ဘရာဇီးနိုင်ငံ သမ္မတရွေးကောက်ပွဲမှာ လက်ယာစွန်းဝါဒီ ကိုယ်စားလှယ်လောင်း ဂျာရေး ဘိုလ်ဆွန်နာရိုက အနိုင်ရရှိကြောင်း သိရပါတယ်။ သမ္မတရွေးကောက်ပွဲ မဲအရေအတွက် ၉၅ ရာခိုင်နှုန်းနီပါးကို ရေတွက်ပြီးစီးချိန်မှာ ဘိုလ်ဆွန်နာရိုက ထောက်ခံမဲ ၅၆ ရာခိုင်နှုန်း ရရှိထားပြီဖြစ်ပါတယ်။

၎င်းရဲ့ပြိုင်ဘက်ဖြစ်သူ လက်ဝဲစွန်းဝါဒီ အလုပ်သမားပါတီမှ ကိုယ်စားလှယ်လောင်း ဖာနန်ဒို ဟက်ဒက်က ၄၄ ရာခိုင်နှုန်း ရရှိခဲ့ပါတယ်။ ဘရာဇီးသမ္မတရွေးကောက်ပွဲမှာ အနိုင်ရခဲ့တဲ့ ဘိုလ်ဆွန်နာရိုက အဂတိလိုက်စားမှု ပပျောက်ရေးနဲ့ ရာဇဝတ်မှုဖြစ်ပွားနှုန်း လျော့ကျစေရန် လုပ်ဆောင်သွားမယ်လို့ မဲဆွယ်စည်းရုံးခဲ့သူလည်း ဖြစ်ပါတယ်။

အလုပ်သမားပါတီမှ ဖာနန်ဒို ဟက်ဒက် (Photo: Bloomberg)

ယခု ရွေးကောက်ပွဲရလဒ်က ဘရာဇီးမှာ လက်ယာစွန်းဝါဒီ အားကောင်းလာကြောင်း ထင်ဟပ်စေခဲ့တယ်လို့ သုံးသပ်ကြပါတယ်။ သမ္မတရွေးကောက်ပွဲမှာ အနိုင်ရခဲ့တဲ့ ဘိုလ်ဆွန်နာရိုဟာ စစ်ဘက်ဆိုင်အရာ အရာရှိဟောင်းတွေနဲ့ နီးစပ်နေသူဖြစ်ပြီး ၎င်းဟာ ဘရာဇီးရဲ့ ဒီမိုကရေစီအတွက် အန္တရာယ်ရှိစေတယ်လို့လည်း အတိုက်အခံတွေက ပြောဆိုကြပါတယ်။

ဘိုလ်ဆွန်နာရိုကို ထောက်ခံသူများ အောင်ပွဲခံကြစဉ် (Photo: Victor Moriyama/Getty Images)

ဘိုလ်ဆွန်နာရိုဟာ လိင်တူဆက်ဆံသူတွေကို မုန်းတီးမှု၊ လူမျိုးရေးခွဲခြားမှုနဲ့ မိန်းမတွေကိုမုန်းတီးမှု မှတ်ချက်စကားတွေ ပြောဆိုမှုအပေါ် ဘရာဇီးပြည်သူအများအပြားက မနှစ်သက်ကြဘူးလို့ ဆိုပါတယ်။ သို့သော်လည်း ၎င်းကို ထောက်ခံသူတွေကတော့ ဘိုလ်ဆွန်နာရိုကို ကယ်တင်ရှင်တစ်ဦးအဖြစ် ရှုမြင်ကြပါတယ်။

ဘိုလ်ဆွန်နာရိုကို ထောက်ခံသူများ အောင်ပွဲခံကြစဉ် (Photo: Silvia Izquierdo/AP)

ဘိုလ်ဆွန်နာရိုက ဘရာဇီးနိုင်ငံကို ပိုမိုလုံခြုံစေရန်နဲ့ ရိုးရာဓလေ့တွေကို ကာကွယ်ထိန်းသိမ်းရန် လုပ်ဆောင်သွားမယ်လို့ ၎င်းကိုထောက်ခံသူတွေက မျှော်လင့်ထားပါတယ်။

တနင်္ဂနွေနေ့ (အောက်တိုဘာ ၂၈ ရက်) က ပြုလုပ်ခဲ့တဲ့ ဒုတိယအကျော့ သမ္မတရွေးကောက်ပွဲမှာ ဘိုလ်ဆွန်နာရိုကို မဲပေးခဲ့သူအချို့တော့ ဘရာဇီးမှာ လက်ဝဲဝါဒီ အလုပ်သမားပါတီကို အာဏာပြန်မရစေလိုတာကြောင့် ဖြစ်တယ်လို့ ပြောဆိုကြကြောင်း BBC သတင်းမှာ ဖော်ပြထားပါတယ်။