ယူနိုက်တက်ပရိသတ်တွေဟာ စကော့တလန်နဲ့အတူ ယူရို - ၂၀၂၄ ခြေစစ်ပွဲတွေမှာ ဂိုးသွင်းခြေစွမ်းပြနေတဲ့ တွမ်မီနေးကို ကလပ်အသင်းမှာ ရှေ့တန်းတင်ကစားဖို့ တိုက်တွန်းနေကြပါတယ်။ တွမ်မီနေးဟာ ဂျော်ဂျီယာကို နှစ်ဂိုးပြတ်နဲ့ အနိုင်ရရှိခဲ့တဲ့ပွဲမှာ အသင်းအတွက် ဒုတိယမြောက်ဂိုးကို သွင်းယူနိုင်ခဲ့ပြီး လက်ရှိ ယူရိုခြေစစ်ပွဲတွေမှာ ဒုတိယမြောက် ဂိုးသွင်းအများဆုံး ကစားသမားဖြစ်နေပါတယ်။
တွမ်မီနေးဟာ စကော့တလန်အတွက် လက်ရှိခြေစစ်ပွဲတွေမှာ သွင်းဂိုး (၅) ဂိုးအထိ သွင်းယူပေးထားပြီး ဂိုးသွင်းအများဆုံးနေရာမှာ ရပ်တည်နေတဲ့ ကစားသမားတွေနဲ့ တစ်ဂိုးသာ ကွာဟပါတယ်။ ဒါ့အပြင် တွမ်မီနေးက ရော်နယ်ဒို၊ ဟယ်ရီကိန်းတို့လို ကစားသမားတွေနဲ့ သွင်းဂိုးအရေအတွက် တူညီနေပြီး သူ့ထက် လက်ရှိအချိန်မှာ သွင်းဂိုးပိုများတာက ဒိန်းမတ်တိုက်စစ်မှူး ဟို့ဂျ်လန်း၊ ဘယ်လ်ဂျီယံတိုက်စစ်မှူး လူကာကူတို့သာ ရှိပါတယ်။
တွမ်မီနေးဟာ အရင်ကတည်းက ယူနိုက်တက်မှာထက် စကော့တလန်မှာ ပိုမိုခြေစွမ်းပြနိုင်တဲ့ ကစားသမားဖြစ်ပြီး သွင်းဂိုးတွေ မကြာခဏ သွင်းယူပေးနေတာပါ။ အဲ့ဒါကြောင့်လည်း ယူနိုက်တက်ပရိသတ်တွေက သူ့ကို ကွင်းလယ်အဖျက် နေရာမှာ မထားဘဲ Box-to-box ကွင်းလယ်လူ ဒါမှမဟုတ် နံပါတ် (၁၀) နေရာမှာ ထားကစားဖို့ တိုက်တွန်းနေကြတာပါ။
ပရိသတ်တွေက “တွမ်မီနေးက နံပါတ် (၆) နဲ့ (၈) နေရာတွေမှာ ကစားရမှာ မဟုတ်ပါဘူး။ သူက ဂိုးသွင်းနိုင်တဲ့ နံပါတ် (၁၀) နေရာမှာ ကစားရမှာပါ။ ပြိုင်ဘက် ဧရိယာထဲမှာ ကစားလေ၊ သူက ပိုကောင်းလေပါပဲ” “ဝက်ဟော့စ်အစား သူ့ကို တိုက်စစ်နေရာမှာ ထားကစားပြီး ပြိုင်ဘက်ကို ဖိအားပေးတာက ပိုကောင်းပါတယ်” “သူက နံပါတ် (၈) ထက် ပိုကောင်းတဲ့နေရာမှာ ကစားရမှာပါ”
“အဲ့ဒီနေရာမှာဆိုရင် သူက ပိုကောင်းပြီး ပြိုင်ဘက်ဧရိယာ တစ်ဝိုက်မှာဆိုရင် တိုက်စစ်ဆင်တာ ပိုကောင်းလာပါတယ်” “ယူနိုက်တက်မှာ တွမ်မီနေးကို အသုံးပြုပုံ၊ အသုံးပြုနည်း မှားယွင်းနေပြီထင်ပါတယ်” လို့ အမျိုးမျိုး မှတ်ချက်ပြုခဲ့ကြပါတယ်။ တွမ်မီနေးဟာ လက်ရှိနွေရာသီမှာ ယူနိုက်တက်ရဲ့ ရောင်းချမယ့် ကစားသမားစာရင်းထဲ ပါဝင်နေပါတယ်။
အဲရစ်တန်ဟက်ခ်ဟာ ဝက်စ်ဟမ်းကွင်းလယ်လူ ဒကလန်ရိုက်စ်ကို အလိုရှိနေပြီး တွမ်မီနေး ဒါမှမဟုတ် မက်ဂွိုင်းရား တစ်ယောက်ယောက်နဲ့ အလိုက်ပေးကမ်းလှမ်းဖို့ ဆန္ဒရှိနေပါတယ်။ တွမ်မီနေးဟာ နည်းပြဟောင်း မော်ရင်ဟို လက်ထက်မှာ ယူနိုက်တက်အသင်းကြီးကို ရောက်ရှိလာခဲ့ပြီး မော်ရင်ဟို တစ်ခုတ်တရ ချီးကျူးတာကို ခံခဲ့ရဖူးတဲ့ ကစားသမားလည်း ဖြစ်ပါတယ်။