ခရစ္စတီးနားခီက လွန်ခဲ့တဲ့ ၁၉ နှစ် ဒီလိုနေ့(ဖေဖော်ဝါရီ ၁၄) ရက်နေ့မှာ ဇဏ်ခီနဲ့ ချစ်သူစဖြစ်ခဲ့တဲ့ အမှတ်တရတွေကို ပြောပြခဲ့ပါတယ်။ လက်ရှိ မိသားစုဘဝလေးမှာလည်း ခင်ပွန်းသည်ရဲ့ အချစ်တွေကြောင့် ပြည့်စုံနေပါပြီတဲ့။

ခရစ္စတီးနားခီက ချစ်ရတဲ့ခင်ပွန်း ဇဏ်ခီ ရဲ့ အချစ်နဲ့တင် ပိုင်ဆိုင်ထားတဲ့ ဘဝလေးက ပြည့်စုံနေပြီလို့ ဆိုပါတယ်။ ဘဝမှာ ကြုံတွေ့ခဲ့ရတဲ့ အခက်အခဲတွေကို အတူတူရင်ဆိုင်ခဲ့ရတဲ့ အမှတ်တရတွေကို ခရစ္စတီးနားခီက ပြောပြလာပါတယ်။

‘’လူ့ဘဝဆိုတာ မပြေလည်ခြင်းတွေ စိတ်ညစ်စရာတွေ ဒုက္ခတွေ အလုပ်ဝန်တွေ မိသားစု ကိစ္စတွေနဲ့ ပူပင်သောက ကို ရင်ဆိုင်ဖြေရှင်းကြရသလို မတူညီတာတွေ သဘောမတူတာတွေကို ညှိနိုင်းနေထိုင်ကြရတယ်။ ဘာတွေဖြစ်နေနေ ဘယ်လိုအချိန်ပဲဖြစ်ဖြစ် ဘယ်ဘဝရောက်ရောက် အရွယ်တွေဘယ်လိုပြောင်းလာလာ ဘာတွေပဲဆက်ရင်ဆိုင်ရ သူ့အချစ်နဲ့တင် နေရတာ တကယ်တန်နေပါပြီနော်’’လို့ ဖေဖော်ဝါရီလ ၁၄ ရက်နေ့ မနက် ၈ နာရီ ၂၃ မိနစ်က သူ့ရဲ့ ဖေ့စ်ဘွတ်မှာ ရေးသားခဲ့ပါတယ်။

ခရစ္စတီးနားခီဟာ ဇဏ်ခီရဲ့ အချစ်ကို ၂၀၀၀ ခုနှစ်ဖေဖော်ဝါရီလ ၁၄ ရက်နေ့မှာ စပြီး လက်ခံခဲ့တယ်လို့ ဆိုပါတယ်။

‘’လွန်ခဲ့တဲ့ ၁၉နှစ်ကသာ V day မှာ ယူ့ကို ချစ်ပါတယ်လို့ ပြန်မဖြေခဲ့မိရင် အခုချိန်မှာ ကိုယ်ဟာလူ့ဘဝမှာ မရှိနိုင်တော့ပါဘူး။ နာကျင်စရာတွေသိပ်များတဲ့လူ့လောကကြီးမှာ အသက်မရှင်ချင်ဘူးလို့ အခုတော့ မတောင်းဆိုရဲတော့ဘူး။ ဘာလို့လည်းဆိုတော့ ဆက်အချစ်ခံချင်သေးလို့။ Love me until I d.... naw... Love Of My Life’’ ဆိုပြီးတော့ ဆက်လက်ရေးသားထားပါတယ်။

Photo: ခရစ္စတီးနားခီ

သရုပ်ဆောင် ဇဏ်ခီနဲ့ ဒါရိုက်တာခရစ္စတီးနားခီတို့ရဲ့ မိသားစုဘဝလေးကိုတော့ ပရိသတ်တိုင်းက လေးစားအားကျလျှက်ရှိတဲ့ အနုပညာရှင်စုံတွဲ မိသားစုလေးပဲဖြစ်ပါတယ်။ သူတို့ ဇနီးမောင်နှံ နှစ်ယောက်ဟာ ဘယ်နေရာသွားသွား တပူးပူး တတွဲတွဲရှိပြီး ချစ်ချစ်ခင်ခင်နဲ့ ပျော်စရာကောင်းတဲ့ မိသားစုလေးလည်း ဖြစ်ပါတယ်။ ဇဏ်ခီတို့မိသားစုလေးဟာ အလှူအတန်းတွေလည်း မကြာခဏလုပ်ဖြစ်သလို အလုပ်ကိစ္စနဲ့ ခရီးတွေလည်း ထွက်ဖြစ်နေပါတယ်။

Photo: ခရစ္စတီးနားခီ

သရုပ်ဆောင် ဇဏ်ခီနဲ့ ဒါရိုက်တာ ခရစ္စတီးနားခီကတော့ '' ဥပါယ်တံမျဉ်'' ဆိုတဲ့ ရုပ်ရှင်ဇာတ်ကားကြီးကနေစပြီး မြန်မာနိုင်ငံမှ ပရိသတ်တွေနဲ့ စတင်ထိတွေ့ခဲ့တာဖြစ်ပါတယ်။ အဲ့ဒီနောက် ဒါရိုက်တာ ခရစ္စတီးနားခီရိုက်တဲ့ ‘’မုဒြာရဲ့ခေါ်သံ’’ ဆိုတဲ့ ဒုတိယမြောက်ရုပ်ရှင် ဇာတ်ကားကြီးကလည်း အောင်မြင်ခဲ့ပါတယ်။ အခုလက်ရှိမှာတော့ ‘’Now & Ever’’ ဆိုတဲ့ ရုပ်ရှင်ဇာတ်ကားကြီး ကို ဒါရိုက်တာ ခရစ္စတီးနားခီက သရုပ်ဆောင် ဇဏ်ခီ၊ ပိုင်ဖြိုးသု တို့နဲ့ ရိုက်ကူးပုံဖော်နေပါတယ်။