အိန္ဒိယက နယ်စပ်ဖြတ်ကျော်ကာ မိမိတို့ပိုင်နက်အတွင်း စစ်သွေးကြွတွေကို လေကြောင်းတိုက်ခိုက်မှုတွေ လုပ်ဆောင်ခဲ့မှုအပေါ် တုံ့ပြန်သွားမှာဖြစ်ပြီး အချိန်နဲ့နေရာကို ရွေးချယ်နေတယ်လို့ ပါကစ္စတန်က ပြောကြားလိုက်ပါတယ်။

(အိန္ဒိယက လေကြောင်းမှတိုက်ခိုက်ခဲ့သည့် နေရာတစ်ခု) (Photo: @OfficialDGISPR/Twitter)

ကက်ရှ်မီးယားဒေသမှာ အိန္ဒိယစစ်သား ၄၀ ထက်မနည်း သေဆုံးခဲ့တဲ့ အသေခံ ကားဗုံးခွဲတိုက်ခိုက်မှုကို ၎င်းတို့လုပ်ဆောင်ခဲ့ကြောင်း ပါကစ္စတန်အခြေစိုက် JeM စစ်သွေးကြွအုပ်စုက ပြောခဲ့ပါတယ်။ ပါကစ္စတန်ဟာ စစ်သွေးကြွအုပ်စုတွေကို ၎င်းရဲ့ပိုင်နက်အတွင်း ခိုလှုံလှုပ်ရှားခွင့်ပေးထားကြောင်း အိန္ဒိယက စွပ်စွဲထားပြီး ပါကစ္စတန်ကတော့ ငြင်းဆိုထားခဲ့ပါတယ်။

(အိန္ဒိယ လေကြောင်းတိုက်ခိုက်မှုကို ထောက်ခံနေကြစဉ်) (Photo: EPA)

အိန္ဒိယနဲ့ပါကစ္စတန်တို့က မွတ်စလင်မ်အများစု နေထိုင်ကြတဲ့ ကက်ရှ်မီးယားဒေသဟာ ၎င်းတို့ပိုင်နက်ဖြစ်ကြောင်း အသီးသီး ပြောဆိုမှုတွေရှိပါတယ်။ သို့သော် အဆိုပါဒေသရဲ့ မတူညီတဲ့ နယ်မြေအစိတ်အပိုင်းတွေကို တစ်နိုင်ငံစီက ထိန်းချုပ်ထားပြီး အိန္ဒိယက ထိန်းချုပ်ထားတဲ့ ကက်ရှ်မီးယားနဲ့ ပါကစ္စတန်က ထိန်းချုပ်ထားတဲ့ ကက်ရှ်မီးယားအဖြစ် ရှိနေခဲ့ပါတယ်။

(အိန္ဒိယ လေကြောင်းတိုက်ခိုက်မှုကို ပါကစ္စတန်မှာ ကန့်ကွက်ဆန္ဒပြစဉ်) (Photo: EPA)

ပါကစ္စတန်ပိုင်နက်အတွင်း Balakot မြို့ငယ်တဝိုက် ခြေကုပ်ယူထားတဲ့ Jaish-e-Mohammad (JeM) စစ်သွေးကြွစခန်းကို လေကြောင်းမှတိုက်ခိုက်ခဲ့ကြောင်းနဲ့ အဆိုပါ စစ်သွေးကြွအုပ်စုက အိန္ဒိယနိုင်ငံမှာ အသေခံ တိုက်ခိုက်မှုတွေ လုပ်ဆောင်လာနိုင်တာကြောင့် ဖြစ်တယ်လို့ အိန္ဒိယ နိုင်ငံခြားရေးဝန်ကြီး Vijay Gokhale က သတင်းစာရှင်းလင်းပွဲမှာ ပြောခဲ့ပါတယ်။

JeM အုပ်စုဟာ ၂၀၀၁ ခုနှစ် ဒီဇင်ဘာလအတွင်းကလည်း နောက်ထပ် ပါကစ္စတန်အခြေစိုက် စစ်သွေးကြွအုပ်စု Lashkar-e-Taiba မှ တိုက်ခိုက်ရေးသမားတွေနဲ့ ပူးပေါင်းပြီး အိန္ဒိယစစ်တပ်ကို တိုက်ခိုက်ခဲ့ဖူးပြီး ထိုစဉ်က အိန္ဒိယနဲပါကစ္စတန် နှစ်နိုင်ငံကြား လေးကြိမ်မြောက် စစ်ပွဲဖြစ်လုနီပါး အခြေအနေ ဖြစ်ခဲ့ပါတယ်။

(အိန္ဒိယက လေကြောင်းမှတိုက်ခိုက်ခဲ့သည့် Balakot မြို့ငယ်အနီး မြင်ကွင်း) (Photo: AFP)

အိန္ဒိယက လေကြောင်းတိုက်ခိုက်မှု ပြုလုပ်ခဲ့တဲ့ Balakot မြို့ငယ်ဟာ အိန္ဒိယနဲ့ပါကစ္စတန်းကြား နယ်စပ်မျဉ်းမှ ၃၁ မိုင်မျှအကွာမှာ တည်ရှိနေပါတယ်။ အိန္ဒိယနဲ့ပါကစ္စတန်တို့ဟာ ၁၉၄၇ ခုနှစ်မှာ ဗြိတိန်ထံမှ လွတ်လပ်ရေးရပြီးနောက်ပိုင်း စစ်ပွဲသုံးကြိမ် ဖြစ်ပွားခဲ့ကြောင်းလည်း သိရပါတယ်။ လက်ရှိ အခြေအနေေတွေအရ အိန္ဒိယနဲ့ပါကစ္စတန်ကြား တင်းမာမှုဟာ အန္တရာယ်ရှိတဲ့အဆင့်ကို ရောက်ရှိလာကြောင်း BBC သတင်းဌာနမှ အစ္စလာမာဘတ်အခြေစိုက် လေ့လာသုံးသပ်သူ M Ilyas Khan က ပြောခဲ့ပါတယ်။

ဆက်စပ်သတင်း - ကက်ရှ်မီးယားဒေသမှာ အိန္ဒိယတိုက်လေယာဉ်နှစ်စီးကို ပါကစ္စတန်က ပစ်ချ

အိန္ဒိယ-ပါကစ္စတန် တင်းမာမှုဖြစ်စဉ်များ

သြဂုတ် ၁၉၆၅ - ကက်ရှ်မီးယားအရေး နောက်တစ်ကြိမ် အပြန်အလှန် တိုက်ခိုက်မှုဖြစ်ပွားခဲ့ပါတယ်။

ဒီဇင်ဘာ ၁၉၇၁ - အိန္ဒိယက အရှေ့ပါကစ္စတန်ရဲ့ လွတ်လပ်ရေးကြိုးပမ်းမှုကို ကူညီထောက်ပံ့ခဲ့ပါတယ်။ အိန္ဒိယလေတပ်က နယ်စပ်ဖြတ်ကျော်ကာ ပါကစ္စတန်ပိုင်နက်အတွင်း ဗုံးကြဲတိုက်ခိုက်ခဲ့ပါတယ်။ ဘင်္ဂလားဒေ့ရှ်က ကြားဝင်ဆောင်ရွက်မှုဖြင့် စစ်ပွဲပြီဆုံးခဲ့ပါတယ်။

မေလ ၁၉၉၉ - ပါကစ္စတန်စစ်သားများနဲ့ စစ်သွေးကြွများက Kargil တောင်တန်းရှိ အိန္ဒိယစစ်တပ် ကင်းစခန်းတွေကို သိမ်းပိုက်ခဲ့ပါတယ်။ အိန္ဒိယက ဝေဟင်နဲ့မြေပြင် တိုက်ခိုက်မှုများဖြင့် ကျူးကျော်သူတွေက ပြန်ဆုတ်ခွာစေခဲ့ပါတယ်။

အောက်တိုဘာ၊ ဒီဇင်ဘာ ၂၀၀၁ - အိန္ဒိယထိန်းချုပ်တဲ့ ကက်ရှ်မီးယားနယ်မြေရှိ လွှတ်တော်အဆောက်အအုံ အပြင်ဘက်မှာ အသေခံ ကားဗုံးခွဲတိုက်ခိုက်မှု ဖြစ်ပွားခဲ့ပြီး ၃၈ ဦး သေဆုံးခဲ့ပါတယ်။ ထို့နောက် ၂ လအကြာ ဒီဇင်ဘာလအတွင်း နယူးဒေလီမြို့ရှိ အိန္ဒိယလွှတ်တော်ကို တိုက်ခိုက်မှုဖြစ်ပွားခဲ့ပြီး ၁၄ ဦး သေဆုံးခဲ့ပြီး နှစ်နိုင်ငံ စစ်ပွဲဖြစ်ပွားလုနီးပါး အခြေအနေသို့ ရောက်ခဲ့ပါတယ်။

(ကက်ရှ်မီးယားဒေသကို ပိုင်းခြားထားမှု) (Map: AFP)

နိုဝင်ဘာ ၂၀၀၈ - မွမ်ဘိုင်းမြို့ရဲ့ အဓိက မီးရထားဘူတာရုံ၊ ဇိမ်ခံဟိုတယ်နဲ့ ဂျူးယဉ်ကျေးမှုဌာနတို့ကို စစ်သွေးကြွများ ပူးပေါင်းတိုက်ခိုက်မှု ဖြစ်ပွားခဲ့ပြီး ၁၆၆ ဦး သေဆုံးခဲ့ပါတယ်။ ထိုတိုက်ခိုက်မှုကို ပါကစ္စတန်မှာ အခြေစိုက်တဲ့ Lashkar-e-Taiba စစ်သွေးကြွအုပ်စုက လုပ်ဆောင်ခဲ့ကြောင်း အိန္ဒိယက ပြောခဲ့ပါတယ်။

ဇန်နဝါရီ ၂၀၁၆ - Pathankot မြို့ရှိ အိန္ဒိယ လေတပ်အခြေစိုက်စခန်းကို စစ်သွေးကြွတွေက လေးရက်ကြာ တိုက်ခိုက်မှုဖြစ်ပွားခဲ့ပြီး အိန္ဒိယစစ်သား ခုနစ်ဦးနဲ့ စစ်သွေးကြွခြောက်ဦး သေဆုံးခဲ့ပါတယ်။

စက်တင်ဘာ ၁၈၊ ၂၀၁၆ - အိန္ဒိယထိန်းချုပ်တဲ့ ကက်ရှ်မီးယားနယ်မြေရှိ စစ်စခန်းတစ်ခု တိုက်ခိုက်ခံရပြီး စစ်သား ၁၉ ဦး သေဆုံးခဲ့ပါတယ်။

(အိန္ဒိယစစ်သားများ လိုက်ပါလာသည့်ဘတ်စ်ကား အသခေံဗုံးခွဲတိုက်ခိုက်ခံရမှု) (Photo: PTI)

စက်တင်ဘာ ၃၀၊ ၂၀၁၆ - အိန္ဒိယက ပါကစ္စတန်ထိန်းချုပ်ထားတဲ့ ကက်ရှ်မီးယားနယ်မြေအတွင်းရှိ စစ်သွေးကြွတွေကို တိုက်ခိုက်ခဲ့ကြောင်း ပြောခဲ့ပါတယ်။ ပါကစ္စတန်ကတော့ ထိုသို့ တိုက်ခိုက်မှုတွေ မရှိခဲ့ဘူးလို့ ငြင်းဆိုခဲ့ပါတယ်။

ဖေဖေါ်ဝါရီ ၁၄၊ ၂၀၁၉ - အိန္ဒိယထိန်းချုပ်တဲ့ ကက်ရှ်မီးယားနယ်မြေအတွင်း အိန္ဒိယစစ်သားတွေ လိုက်ပါလာတဲ့ ဘတ်စ်ကားကို အသေခံ ဗုံးခွဲတိုက်ခိုက်မှု ဖြစ်ပွားခဲ့ပြီး စစ်သား ၄၀ ထက်မနည်း သေဆုံးခဲ့ပါတယ်။ ပါကစ္စတန်အခြေစိုက် Jaish-e-Mohammad (JeM) စစ်သွေးကြွအုပ်စုက ထိုတိုက်ခိုက်မှုကို လုပ်ဆောင်ခဲ့ကြောင်း ပြောခဲ့ပါတယ်။ ထိုတိုက်ခိုက်မှုဖြစ်ပွားပြီးနောက် အိန္ဒိယက နယ်စပ်ဖြတ်ကျော်ကာ ပါကစ္စတန်ပိုင်နယ်အတွင်းရှိ JeM စစ်သွေးကြွစခန်းကို လေကြောင်းတိုက်ခိုက်မှု ပြုလုပ်ခဲ့ပါတယ်။ အိန္ဒိယက နယ်စပ်ဖြတ်ကျော်ကာ လေကြောင်းတိုက်ခိုက်မှု ပြုလုပ်ခဲ့ပြီးနောက် ပါကစ္စတန်ကလည်း တုံ့ပြန်သွားမယ်လို့ ပြောဆိုခဲ့ပါတယ်။