တက္ကသိုလ်ဝင်တန်းဖြေဆိုပြီး ကျောင်းသားလူငယ်တွေကို ရန်ကုန်မြို့တွင်းမှာ ရှိတဲ့ အထင်ကရ သမိုင်းဝင်နေရာတွေ လေ့လာလို့ရအောင် အခမဲ့ပို့ဆောင်ပေးသွားမယ်လို့ Travel with Me အဖွဲ့အစည်းကနေ သိရပါတယ်။

အဆိုပါ အစီအစဉ်ကို  “ နီးလျက်နဲ့ မဝေးစေချင်” လို့ အမည်ပေးထားပြီးကျောင်းသားလူငယ်တွေကို ခရီးသွားဗဟုသုတရရှိစေရန်၊ ပတ်ဝန်းကျင်မှာရှိတဲ့ ဗဟုသုတတွေ တိုးပွားလာစေရန်၊ သမိုင်းဝင်နေရာတွေကို ကြည့်ရှုပြီး ယဉ်ကျေးမှုဓလေ့ထုံးတမ်းတွေကို နားလည်လာစေရန် ရည်ရွယ်ကျင်းပတာဖြစ်တယ်လို့ Travel with Me အဖွဲ့အစည်းမှ ဦးဆောင်သူ ကိုမျိုးမင်းသူက Duwun ကိုပြောပါတယ်။

“ ဒီပရိုဂရမ်က ရန်ကုန်မြို့ကနေ စတာဖြစ်ပါတယ်။ ရန်ကုန်မြို့ကနေ တစ်နိုင်ငံလုံးမှာလုပ်သွားဖို့ရှိတယ်။ ရန်ကုန်မြို့မှာ အထင်ကရနေရာတွေရှိတယ်။ဒါပေမယ့် လူတွေကသတိမထားမိကြဘူး။ ကျော်သွားတာမျိုးရှိတယ်။ ဒါကြောင့် အဲဒီနေရာတွေကိုတခုတ်တရနဲ့ လိုက်ပို့ပေးမှာပါ” လို့ ကိုမျိုးမင်းသူက ဆိုပါတယ်။

Photo - Travel with me (ပထမအကြိမ် ရန်ကုန်မြို့အထင်ကရနေရာတွေကို လေ့လာကြစဉ်)

ခရီးသွားစိတ်ဝင်စားတဲ့ ကျောင်းသားလူငယ် အယောက် ၄၀ ကို ရွေးချယ်ထားပြီး မတ်လ ၂၇ ရက် မနက် ၈ နာရီခွဲမှာ အာဇာနည်ကုန်းရှေ့ ကနေ ခရီးစဉ်စတင်မှာဖြစ်ကာ နေ့လယ် ၁၁ နာရီကျော်မှာ ခရီးစဉ် ပြီးဆုံးမှာ ဖြစ်တယ်လို့ ဆိုပါတယ်။

အဆိုပါ ခရီးစဉ်ဟာ ဒုတိယအကြိမ်မြောက်ဖြစ်ပြီး ပြီးခဲ့တဲ့ မတ်လ ၂ ရက်တုန်းကလည်း စိတ်ဝင်စားတဲ့ ကျောင်းသား လူငယ် အယောက် ၄၀ ခန့် ပါဝင်ခဲ့တယ်လို့သိရပါတယ်။