လီဗာပူးဘယ်နောက်ခံလူ ရော်ဘတ်ဆန်က အသင်းဖော်တိုက်စစ်မှူးသစ် ဒါဝင်နူနက်ဇ်နဲ့ပတ်သက်လို့ ကာကွယ်ပြောကြားပေးခဲ့ပါတယ်။ အဆိုပါ ဥရုဂွေးတိုက်စစ်မှူးဟာ လီဗာပူးအတွက် ရာသီကြိုခြေစမ်းပွဲနှစ်ပွဲ ကစားပြီးချိန်မှာ တဂိုးမှမသွင်းနိုင်သေးတဲ့အပြင် အပိုင်အခွင့်အရေးတွေကိုလည်း လွဲချော်ခဲ့ပါသေးတယ်။
ဒါ့အပြင် သူ့ရဲ့ကစားပုံက လီဗာပူးနဲ့ အဆင်ပြေပါ့မလားလို့ ပရိသတ်တွေအကြား မေးခွန်းထုတ်မှုတွေရှိလာပြီး ပေါင် (၈၅) သန်းပေးထားရတဲ့ ဒီကစားသမားအတွက် လီဗာပူးတို့ ရောင်းမှားဝယ်မှားဖြစ်ပြီလို့လည်း ပြိုင်ဘက်ပရိသတ်တွေက လှောင်ပြောင်လာပါတယ်။ ဒီကစားသမားဟာ မာနေးနေရာကို အစားထိုးဖို့အတွက် ကလော့ပ် စိတ်ကြိုက်ကစားသမားဖြစ်ခဲ့တာပါ။
ဒါပေမယ့်လည်း ယူနိုက်တက်နဲ့ ဘန်ကောက်မှာကစားခဲ့တဲ့ ခြေစမ်းပွဲမတိုင်ခင် အကြိုလေ့ကျင့်ခန်းအစီအစဥ်တွေမှာတည်းက နူနက်ဇ်တယောက် ဂိုးပေါက်နဲ့လွဲချော်နေခဲ့ပြီး ယူနိုက်တက်နဲ့ပွဲမှာလည်း အပိုင်အခွင့်အရေးတကြိမ်ကို မိုးပေါ်ထောင်ကန်ခဲ့ပါသေးတယ်။ မနေ့က ခရစ္စတယ်ပဲလေ့စ်ကို နှစ်ဂိုးပြတ်နဲ့ အနိုင်ရရှိခဲ့တဲ့ပွဲမှာလည်း နူနက်ဇ်က မျှော်လင့်ထားသလို မဖြစ်ခဲ့ပါဘူး။
လီဗာပူးအသင်းဖော် ရော်ဘတ်ဆန်ကတော့ “ဒါဝင်နူနက်ဇ်က အရပ်ရှည်ပါတယ်။ ခင်ဗျားတို့ သူ ပုံစံကောင်းပြဖို့ အကြာကြီးမစောင့်ရပါဘူး။ ဒါပေမယ့် သူ့အတွက် အသင်းမှာအသားကျဖို့ အချိန်တော့ပေးရပါမယ်။ သူက လေ့ကျင့်ရေးကွင်းမှာဆိုရင် ခြေစွမ်းပြနိုင်ပါတယ်။ ဘရာဇီးသားတွေနဲ့၊ လူတိုင်းနဲ့ ဆက်သွယ်ပြောဆိုနိုင်ပြီး ဒါက သူ့ကို အများကြီး ကူညီပေးမှာပါ”
“သူနဲ့ကျနော်နဲ့ စကားတွေ အများကြီး မပြောရသေးဘူးဆိုပေမယ့် တယောက်နဲ့တယောက်တော့ ပြုံးပြနေတာပါပဲ။ သူက ထူးခြားကောင်းမွန်တဲ့ ကစားသမားပါ။ ကျနော်တို့နဲ့ ပြီးခဲ့တဲ့ရာသီက နှစ်ပွဲထိပ်တိုက်တွေ့ခဲ့ပြီး နောက်ခံလူတွေကို အခက်တွေ့အောင် လုပ်နိုင်ခဲ့ပါတယ်။ သူ့ရဲ့ပုံစံကောင်းကိုသာပြနိုင်ရင် သူက ကျနော်တို့အတွက် တကယ်ကောင်းတဲ့ ကစားသမားဖြစ်လာမှာပါ” လို့ ကာကွယ်ပြောကြားခဲ့ပါတယ်။