အင်္ဂလန်ပရိသတ်တွေဟာ ကွင်းလယ်လူ ဘယ်လင်ဟမ်ရဲ့ ပွဲပြီးပြောစကားတွေအတွက် သဘောကျနှစ်သက်နေကြောင်း သိရှိရပါတယ်။ ဘယ်လင်ဟမ်ဟာ စကော့တလန်ကို နိုင်ခဲ့တဲ့ပွဲမှာ အသင်းအတွက် အကောင်းဆုံး ခြေစွမ်းပြခဲ့ပါတယ်။
စကော့တလန်ကို အင်္ဂလန်တို့ ၁-၃ ဂိုးနဲ့ အနိုင်ရရှိခဲ့တဲ့ပွဲမှာ ဘယ်လင်ဟမ်က အသင်းအတွက် တစ်ဂိုးသွင်းယူနိုင်ခဲ့သလို ဟယ်ရီကိန်းရဲ့ သွင်းဂိုးအတွက်လည်း ဖန်တီးပေးနိုင်ခဲ့ပါတယ်။ ဘယ်လင်ဟမ်ဟာ ယူကရိန်းကို တစ်ဂိုးစီသရေကျခဲ့တဲ့ပွဲမှာ ပုံစံကောင်းပျောက်ဆုံးခဲ့ပေမယ့် ဒီပွဲမှာတော့ ပြန်လာနိုင်ခဲ့ပါတယ်။
ပွဲအပြီးမှာ ဘယ်လင်ဟမ်က “ယူကရိန်းနဲ့ပွဲက ကစားပုံအတွက် ကျေနပ်အားရမှု မရှိခဲ့ပါဘူး။ ကျွန်တော့်ရဲ့ အကောင်းဆုံးပုံစံနဲ့တောင် နီးစပ်ခဲ့တယ်လို့ မထင်ဘဲ အကောင်းဆုံးပုံစံကို ပြန်ပြနိုင်ဖို့ အမြဲတမ်း စိတ်ဓာတ်တက်ကြွနေပါတယ်။ ဒီညမှာတော့ အကောင်းဆုံးပုံစံနဲ့ နီးစပ်ခဲ့တယ်လို့ ထင်ပါတယ်”
“အခုပွဲက ချစ်ကြည်ရေးခြေစမ်းပွဲထက် ပိုတယ်ဆိုတာကိုလည်း ကျွန်တော် သိပါတယ်” လို့ ပြောကြားသွားခဲ့ပါတယ်။ အင်္ဂလန်ပရိသတ်တွေကတော့ ဘယ်လင်ဟမ်ရဲ့ ခြေစွမ်းကိုရော၊ ပွဲအပြီး ပြောစကားကိုပါ သဘောကျနေပြီး အင်္ဂလန်ကွင်းလယ်အတွက် တောက်ပမယ့် ကြယ်ပွင့်က အဆင်သင့်ရှိနေပြီလို့ ယုံကြည်ထားကြပါတယ်။
ဘယ်လင်ဟမ်ဟာ ရီးရဲလ်မက်ဒရစ်အတွက်လည်း ဒီရာသီအဖွင့်မှာ ဆက်တိုက် ခြေစွမ်းပြနေပြီး အသင်းအတွက် (၄) ပွဲ ကစားပြီးချိန်မှာ (၅) ဂိုးသွင်းယူထားပါတယ်။ အဲ့ဒါကြောင့်လည်း ဘယ်လင်ဟမ်က ပြီးခဲ့တဲ့လရဲ့ လာလီဂါတစ်လတာအကောင်းဆုံး ကစားသမားဆုကို ရရှိခဲ့ပါတယ်။