ကိုဗစ်ကပ်ရောဂါအလွန်မှာ လူတယောက်ချင်းစီတိုင်းက ကျန်းမာရေးအတွက် နေ့စဥ်လေ့ကျင့်ခန်းတွေ ပြုလုပ်ဖို့ လိုအပ်လာတာကို သတိထားမိလာကြပါတယ်။ ဒါပေမယ့် တယောက်နဲ့တယောက်အချိန်ပေးနိုင်တာချင်း မတူတာကြောင့်လည်း တနိုင်တပိုင်လေ့ကျင့်ခန်းအမျိုးအစားတွေကိုသာ ရွေးချယ်ပြုလုပ်နိုင်ကြပါတယ်။
ဒီလိုမျိုး လေ့ကျင့်ခန်းလုပ်တဲ့အခါမှာ ခန္ဓာကိုယ်တခုလုံးကို လွှမ်းခြုံပြီး ကောင်းကျိုးတွေဖြစ်စေနိုင်တဲ့ Plank ထောက်တဲ့လေ့ကျင့်ခန်းကို မဖြစ်မနေ ပြုလုပ်ဖို့ အကြံပေးချင်ပါတယ်။
Photo: Runtastic
Plank ထောက်တယ်ဆိုတာက သင့်ခန္ဓာကိုယ်ကို မြေပြင်နဲ့တတန်းတည်းရှိစေပြီး တံတောင်ဆစ်နှစ်ဖက် ဒါမှမဟုတ် လက်နှစ်ဖက်နဲ့ မြေပြင်ကို ထောက်ကန်ထားရတဲ့ လေ့ကျင့်ခန်းမျိုးပါ။ ဒီလိုမျိုး Plank ထောက်တဲ့လေ့ကျင့်ခန်းက ယောဂသင်တန်းတွေမှာ မဖြစ်မနေ အရေးပါတဲ့ လေ့ကျင့်ခန်းအဖြစ်ရှိနေပါတယ်။ အကြောင်းရင်းကတော့ အခုဖော်ပြပေးသွားမယ့် ကျန်းမာရေးဆိုင်ရာကောင်းကျိုးတွေကြောင့်ပဲဖြစ်ပါတယ်။
၁။ ကိုယ်နေဟန်ထားတိုးတက်စေခြင်း။
Plank ထောက်တာဟာ သင့်ခန္ဓာကိုယ်ရဲ့ အနေအထားတွေကို ချိန်ညှိပေးနိုင်တဲ့ လေ့ကျင့်ခန်းတခုလည်းဖြစ်ပါတယ်။ အထူးသဖြင့် သင့်နောက်ကျော၊ ရင်ဘတ်၊ ပခုံး၊ ဗိုက်သားနဲ့ လည်ပင်းတို့ကို တတန်းတည်းရှိစေပြီး ဒီအရာတွေကို ပိုမိုသန်စွမ်းလာအောင် အထောက်အကူဖြစ်စေပါတယ်။ အကျိုးဆက်အနေနဲ့ သင့်ရဲ့ကိုယ်နေဟန်ထားက ကြည့်ပျော်ရှုပျော် အနေအထားတရပ်ကို သေချာပေါက် ရောက်ရှိလာပါလိမ့်မယ်။
Photo: Real Simple
၂။ လှုပ်ရှားရ ပိုမိုလွယ်ကူစေခြင်း။
Plank ထောက်ခြင်းကြောင့် သင့်ရဲ့ပခုံး၊ ညှပ်ရိုးနဲ့ အခြားသောကြွက်သားတွေကို လှုပ်ရှားရ ပိုမိုလွယ်ကူစေပြီး ကျန်းမာသန်စွမ်းစေပါတယ်။ အပိုဆုတခုအနေနဲ့ Side Plank ကို နေ့စဥ် အချိန်တခုသတ်မှတ်ပြီး ကြိုးစားလုပ်ဆောင်ပေးခြင်းကလည်း သင့်ခန္ဓာကိုယ်တခုလုံးကို လှုပ်ရှားရပိုမိုအဆင်ပြေစေမှာပါ။
Photo: Women's Health
၃။ ဗိုက်အဆီတွေကို လျှော့ချပေးခြင်း။
ဗိုက်အဆီချတာက ဝိတ်လျှော့လေ့ကျင့်ခန်းတွေမှာ အခက်ခဲဆုံး အရာတခုဖြစ်ပါတယ်။ ဒါပေမယ့် Plank ထောက်ခြင်းက ဗိုက်မှာရှိတဲ့အဆီတွေကို သိသိသာသာ လျှော့ချပေးနိုင်ပြီး ဗိုက်လေ့ကျင့်ခန်းတွေအတွက်လည်း မရှိမဖြစ် အရေးပါတဲ့ လေ့ကျင့်ခန်းတမျိုးပါ။ ခန္ဓာကိုယ်အတွင်း ဇီဝဖြစ်စဥ်တွေကို တိုးတက်စေပြီး အချိန်ကြာကြာ Plank ထောက်နိုင်လေ၊ ကောင်းမွန်တဲ့ ဗိုက်ကြွက်သားကိုပိုင်ဆိုင်နိုင်လေပဲဖြစ်ပါတယ်။
Photo: Marca
၄။ ခန္ဓာကိုယ်ရဲ့အူတိုင်ကို ကျန်းမာသန်စွမ်းစေခြင်း။
အရပ်စကားအနေနဲ့ပြောရရင် ခန္ဓာကိုယ်ရဲ့အူတိုင်ကို ဝမ်းဗိုက်လို့သာ သတ်မှတ်ပြီး ခေါ်ဝေါ်လေ့ရှိပါတယ်။ ဒီလိုမျိုး Plank ထောက်တာက အစာအိမ်မှာရှိတဲ့ ကြွက်သားအုပ်စု (၄) ခုကို ကျန်းမာသန်စွမ်းစေပြီး အကျိုးဆက်အနေနဲ့ ခန္ဓာကိုယ်ရဲ့အူတိုင်ကိုလည်း ကျန်းမာသန်စွမ်းစေပါတယ်။
၅။ အရိုးအဆစ်နဲ့နောက်ကျောနာကျင်ခြင်းကို လျှော့ချပေးနိုင်ခြင်း။
ဗိုက်မှာရှိတဲ့ကြွက်သားတွေ သန်မာလာတာနဲ့အမျှ ခန္ဓာကိုယ်က ဒီအပေါ်မှာပဲ ပိုမိုမှီခိုလာပြီး နောက်ကျောကြွက်သားတွေကို ဖိအားနည်းစေပါတယ်။ ဒါ့အပြင် Plank ထောက်ချိန်မှာ သင့်ကျောရိုးက ဖြောင့်တန်းတဲ့အနေအထားမှာရှိနေတာကြောင့် အရိုးအဆစ်နာကျင်မှုတွေကို လျော့ကျစေဖို့ သေချာပေါက်ကူညီပေးပါလိမ့်မယ်။
Photo: The Times
၆။ တခြားလေ့ကျင့်ခန်းတွေထက် ဇီဝဖြစ်ပျက်မှုကို ပိုမိုတိုးတက်စေခြင်း။
Plank ထောက်ခြင်းရဲ့ အဓိကအရေးပါတဲ့အကျိုးကျေးဇူးတခုက ခန္ဓာကိုယ်တွင်း ဇီဝဖြစ်ပျက်မှုကို ပိုမိုတိုးတက်စေတာပဲဖြစ်ပါတယ်။ ရိုးရှင်းတဲ့လေ့ကျင့်ခန်းတခုဖြစ်သည့်တိုင် ဒီလေ့ကျင့်ခန်းက ခန္ဓာကိုယ်တခုလုံးကို အကျိုးသက်ရောက်ရှိနေရတာက ဒီအကြောင်းရင်းကြောင့်ပဲဖြစ်ပါတယ်။ Plank ထောက်တာက အိပ်ထမတင်လုပ်ခြင်း၊ ထိုင်ထလုပ်ခြင်းတို့ထက် ကယ်လိုရီလောင်ကျွမ်းမှုကို ပိုမိုအားကောင်းစေပါတယ်။
တရက်ကို (၁) မိနစ်စီ (၁၀) ကြိမ် Plank ထောက်ပေးတာက ဇီဝဖြစ်ပျက်မှုကို အများကြီးတိုးတက်စေပြီး တနေ့တာလုံးကို လန်းဆန်းတက်ကြွေစေပါလိမ့်မယ်။
Share