ရီးရဲလ်မက်ဒရစ်နဲ့ ပြင်သစ်လက်ရွေးစင် တိုက်စစ်မှူး ဘန်ဇီမာဟာ ရီးရဲလ်မက်ဒရစ်ရဲ့ ပွဲစဥ်တွေကို လွဲချော်ခဲ့ခြင်းအတွက် ကလပ်အသင်းရဲ့ ဂန္တဝင်ဟောင်းကြီး ဂူတီရဲ့ ဝေဖန်ပြစ်တင်မှုတွေနဲ့ ရင်ဆိုင်နေရပါတယ်။ ဘန်ဇီမာဟာ အသင်းရဲ့ နောက်ဆုံး သုံးပွဲဆက်တိုက်ကို လွဲချော်ခဲ့ပြီး အသင်းကလည်း နောက်ဆုံးနှစ်ပွဲဆက် နိုင်ပွဲပျောက်ကာ လာလီဂါမှာ အမှတ်ပေးဇယားဦးဆောင်ခွင့်ကို ဘာစီလိုနာထံ လွှဲပေးလိုက်ရပါတယ်။
အသင်းနည်းပြ အန်ဆယ်လော့တီကလည်း ဘန်ဇီမာဟာ ဒဏ်ရာကနေ ပြန်လည်သက်သာလာပြီးနောက် ကြံ့ခိုင်မှုပြည့်ဝလာဖို့ ကြိုးစားနေရဆဲလို့ ကာကွယ်ပေးထားပါတယ်။ ဒါပေမယ့် ဂူတီကတော့ ဒါကို အယုံအကြည်မရှိဖြစ်နေပါတယ်။ ဂူတီက “ဘန်ဇီမာရဲ့ အခြေအနေလား။ ကျနော် သူ့ကို နားမလည်နိုင်ပါဘူး”
“မက်ဆီလည်း ပီအက်စ်ဂျီအတွက် ကစားနေတယ်၊ လီဝန်ဒေါစကီးကလည်း ဘာစီလိုနာအတွက် ကစားပေးနေတုန်းပါ။ အခြားကစားသမားတွေလည်း အတူတူပါပဲ။ ကမ္ဘာ့ဖလားမတိုင်ခင် ဒဏ်ရာရနိုင်ခြေရှိတာကို ခင်ဗျား သေချာပေါက် လက်ခံဖို့ လိုအပ်ပါတယ်။ ကိုယ့်ရဲ့ ကလပ်အသင်းကို ဒုက္ခပေးလို့ မရပါဘူး” လို့ ဝေဖန်ပြောကြားသွားခဲ့ပါတယ်။
အသက် (၃၄) နှစ်အရွယ် ဘန်ဇီမာဟာ ပြီးခဲ့တဲ့ (၂၀၂၁) မှာ ပြင်သစ်လက်ရွေးစင်အသင်းမှာ ပြန်လည် ရွေးချယ်ခံခဲ့ရပါတယ်။ ဒီမတိုင်ခင်မှာ ဘန်ဇီမာက လက်ရွေးစင်အသင်းဖော် ဗယ်လ်ဘူနာကို လိင်ပိုင်းဆိုင်ရာတိပ်ခွေနဲ့ ခြိမ်းခြောက်ခဲ့တယ်လို့ စွပ်စွဲခံခဲ့ရပြီး လက်ရွေးစင်အသင်းကနေ ကာလတခုအကြာ ချန်လှပ်ခံခဲ့ရတာပါ။
ဆက်လက်ပြီးတော့လည်း ဂူတီက “ဒီလိုအခြေအနေမျိုးတွေ ဖြစ်လာနိုင်တာကို ကျနော်တို့လည်း သိခဲ့ပါတယ်။ ရီးရဲလ်မက်ဒရစ်မှာ ဘန်ဇီမာနေရာကို အစားထိုးဖို့မရှိတာလည်း ကျနော် နားမလည်နိုင်ပါဘူး” လို့ ပြောကြားခဲ့ပါတယ်။ ဒက်ချမ့်စ်ရဲ့ ကမ္ဘာ့ဖလားအပြီးသတ် လူစာရင်းမှာ ပါဝင်လာတဲ့ ပူပူနွေးနွေး ဘလွန်းဒီအော်ဆုရှင် ဘန်ဇီမာဟာ ပြင်သစ်လက်ရွေးစင်အသင်းရဲ့ တိုက်စစ်မှာ ပွဲထွက်ဦးဆောင်ရဖွယ်ရှိပြီးဒီအသင်းဟာ ဒိန်းမတ်၊ သြစတြေးလျ၊ တူနီးရှားတို့နဲ့ တအုပ်စုတည်း ကျရောက်လျက်ရှိပါတယ်။