ယခင်က ရွေးကောက်ပွဲအသစ် ပြန်လည်ကျင်းပဖို့ တောင်းဆိုတဲ့သတင်းစာရှင်းလင်းပွဲက ရန်ကုန်တိုင်းအဆင့် ပြည်ခိုင်ဖြိုးပါတီကဦးစီးပြုလုပ်တာဖြစ်ပြီး ဒီကနေ့ သတင်းစာရှင်းလင်းပွဲကတော့ ပါတီဌာနချုပ်တွေ စုပေါင်းပြုလုပ်တဲ့ ပွဲဖြစ်တာကြောင့် နိုင်ငံရေးပါတီတွေရဲ့ သဘောထားက ရွေးကောက်ပွဲအသစ်ပြန်လည်ကျင်းပပေးဖို့ တောင်းဆိုမှာမဟုတ်ဘူးလို့ အမျိုးသားဒီမိုကရေစီပါတီသစ် ဒုဥက္ကဌ ဦးသန်းထွန်းက ပြောပါတယ်။

“ ကျွန်တော်တို့ နိုင်ငံရေးပါတီတွေသဘောထားက ရွေးကောက်ပွဲအသစ်ကို တပ်မတော်က ဦးစီးကျင်းပပေးဖို့ မတောင်းဆိုပါဘူး။ ရှုံးသွားတဲ့ နေရာတွေမှာ အနိုင်ပြန်လိုချင်တဲ့ အဓိကရည်ရွယ်ချက်မဟုတ်ဘူး။အခု (၂၀၂၀) မှာ ကျင်းပသွားတဲ့ ရွေးကောက်ပွဲက မဲလိမ်မှု၊ မဲသမာမှု၊ မဲခိုးမှု၊ ဥပဒေကျုးလွန်မှု၊အခြေခံဥပဒေတွေ ဖောက်ဖျက်မှု ဒီလို အနိဌာရုံတွေ (၂၀၂၅) ရွေးကောက်ပွဲမှာ ပြန်လည်မဖြစ်ပေါ်လာစေဖို့ ရည်ရွယ်ပါတယ်"”လို့ ဦးသန်းထွန်းက ဆိုပါတယ်။

“ နိုင်ငံရေးပါတီနဲ့ တပ်မတော်ရဲ့ လမ်းကြောင်းက တပ်မတော်က သူ့တာဝန်သူ၊ သူ့အလုပ်သူ ထမ်းဆောင်နေတာပါ။ ကျွန်တော်တို့ကလည်း ကျွန်တော်တို့လုပ်စရာရှိတာလုပ်နေတာပါ။” လို့လည်း ပြည်ခိုင်ဖြိုးပါတီဒုဥက္ကဌ ဦးခင်ရီကလည်း သူတို့ရဲ့ သဘောထားကို ပြောပါတယ်။

ဒါ့အပြင် ရွေးကောက်ပွဲရလဒ်ကန့်ကွက်ရာမှာ ပါဝင်တဲ့ အမျိုးသားနိုင်ငံရေးဒီမိုကရက်တစ်ပါတီဥက္ကဌ သရေစည်သူ ဦးစိုးမောင်ကလည်း “ အခုရွေးကောက်ပွဲရလဒ်ကိုတော့ လုံးဝလက်မခံပါဘူး။ ဆက်လုပ်နေတဲ့ကိစ္စတွေပေါ်မူတည်ပြီး အသစ်ရွေးမလား၊မရွေးဘူးလားဆိုတာ အချိန်စောင့်ကြည့်ရဦးမယ်” လို့ လည်း ဆိုပါတယ်။

တောင်းဆိုကန့်ကွက်မှုတွေကိုလည်း ဥပဒေလမ်းကြောင်းအရ အဆင့်ဆင့်လုပ်ဆောင်သွားမှာဖြစ်ပြီး အချိန်ဘယ်လောက်ပဲ ကြာကြာ ဆုံးခန်းတိုင်အောင် ဆက်လုပ်သွားမယ်လို့လည်း ပြည်ခိုင်ဖြိုးပါတီက ဒီနေ့သတင်းစာရှင်းလင်းပွဲမှာ ပြောကြားခဲ့ပါတယ်။