‘’နှစ်ပတ်အလို’’ ရုပ်ရှင်ဇာတ်ကားထဲက ‘’သီဟလတ်’’ ဆိုတဲ့ ဇာတ်ကောင်အတွက် ကျော်ကျော်ဗိုက ရင်ခုန်နေရပြီလို့ ဆိုပါတယ်။ ဒီဇာတ်ကားကိုတော့ ၂၀၁၅ ခုနှစ်အတွင်းမှာ ရိုက်ကူးခဲ့တာဖြစ်ပါတယ်။

ကျော်ကျော်ဗိုက ၂၀၁၉ ခုနှစ်ထဲမှာ သူကိုယ်တိုင် ရင်ခုန်ရမယ့် ရုပ်ရှင်ဇာတ်ကားကြီးထဲက ကာရိုက်တာအကြောင်း ပြောပြလာပါတယ်။ ဒီဇာတ်ကားကို ပရိသတ်တွေ မကြာခင် ကြည့်ရတော့မယ်လို့လည်း သူကဆိုပါတယ်။

‘’2019 အတွက်ကျွန်တော်ကိုယ်တိုင်ရင်ခုန်ရတဲ့ ဇာတ်ကောင်တွေထဲကတစ်ယောက်။ မကြာမှီပရိတ်သတ်များ ရှေ့တော်ပါးသို့ရောက်လာပါတော့မည်။ မိဘများ၏ အထည်ချုပ်လုုပ်ငန်းကိုု ဦးစီးနေသူ၊ ပညာတတ်ပီပီ၊ အလုပ်တစ်ခုုကိုု တွေးတောဆင်ခြင်ပြီး လုုပ်ကိုုင်တတ်သူ ၊ ဘယ်လိုုပြဿနာမျိုးကိုုမဆိုု အကောင်းဆုံးတာဝန်ယူ ဖြေရှင်းနိုုင်ပြီး၊ ခေါင်းဆောင်ကောင်းစိတ်ဓာတ်ရှိသူ သူ့နာမည်က သီဟလတ်’’ ဆိုပြီးတော့ ဧပြီလ ၂၁ ရက်နေ့ ညနေ ၄ နာရီကျော်က သူ့ရဲ့ ဖေ့စ်ဘွတ်မှာရေးသားခဲ့တာဖြစ်ပါတယ်။

‘’နှစ်ပတ်အလို’’ ရုပ်ရှင်ဇာတ်ကားကြီးဟာ ဒါရိုက်တာ မောင်မျိုးမင်း (ရင်တွင်းဖြစ်) က သူကိုယ်တိုင် ရေးသားထားတဲ့ ဝတ္ထုကို ပုံဖော်ရိုက်ကူးထားတာပါ။ ‘’နှစ်ပတ်အလို’’ ရုပ်ရှင်ဇာတ်ကားကို ၂၀၁၅ ခုနှစ် ဒီဇင်ဘာလ ၂၃ ရက်နေ့မှာ စတင်ရိုက်ကူးခဲ့တာပါ။ ဒီဇာတ်ကားကို ရန်ကုန်နဲ့ သြစတေးလျနိုင်ငံတို့မှာ သွားရောက်ရိုက်ကူးခဲ့တယ်လို့လည်း သိရပါတယ်။

Photo: Film House

ဒီဇာတ်ကားထဲမှာ ကျော်ကျော်ဗိုရဲ့ ကာရိုက်တာနာမည်က သီဟလတ်၊ မင်းဦးရဲ့ ကာရိုက်တာနာမည်က သြရသ ၊ အေးမြတ်သူရဲ့ ကာရိုက်တာ နာမည်က ရတီချမ်း ၊ ဝတ်မှုံရွှေရည်ရဲ့ ကာရိုက်တာနာမည်က အလှဆုံးတို့ ဖြစ်ပါတယ်။ ဒီဇာတ်ကားမှာ ပြေတီဦး၊ ရဲအောင်၊ မျိုးသန္တာထွန်းနဲ့ ချိုပြုံးတို့ကလည်း အဓိက ပါဝင်သရုပ်ဆောင်ထားကြပါသေးတယ်။

Photo: Kyaw Kyaw Bo

ေကျာ်ကျော်ဗိုဟာ နိုင်ငံကျော်ရွှေမန်းဦးတင်မောင်၊ဝါရင့်သရုပ်ဆောင်ကြီး ဦးညွှန့်ဝင်း တို့ရဲ့ အနုပညာမျိုးစက်တွေထဲက တစ်ဦးဖြစ်ပါတယ်။ ကျော်ကျော်ဗိုရဲ့ အနုပညာသက်တမ်းကလည်း အနှစ် ၂၀ ကျော်သက်တမ်းကို ရောက်ရှိနေပြီဖြစ်ပါတယ်။ သူဟာ သရုပ်ဆောင်ဘက်မှာသာမက ဇာတ်သဘင်ဘက်မှာလည်း အနုပညာလှုပ်ရှားမှုတွေရှိခဲ့ပါသေးတယ်။ သူဟာ မကြာသေးခင်က ၂၀၁၈ ခုနှစ်အတွက် အကောင်းဆုံးအမျိုးသားဇာတ်ပို့ဆုကို ‘’ မုန်းစွဲ’’ရုပ်ရှင်ဇာတ်ကားနဲ့ ရရှိခဲ့တာဖြစ်ပါတယ်။