ချန်ပီယံလိဂ်ရှုံးထွက် (၁၆) သင်းအဆင့် မဲခွဲပွဲကို ဒီနေ့မှာ (၂) ကြိမ်တိုင်တိုင် ပြုလုပ်ခဲ့ရပါတယ်။ ပထမအကြိမ် မဲခွဲခဲ့တုန်းက အက်သလက်တီကိုနဲ့ဘိုင်ယန်မြူးနစ်၊ PSG နဲ့ ယူနိုက်တက်ဆိုပြီး ပွဲကြီးပွဲကောင်းနှစ်ပွဲ ပါဝင်သွားခဲ့ပေမယ့် ဒီနေရာမှာ မသမာမှုတွေရှိနေတယ်ဆိုပြီး အက်သလက်တီကိုအပါအဝင် အသင်းအများစုက မဲပြန်ခွဲဖို့ တောင်းဆိုခဲ့ပါတယ်။
အက်သလက်တီကိုနဲ့ ထိပ်တိုက်တွေ့မယ့်အသင်းအတွက် မဲခွဲတဲ့နေရာမှာ ယူနိုက်တက်နာမည်ပါတဲ့ ဘောလုံးကို သိသိသာသာ ချန်ထားခဲ့တယ်လို့ စွပ်စွဲခဲ့ကြပြီး အက်သလက်တီကိုကလည်း ဒီအပေါ်မှာ စောဒကတက်ခဲ့တာကြောင့် မဲပြန်ခွဲခဲ့ရပါတယ်။ နောက်ဆုံးအကြိမ် မဲခွဲတဲ့နောက်မှာတော့ အက်သလက်တီကိုက ယူနိုက်တက်နဲ့ ထိပ်တိုက်တွေ့ဆုံခဲ့ပါတယ်။
နှစ်သင်းလုံးအတွက်ကတော့ ဘယ်လိုပဲဖြစ်ဖြစ် ပွဲကျပ်သေးတယ်လို့ပဲ ဆိုရမှာဖြစ်ပြီး ပိုဆိုးတာကတော့ အက်သလက်တီကိုအနေနဲ့ သူတို့ကိုဟက်ထရစ်သွင်းနေကျ ရော်နယ်ဒိုနဲ့ တွေ့ဆုံရမယ့်ကိစ္စပါ။ အက်သလက်တီကိုအနေနဲ့ ဆယ်စုနှစ်တခုအတွင်းမှာ ဟက်ထရစ် (၄) ကြိမ်သာ ခွင့်ပြုခဲ့ရပြီး အဲ့ဒီ (၄) ကြိမ်လုံးကိုလည်း ရော်နယ်ဒိုတယောက်တည်းက သွင်းယူခဲ့တာပါ။
ရော်နယ်ဒိုဟာ ရီးရဲယ်မက်ဒရစ် ကစားသမားဘဝမှာ အက်သလက်တီကိုနဲ့ အကြိမ်ပေါင်းများစွာ ထိပ်တိုက်တွေ့ခဲ့ဖူးပြီး ဟက်ထရစ် (၃) ကြိမ် သွင်းယူခဲ့ဖူးပါတယ်။
နောက်တကြိမ်ကတော့ ရော်နယ်ဒို ဂျူဗင်တပ်စ်ကို ရောက်သွားပြီးနောက်ပိုင်း ချန်ပီယံလိဂ်မှာ ဂျူဗင်တပ်စ်နဲ့အက်သလက်တီကို ထိပ်တိုက်တွေ့ချိန်မှာ ရော်နယ်ဒိုက ဟက်ထရစ်သွင်းပြီး အက်သလက်တီကို,ကို ရှုံးထွက်အဆင့်ကနေ လှည့်ပြန်စေခဲ့ဖူးပါတယ်။
အထူးသဖြင့် အက်သလက်တီကိုရဲ့ လက်ရှိ ဂိုးသမား အော့ဘလက်ခ်ကလည်း ကစားသမားဘဝမှာ ဟက်ထရစ် (၃) ကြိမ်သာ အသွင်းခံရဖူးပြီး အဲ့ဒီ (၃) ကြိမ်လုံးကို ရော်နယ်ဒိုကပဲ သွင်းယူခဲ့တာပါ။ အဲ့ဒါကြောင့် ဒီတကြိမ် အက်သလက်တီကိုနဲ့ ယူနိုက်တက် ထိပ်တိုက်တွေ့ဆုံမှုမှာ ရော်နယ်ဒိုတယောက် အက်သလက်တီကိုဘက်ကို ဟက်ထရစ် သွင်းနိုင်ဦးမလား စိတ်ဝင်စားဖို့ကောင်းနေပြီး ဆီမြွန်နီအတွက်လည်း ထိတ်လန့်စရာအဖြစ်ရှိနေခဲ့ပါပြီ။