ရီးရဲအသင်းကတော့ လက်ကျန် အချိန်ပို ၅ မိနစ်မှာ ၁၀ ယောက်တည်းနဲ့ ထိန်းကစားသွားခဲ့ပြီး ပင်နယ်တီ အဆုံးအဖြတ်မှာ အနိုင်ရပြီး စပိန်စူပါဖလားကို ဗိုလ်စွဲခဲ့တာပါ။
ပွဲချိန် ၁၁၅ မိနစ်မှာ မိမိအသင်းရဲ့ တိုက်စစ်မှူး မိုရာတာရဲ့ အပိုင်ဂိုးသွင်းခွင့် ရရှိမယ့် အခွင့်အရေးကို အနီကဒ် ရင်းပြီး ဖြတ်ထုတ်ခဲ့တဲ့ ရီးရဲနောက်ခံလူ ဗယ်လ်ဗာဒီက စပိန်စူပါဖလားဗိုလ်လုပွဲရဲ့ အကောင်းဆုံး ကစားသမားလို့ အက်သလက်တီကို မက်ဒရစ်အသင်း နည်းပြ ဒီယေဂို ဆိုင်မွန်က ပြောလာတယ်လို့ Daily Mail သတင်းဌာနက ဖော်ပြလာပါတယ်။
ဗယ်လ်ဗာဒီသာ ဖြတ်မထုတ်ခဲ့ဘူးဆိုရင် မိုရာတာအတွက် ဂိုးသွင်းခွင့် အပြည့်အဝ ရတော့မှာ ဖြစ်ပြီး အခုလို ကြမ်းတမ်းစွာ ဖျက်ထုတ်ခံခဲ့ရမှုအပေါ်မှာတော့ ဆိုင်မွန်က တဖက် ကစားသမားကို ပြစ်တင်ရှုတ်ချခြင်းမရှိတဲ့ အပြင် အကောင်းဆုံး ကစားသမားလို့တောင် ချီးကျူးလိုက်တာပါ။
ဂိုးမရှိ သရေကျနေမှုမှာ လက်ကျန် ၅ မိနစ်ပြီးရင် ပင်နယ်တီ အဆုံးအဖြတ်ခံယူရတော့မှာ ဖြစ်ပေမယ့် မိုရာတာက အခွင့်အရေးကောင်းကို ပိုင်ဆိုင်ခဲ့တာပါ။
ဒါကို ရီးရဲနောက်ခံလူ ဗယ်လ်ဗာဒီက ပင်နယ်တီ စည်းအတွင်းမရောက်ခင် ပါးပါးနပ်နပ် လျောထုတ်ဖျက်ထုတ် လိုက်ပြီး အနီကဒ်နဲ့ ရင်းခဲ့တာပါ။
“ ဒါမျိုးက ပွဲတစ်ပွဲမှာ အရေးကြီးတဲ့ အစိတ်အပိုင်းတစ်ခုပါပဲ။သူအဲ့လို လုပ်လိုက်ချိန်မှာသူ့ကိုကျွန်တော်ပြောလိုက် ပါတယ်။ဒီပွဲရဲ့ အကောင်းဆုံး ကစားသမားက မင်းပဲလို့။ပွဲအပြီးမှာ ရီးရဲနိုင်သွားတယ်လေ။”လို့ ဆိုင်မွန်က ပွဲအပြီး သတင်းစာရှင်းလင်းပွဲမှာ ပြောလိုက်တာပါ။
ပွဲအပြီးမှာတော့ ဗယ်လ်ဗာဒီက ရီးရဲအသင်း ဝက်ဘ်ဆိုဒ်ကတဆင့် - “ တောင်းပန်ပါတယ် မိုရာတာ၊ငါမလုပ်သင့်တဲ့ အရာကို လုပ်လိုက်မိခဲ့တယ်။ဒါပေမယ့် ငါအခုလို လျောထုတ်ဖျက်ထုတ်လိုက်ရတဲ့ တစ်ခုတည်းသော အကြောင်းကလည်း မင်းက အရမ်းမြန်ခဲ့တာကြောင့်ပါ။”လို့ တောင်းပန်စာရေးခဲ့ပါတယ်။
ရီးရဲအသင်း စပိန်စူပါဖလား ရသည့်တိုင် စိတ်ခံစားမှုအဆင်မပြေသေးပဲ သူ့လုပ်ရပ်က မမှန်ကန်ခဲ့ဘူးလို့ ဗယ်လ်ဗ ဒီက ခံစားနေရတယ်လို့လည်း သိရပါတယ်။