ်ရတနာများ) (Photo: CNA)

ဝန်ကြီးချုပ်အဖြစ် တာဝန်ယူခဲ့စဉ်က နဂျစ် တည်ထောင်ခဲ့တဲ့ 1MDB ဘဏ္ဍာငွေ အမေရိကန်ဒေါ်လာ ဘီလီယံနဲ့ချီပြီး ပျောက်ဆုံးနေမှုကိုလည်း စင်ကာပူ၊ အမေရိကန်နဲ့ ဆစ်ဇွာလန် အပါအဝင် အနည်းဆုံး နိုင်ငံခြောက်ခုမှာ စုံစမ်းစစ်ဆေးနေပါတယ်။

(မလေးရှားဝန်ကြီးချုပ် မဟာသီယာ) (Photo: CNA)

1MDB အရှုပ်အထွေးနဲ့ ပတ်သက်ပြီး စုံစမ်းစစ်ဆေးမှုအရ နဂျစ်ရဲ့နေအိမ်နဲ့ ၎င်းနဲ့ဆက်နွယ်နေတဲ့ နေရာတွေကို ရဲတပ်ဖွဲ့က စီးနင်းရှာဖွေခဲ့ပြီး ငွေများနဲ့ အဖိုးတန်ပစ္စည်းတွေကို သိမ်းဆည်းခဲ့ပါတယ်။

သိမ်းဆည်းခဲ့တဲ့ ငွေနဲ့အဖိုးတန်ပစ္စည်းများရဲ့ တန်ဖိုးဟာ အမေရိကန်ဒေါ်လာ ၂၇၃ သန်းရှိကြောင်း မလေးရှားရဲတပ်ဖွဲ့က ပြောပါတယ်။ နဂျစ်ဟာ မေလ ၉ ရက် မလေးရှား အထွေထွေရွေးကောက်ပွဲမှာ တစ်ချိန်က ၎င်းရဲ့ဆရာဖြစ်ခဲ့သူနဲ့ ယခုရွေးကောက်ပွဲမှာ ပြိုင်ဘက်ဖြစ်လာသူ မဟာသီယာ မိုဟာမက်ကို ရှုံးနိမ့်ခဲ့ပြီး အာဏာလက်လွှတ်ခဲ့ရပါတယ်။