သြစတြေးလျမှာ အပူချိန် အလွန်မြင့်တက်မှုကြောင့် ဝေးလံတဲ့ နေရာဒေသတစ်ခုအတွင်း မြင်းရိုင်းအကောင်ရေ ၉၀ ကျော် အစုလိုက်အပြုံလိုက် သေဆုံးခဲ့ကြောင်း အာဏာပိုင်တွေက ပြောပါတယ်။

(Photo: Ralph Turner)

သေလုမြောပါးဖြစ်နေတဲ့ အခြား မြင်းရိုင်းတွေကိုတော့ နောက်ပိုင်းမှာ သတ်ပစ်ခဲ့ရတယ်လို့ သိရပါတယ်။ သဲကန္တာရနဲ့ တောရိုင်းနယ်မြေတွေရှိရာ တောင်ပိုင်းသြစတြေးလျရှိ Adelaide မြို့ မြောက်ပိုင်းဒေသမှာ အပူချိန် ၄၉.၅ ဒီဂရီစင်တီဂရိတ်အထိ စံချိန်တင် မြင့်တက်ခဲ့ပါတယ်။

(Photo: Ralph Turner)

Adelaide မြို့မှာလည်း ကြာသပတေးနေ့ (ဇန်နဝါရီ ၂၄ ရက်) အပူချိန်ဟာ ၄၇.၇ ဒီဂရီဆဲလ်စီးယပ်သို့ ရောက်ရှိခဲ့ပြီး ၁၉၃၉ ခုနှစ်နောက်ပိုင်း အမြင့်ဆုံးအဖြစ် စံချိန်တင်ခဲ့ကြောင်း သိရပါတယ်။ သြစတြေးလျမှာ အလွန်အမင်း ပူပြင်းနေမှုဟာ သီတင်းနှစ်ပတ်ကြာပြီဖြစ်ပြီး နိုင်ငံတစ်ဝှမ်း အပူချိန် စံချိန်တင်မြင့်တက်မှုတွေ ဒါဇင်နဲ့ချီ ဖြစ်ခဲ့ပါတယ်။

(Photo: Getty Images)

ထိုအတောအတွင်း မြင်းရိုင်းများ သေဆုံးနေတာ တွေ့ခဲ့ရတဲ့နေရာအနီးရှိ Alice Springs မြို့မှာလည်း အပူချိန်ဟာ ၄၂ ဒီဂရီဆဲလ်စီးယပ်အထိ သီတင်းနှစ်ပတ်နီးပါးကြာ မြင့်တက်နေခဲ့ပါတယ်။ ထိုအပူချိန်ဟာ အဆိုပါမြို့ရဲ့ ဇန်နဝါရီလ ပျမ်းမျှအပူချိန်ထက် ၆ ဒီဂရီဆဲလ်စီးယပ် ပိုများနေခဲ့တယ်လို့ သြစတြေးလျ မိုးလေဝသဌာနက ပြောပါတယ်။

(Photo: Ralph Turner)

သြစတြေးလျမှာ အပူချိန် အလွန်မြင့်တက်မှုကို အခြား တောရိုင်းတိရိစ္ဆာန်တွေလည်း ခံစားနေခဲ့ရကြောင်းနဲ့ New South Wales မှာ လင်းနို့များ အစုလိုက်အပြုံလိုက် သေဆုံးမှုသတင်းတွေ ထွက်ပေါ်ခဲ့ပါတယ်။ ဒါ့အပြင် ပူးပြင်းခြောက်သွေ့မှု ကြုံတွေ့နေရတဲ့ နေရာဒေသအတွင်း မြစ်ကမ်းပါးများတစ်လျှောက်မှာ အကောင်ရေ တစ်သန်းအထိရှိနိုင်တဲ့ ငါးများသေဆုံးနေတာလည်း တွေ့ခဲ့ရတယ်လို့ BBC သတင်းမှာ ဖော်ပြထားပါတယ်။

(Photo: thewest.com.au)

သြစတြေးလျးအစိုးရက ငါးများသေဆုံးမှုကို စစ်ဆေးမှုတွေ ပြုလုပ်ခဲ့ကြောင်း သိရပါတယ်။ တောင်ပိုင်းသြစတြေးလျမှာ ၂၄ နာရီအတွင်း လူ ၄၄ ဦးကို အပူဒဏ်ခံစားရမှုကြောင့် ကုသမှုပြုလုပ်ပေးခဲ့ရကြောင်း ကျန်းမာရေးတာဝန်ရှိသူတွေက ပြောပါတယ်။

အပူချိန်မြင့်တက်နေမှုကြောင့် နေအိမ်အတွင်းမှာသာ နေထိုင်ကြရန်နဲ့ ကိုယ်လက်လှုပ်ရှားမှုလျှော့ချရန် အာဏာပိုင်တွေက ပြည်သူလူထုကို တိုက်တွန်းထားပါတယ်။ သက်ကြီးရွယ်အိုများ၊ နာတာရှည် ရောဂါဝေဒနာခံစားနေရသူများနဲ့ ကလေးငယ်တွေကို အပူဒဏ်အန္တရာယ်မှ အထူးသတိထားကြရန်လည်း သတိပေးထားပါတယ်။