ရန်ကုန်မြို့ရွှေတိဂုံဘုရားကို ပြန်လည်ဖူးမြော်ခွင့်ရရှိစေနိုင်ရေးအတွက် အွန်လိုင်းကနေ နာမည်စာရင်းလျှောက်ထားပြီးမှ လူဦးရေအကန့်အသတ်နဲ့ဖူးမြော်ခွင့်ပေးနိုင်အောင် သာသနာရေးနှင့် ယဉ်ကျေးမှုဝန်ကြီးဌာနမှ စီစဉ်ဆောင်ရွက်လျှက်ရှိပါတယ်။ 

“ အဓိကကတော့ လူစူလူဝေးမဖြစ်အောင်ပါ။ ဘုရားဖူးဖို့ အွန်လိုင်းဘွတ်ကင်လုပ်ရမယ်ဆိုတာက အခက်အခဲတွေလည်းရှိနိုင်သလို တာဝန်ရှိသူတွေအနေနဲ့လည်း ပိုပြီးအလုပ်ရှုပ်နိုင်လို့ ဂရုစိုက်ရမှာပေါ့။ ဒါပေမယ့် ဒါက ဘုရားလာဖူးတဲ့သူတွေရဲ့ Record လည်းရသလို ပြည်သူတွေလည်း ဘုရားပြန်ဖူးခွင့်လည်းရမယ်။ ဘုရားရင်ပြင်ပေါ်မှာလည်း လူစုလူဝေးမဖြစ်အောင် စနစ်တကျလေးလုပ်ဆောင်နိုင်မှာဖြစ်လို့ ဘုရားဖူးပြည်သူတွေကလည်း လိုက်နာဖို့လိုတယ်”လို့ သာသနာရေးနှင့် ယဉ်ကျေးမှုဝန်ကြီးဌာနမှ ညွှန်ကြားရေးမှူး ဦးမြင့်ဦးက Duwunကိုပြောပါတယ်။

အခုလိုဆောင်ရွက်မယ့်အစီအစဉ်နဲ့ ပတ်သက်ပြီးတော့လည်း ရွှေတိဂုံဘုရား ဂေါပကအဖွဲ့ကို အကြောင်းကြားထားပြီး သူတို့ဘက်က အစီအစဉ်တွေကိုလည်း ပြန်လည်တင်ပြခိုင်းထားတယ်လို့ ဦးမြင့်ဦးကပြောပါတယ်။ ရွှေတိဂုံဘုရားဂေါပက အဖွဲ့ထံ Duwun ကဆက်သွယ်မေးမြန်းရာမှာ ဖုန်းလက်ခံဖြေကြားခြင်းမရှိခဲ့ပါဘူး။ အခုလို အွန်းလိုင်းကနေ စာရင်းသွင်းပြီး ဘုရားဖူးခွင့်ရဖို့အတွက် ဂေါပကအဖွဲ့တွေရဲ့ စီမံချက်တွေကို ရရှိပါက နည်းပညာပိုင်းဆိုင်ရာကိုတော့ ဝန်ကြီးဌာနကဘက်ကတာဝန်ယူပြီး သက်ဆိုင်ရာအဖွဲ့အစည်းတွေက ကူညီသွားမယ်လို့ သိရပါတယ်။