အာဆင်နယ် ပရိသတ်တွေဟာ မနေ့ညက ဘရန့်ဖို့ဒ်နဲ့ ကစားခဲ့တဲ့ ကာရာဘောင်ဖလားပွဲမှာ ပုံမှန်ခြေစွမ်း မပြသနိုင်ခဲ့တဲ့ ကိုင်ဟာဗက်ဇ်ကို စိတ်ရှည်သည်းခံမှု ကုန်ဆုံးနေပြီဖြစ်ပါတယ်။ ဟာဗက်ဇ်ဟာ ပြီးခဲ့တဲ့နွေရာသီကမှ ချဲလ်ဆီးကနေ အာဆင်နယ်ကို ရောက်ရှိလာခဲ့တာပါ။
ဒါပေမယ့်လည်း ဟာဗက်ဇ်က အာဆင်နယ်မှာ တစ်ပွဲမှခြေစွမ်းမပြနိုင်သေးဘဲ စိတ်ပျက်စရာ အခြေအနေနဲ့ ရင်ဆိုင်နေရပါတယ်။ ဟာဗက်ဇ်ဟာ အာဆင်နယ်အတွက် (၇) ပွဲ ကစားပြီးချိန်မှာ သွင်းဂိုးမရှိ၊ ဂိုးဖန်တီးမှုမရှိတာကြောင့် 007 အဖြစ်လည်း လှောင်ပြောင်ခံနေရပါတယ်။
မနေ့ညကလိုမျိုး ဖိအားမရှိတဲ့ ကာရာဘောင်ဖလားပွဲလိုမျိုးမှာတောင် ဟာဗက်ဇ်က ခြေစွမ်းမပြသနိုင်ခဲ့ဘဲ သာမန်အောက် ခြေစွမ်းကိုသာ ပြသခဲ့တာကြောင့် အာဆင်နယ်ပရိသတ်တွေက ဝေဖန်နေကြတာပါ။ ပရိသတ်တွေက “ငါတို့ ဟာဗက်ဇ်အကြောင်းကို အကြိမ်ကြိမ် ပြောခဲ့ပြီးပါပြီ။ သူက အသင်းအတွက် လုံလောက်တဲ့ ခြေစွမ်းမျိုး မရှိပါဘူး။ ဒါပေမယ့် ငါတို့ သူ့ကို စောင့်နေရတုန်းပဲ”
“ငါစိတ်မကောင်းပါဘူး။ ဒါပေမယ့် ဟာဗက်ဇ်က လုံလောက်တဲ့ ခြေစွမ်းမျိုး မရှိပါဘူး။ သူ့ကြည့်ရတာ သူ့ကိုယ်သူ ပျောက်ဆုံးနေပုံပဲ” “ဟာဗက်ဇ်တစ်ယောက် ဘယ်အချိန်မှာ သူ့ကိုယ်သူ ယုံကြည်မှုပြန်ရလာမလဲ မသိပါဘူး” “ဟာဗက်ဇ်က သူ့ကိုယ်သူ ယုံကြည်မှုမရှိတော့ပါဘူး။ အနားမှာရှိတဲ့သူနဲ့ပဲ ဘောလုံးအပေးအယူ လုပ်တော့တာပါ”
“ဘောလုံးဆုံးရှုံးမှာကို သူစိုးရိမ်နေပြီး ဘာစွန့်စားမှုကိုမှ မပြုလုပ်တော့ပါဘူး” “ဟာဗက်ဇ်က ကွင်းထဲမှာ တစ်ခုခုလုပ်ဖို့ ဘာယုံကြည်ချက်မှကို မရှိတော့ပါဘူး။ ဘောလုံးပေးတာရော၊ ဆွဲပြေးတာရော အားလုံးက ခံယူချက်မရှိတော့ဘဲ ကြည့်ရဆိုးပါတယ်” လို့ အသီးသီး မှတ်ချက်ပြုခဲ့ကြပါတယ်။ ဒီပွဲမှာတော့ အာဆင်နယ်က နယ်လ်ဆင်ရဲ့ တစ်လုံးတည်းသော သွင်းဂိုးနဲ့ ဘရန့်ဖို့ဒ်ကို အနိုင်ရရှိပြီး နောက်တစ်ဆင့် တက်ခဲ့ပါတယ်။