(၂၀၂၁) ခုနှစ် မတ်လမတိုင်မီမှာ ကျန်းမာရေးဝန်ထမ်းတွေနဲ့ ရှေ့တန်းမရှိမဖြစ်လုပ်သားတွေ ကိုဗစ်-၁၉ ကာကွယ်ဆေးရရှိနိုင်မယ့် အခြေအနေတွေနဲ့ ပတ်သက်ပြီး မြန်မာ-အိန္ဒိယ နှစ်နိုင်ငံဆွေးနွေးနေကြတယ်လို့ နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။

အဆိုပါ ဆွေးနွေးပွဲမှာ အိန္ဒိယအစိုးရထံကနေ နှစ်နိုင်ငံအစိုးရချင်း (G-to-G)အစီအစဉ် အရ လာမယ့်နှစ် မတ်လမတိုင်မီ ကျန်းမာရေးလုပ်သားတွေနဲ့ ရှေ့တန်းလုပ်သားတွေ ကိုဗစ်ကာကွယ်ဆေးရရှိနိုင်တဲ့အခြေအနေ၊ မြန်မာနိုင်ငံ ကျန်းမာရေးနှင့်အားကစားဝန်ကြီးဌာနက အိန္ဒိယ ဆေးကုမ္ပဏီ Serum Institute တို့အကြား နားလည်မှုစာချွန်လွှာနဲ့အညီ ဝယ်ယူထားတဲ့ ကာကွယ်ဆေးပမာဏကို သတ်မှတ်ထားတဲ့ အချိန်မှာ ရရှိနိုင်မှု တွေကို ဆွေးနွေးခဲ့ကြတာလို့ နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။ 

ဒါ့အပြင် အိန္ဒိယမှာ ထုတ်လုပ်တဲ့ စံချိန်စံညွှန်းမီ ဈေးနှုန်း ချိုသာတဲ့ RT-PCR test machine တွေ ဝယ်ယူနိုင်မှု အခြေအနေတို့နဲ့ ပတ်သက်လို့ ညှိနှိုင်းဆွေးနွေးခဲ့ကြတာပါ။

ကျန်းမာရေးဝန်ထမ်းတွေကို ဦးစားပေးပြီးနောက်မှာမှ နိုင်ငံအတွက်၊ပြည်သူအတွက် လိုအပ်ချက် လုပ်ဆောင်သွားမယ်လို့လည်း ဒေါ်အောင်ဆန်းစုကြည်က သတိပေးပြောကြားခဲ့ပါတယ်။ လက်ရှိမှာ ကာကွယ်ဆေးဝယ်ယူဖို့ မြန်မာကိုယ်စားလှယ်အဖွဲ့က အိန္ဒိယနိုင်ငံကို ရောက်ရှိနေတာဖြစ်ပြီး မကြာခင်ကာလမှာ ကာကွယ်ဆေးထိုးတဲ့အစီအစဉ်တွေ စတင်တော့မယ်လို့လည်း အတိုင်ပင်ခံပုဂ္ဂိုလ်က ပြောကြားထားခဲ့တာပါ။