နှစ်ပေါင်း ၂၀၀ ကျော်အတွင်း ပထမဆုံးအကြိမ် နန်းစွန့်ခဲ့တဲ့ ဖခင်ဖြစ်သူ အကီဟီတိုထံမှ ထီးနန်းအရိုက်အရာကို ဆက်ခံခဲ့ပြီးနောက် ယနေ့ (မေလ ၁ ရက်) မှာ အိမ်ရှေ့မင်းသား နာရူဟီတိုက ဂျပန်ဧကရာဇ် တရားဝင်ဖြစ်လာခဲ့ပါတယ်။

(ဧကရာဇ်နာရူဟီတိုက မိန့်ခွန်းလွှာကို အိမ်တော်ဝန်သို့ လွှဲပြောင်းပေးစဉ်) (Photo: AFP)

ယနေ့မနက် ဒေသစံတော်ချိန် မနက် ၁၀ နာရီ ၂၀ မိနစ်မှာတော့ အသက် ၅၉ နှစ်အရွယ် နာရူဟီတိုက ထီးနန်းအမွေ မင်းမြှောက်တန်ဆာကို ဒုတိယအခမ်းအနားဖြင့် ဆက်ခံခဲ့ပြီး ဂျပန်ဧကရာဇ် တရားဝင်ဖြစ်လာခဲ့ပါတယ်။

(ဧကရာဇ်နာရူဟီတိုကို မင်းမြှောက်တန်ဆာများ ပေးအပ်သည့်အခမ်းအနား) (Photo: CGTN)

အဆိုပါ အခမ်းအနားကိုတော့ အမျိုးသမီးတစ်ဦးတည်းသာ တက်ရောက်ခွင့်ရကြောင်းလည်း သိရပါတယ်။ တော်ဝင်မိသားစုဝင် အမျိုးသမီးတွေကိုလည်း ထိုအခမ်းအနားသို့ တက်ရောက်ခွင့်တားမြစ်ထားတယ်လို့ AFP သတင်းမှာ ဖော်ပြပါတယ်။ အခမ်းအနားကို တက်ရောက်ခွင့်ရခဲ့တဲ့ အမျိုးသမီးကတော့ ဂျပန်ဝန်ကြီးချုပ် ရှင်ဇိုအဘေး အစိုးရအဖွဲ့ရဲ့ တစ်ဦးတည်းသော အမျိုးသမီး အစိုးရအဖွဲ့ဝင် ဆက်ဆူကီ ကာတာယာမာ (Satsuki Katayama) ြဖစ်ပါတယ်။

(ဧကရာဇ်နာရူဟီတို မိသားစု) (Photo: CNN)

"ပြည်သူတွေ ပျော်ရွှင်မှု၊ နိုင်ငံ ပိုမိုတိုးတက်မှုနဲ့ ကမ္ဘာကြီးငြိမ်းချမ်းဖို့အတွက် ကျွန်တော် ရိုးသားစွာ မျှော်လင့်ပါတယ်" လို့လည်း ဧကရာဇ်နာရူဟီတိုက ဆိုပါတယ်။ ဂျပန်ဧကရာဇ် နာရူဟီတိုနဲ့ ၎င်းရဲ့မိဖုရား မာဆာကိုတို့မှာ တစ်ဦးတည်းသောသမီး မင်းသမီးတိုရှီ (Aiko) သာရှိပါတယ်။

(ဂျပန်တော်ဝင်မိသားစု) (Photo: Imperial Household Agency)

ဂျပန်ထီးနန်းအစဉ်အလာအရ အမျိုးသမီးများ ထီနန်းအမွေ ဆက်ခံခွင့်မရှိရာ မင်းသမီးတိုရှီ အနေနဲ့ ဖခင်ဖြစ်သူ ဧကရာဇ်နာရူဟီတိုထံမှ ထီးနန်းကို ဆက်ခံနိုင်မှာ မဟုတ်ပါဘူး။ ဧကရာဇ်နာရူဟီတိုထံမှ ထီးနန်းဆက်ခံမယ့်သူကတော့ ၎င်းရဲ့ညီဖြစ်သူ အိမ်ရှေ့မင်းသား အကီရှီနို (Akishino) ဖြစ်ပါတယ်။ အကီရှီနိုပြီးနောက် ဂျပန်ထီးနန်းကို ဆက်ခံမယ့်သူဟာ ၎င်းရဲ့သားဖြစ်သူ မင်းသားလေး ဟီဆာဟီတို (Hisahito) ဖြစ်တယ်လို့လည်း သိရပါတယ်။