ဈေးတွေမှာ ခပ်ခွာခွာနေထိုင်ခြင်း (Social Distancing) စနစ်ကို လုံးဝဂရုမစိုက်သလို တိုးနေကြတာက ရောဂါပျံ့နှံ့ဖို့ကို အားပေးနေရာ ရောက်တယ်လို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ဒီနေ့ဇွန်လ ၈ ရက်မှာ လူမှုကွန်ရက်စာမျက်နှာကတဆင့် ပြောလိုက်ပါတယ်။

“အချို့က social distancing အစား ‘ခန္ဓာကိုယ် အရ ခွာခွာနေခြင်း’ လို့အဓိပ္ပါယ်သက်ရောက်တဲ့ physical distancing ဆိုတဲ့အသုံးအနှုန်းကပိုပြီးသင့်တော်တယ်လို့ယူဆပါတယ်။ ဘယ်အသုံးအနှုန်းကိုပဲရွေးရွေး၊ လုပ်ရတာကတော့ သိပ်မလွယ်တဲ့ကိစ္စပါ။ တစ်သက်တာအလေ့အကျင့်အရ လူသားများအကြား အထိအတွေ့ကတော့ရှိနေတတ်တာပါပဲ။ ဒါဟာကျွန်မတို့ကျန်းမာရေးကိုတာဝန် ယူရတဲ့ဝန်ကြီးဌာနအတွက်စိုးရိမ်စရာဖြစ်ပါတယ်။ အထူးသဖြင့် ဈေးတွေမှာ social/physical distancing ကိုလားလားမှဂရုမစိုက်သလိုတိုးနေကြတာကရောဂါပျံ့ဖို့အားပေးနေသလိုပါပဲ။ကျွန်မတို့ကိုအင်မတန်ဂရုစိုက်တဲ့ကျန်းမာရေးဝန်ကြီးစိတ်သက်သာစေဖို့ ကြိုးစားပြီးညွှန်ကြားချက်များနဲ့အညီ ခွာခွာနေကြပါ။ ဈေးရောင်း၊ဈေးသွားသူများ အထူးဂရုစိုက်စေချင်ပါတယ်။ Maskတပ်ဖို့၊ လက်ဆေးဖို့လည်းမမေ့ပါနဲ့။” လို့ ဒေါ်အောင်ဆန်းစုကြည်က ပြောခဲ့ပါတယ်။

ဒါ့အပြင် လောလောဆယ်မှာ ကျန်းမာရေးနှင့်အားကစားဝန်ကြီးဌာနက ထုတ်ပြန်ထားတဲ့ ဆောင်ရန်၊ရှောင်ရန်အချက်တွေကို မလိုက်နာသူများ ရှိနေပြီး ရောဂါပျိုးချိန်ကာလအတွင်း လက္ခဏာမပြသေးသူတွေ၊ ရောဂါမဖြစ်သေးသူတွေ ရှိနေနိုင်တာကြောင့် တစ်ချိန်တည်းတစ်ပြိုင်တည်းမှာ ကူးစက်ပြန့်ပွားမှုတွေ အများအပြားဖြစ်ပေါ်နိုင်တယ်လို့ ကျန်းမာရေးနှင့်အားကစားဝန်ကြီး ဒေါက်တာမြင့်ထွေးက သတိပေးပြောခဲ့ပါတယ်။ 

COVID-19 ရောဂါပျိုးချိန်ရဲ့ နှစ်ဆကာလဖြစ်တဲ့ ၂၈ ရက်အတွင်း ရောဂါဖြစ်ပွားသူ ထပ်မတွေ့တော့မှ ကူးစက်ဖြစ်ပွားခြင်းမရှိတော့ဘူးလို့ ယူဆနိုင်ကြောင်း၊ ဒီလို အခြေအနေရောက်ရှိသွားရင်လည်း ထိန်းချုပ်မှုလုပ်ငန်းတွေကို ချက်ချင်းလွှတ်လို့မရနိုင်ကြောင်း၊ တဖြည်းဖြည်းချင်းလျှော့ချရမှာဖြစ်ကြောင်း ဝန်ကြီး ဒေါက်တာမြင့်ထွေးကဆိုပါတယ်။

ဒါကြောင့်ပြည်သူတွေနဲ့ အသွားအလာကန့်သတ်စောင့်ကြည့်ခံရသူတွေဟာ ကျန်းမာရေးအသိပညာပေးနှိုးဆော်ချက်တွေနဲ့ လမ်းညွှန်ချက်တွေကို ဆက်လက်လိုက်နာကြဖို့နဲ့ လုံးဝလုံးဝမမပေ့ါဆကြဖို့ ထပ်မံတိုက်တွန်းလိုကြောင်း ဒေါက်တာမြင့်ထွေးက ပြောကြားခဲ့ပါတယ်။