ဘာစီလိုနာအသင်းရဲ့ ကွင်းလယ်တိုက်စစ်ကစားသမား ကော်တင်ဟိုဟာ ရာသီသစ်မှာ ကျောနံပါတ်အသစ်ကို ဝတ်ဆင်ကစား သွားမယ်လို့ သိရပါတယ်။ ဘာစီလိုနာအသင်းရဲ့ နာမည်ကျော် ကျောနံပါတ် (၇)ကို ကော်တင်ဟိုက ဝတ်ဆင်ကစားခွင့် ရရှိခဲ့ပြီး ယခင် ဝတ်ခဲ့တဲ့ ကျောနံပါတ် (၁၄)အစား ပြောင်းလဲ ဝတ်ဆင်သွားမှာ ဖြစ်ပါတယ်။
Photo : Fotmob
ပြီးခဲ့တဲ့ ဇန်နဝါရီလအတွင်းက ဘာစီလိုနာကို ရောက်ရှိခဲ့တဲ့ ကော်တင်ဟိုဟာ ဂျာဗီယာမာရှေရာနို ဝတ်ဆင်ခဲ့တဲ့ ကျောနံပါတ် (၁၄)ကို ဆက်ခံခဲ့ရတာ ဖြစ်ပါတယ်။ ဒါပေမယ့်လည်း အခုအခါမှာတော့ ကော်တင်ဟိုအနေနဲ့ ဘာစီလိုနာရဲ့ ဂန္ထဝင်ကျောနံပါတ် တစ်ခုကို ဝတ်ဆင်ခွင့့် ရရှိသွားခဲ့ပြီ ဖြစ်ပါတယ်။
Photo : AS
ကျောနံပါတ် (၇)ကို ဝတ်ဆင်ခဲ့တဲ့ ဘာစီလိုနာရဲ့ နာမည်ကျော် ကစားသမားတွေကတော့ လူးဝစ္စဖီဂို၊ ဟင်းနရစ်လာဆင် နဲ့ ဒေးဗစ်ဗီလာတို့ဖြစ်ပြီး အဆိုပါကစားသမားတွေဟာ အသင်းနဲ့အတူ အောင်မြင်မှု အများအပြား ရယူနိုင်ခဲ့ပြီး ပရိသတ်အကြိုက် ကစားသမားအဖြစ် ခြေစွမ်းပြခဲ့တဲ့သူတွေ ဖြစ်ပါတယ်။
Photo : AS
ကော်တင်ဟိုဟာ လီဗာပူးလ်ကနေ ပြောင်းရွှေ့လာပြီးနောက်ပိုင်း ဘာစီလိုနာအသင်းမှာ အချိန်တိုအတွင်း အထိုင်ကျခဲ့ပြီး ပြီးခဲ့တဲ့ရာသီက အသင်းအတွက် သွင်းဂိုး (၈)ဂိုးအထိ ရယူပေးနိုင်ခဲ့ပြီး အမှတ်ပေးဖလားနဲ့ စပိန်ကိုပါဒယ်ရေးဖလားတို့ကို ဆွတ်ခူးနိုင်ခဲ့ပါတယ်။ အသက် (၂၆)နှစ်အရွယ် ဘရာဇီးလ်တိုက်စစ်အားသန်ကစားသမားဟာ ကမ္ဘာ့ဖလားပြိုင်ပွဲမှာလည်း (၂)ဂိုး သွင်းယူနိုင်ခဲ့ပါတယ်။
Photo : AS
ကော်တင်ဟို ကျောနံပါတ်အသစ် ဝတ်ဆင်ကစားမယ့် အကြောင်းကို ဘာစီလိုနာအသင်းကလည်း အတည်ပြုကြေငြာခဲ့ပြီ ဖြစ်ပါတယ်။ ဒါကြောင့် လာမယ့်ဘောလုံးရာသီမှာတော့ ကော်တင်ဟိုကို ကျောနံပါတ် (၇) နဲ့ မြင်တွေ့ရတော့မှာ ဖြစ်ပြီး ဖီဂို၊ ဒေးဗစ်ဗီလာတို့လိုပဲ ဘာစီလိုနာအတွက် အကောင်းဆုံးခြေစွမ်းတွေ ပြသနိုင်မှာလားဆိုတာ စောင့်ကြည့်ရတော့မှာ ဖြစ်ပါတယ်။