ယူနိုက်တက်နည်းပြ တန်ဟက်ခ်က လာမယ့်ရာသီမှာ ရပ်ရှ်ဖို့ဒ်က အကောင်းဆုံးပုံစံကို ပြန်လည်ရရှိလာမှာ ဖြစ်ကြောင်း ပြောကြားလိုက်ပါတယ်။ ဒီအတွက်လည်း ယူနိုက်တက်ရဲ့ လက်ထောက်နည်းပြ နစ္စတယ်ရွိုင်းက ကူညီပေးသွားမယ်လို့ ဆိုခဲ့ပါတယ်။
ယူနိုက်တက်တိုက်စစ်မှူးဟောင်းကြီး နစ္စတယ်ရွိုင်းဟာ လက်ရှိနွေရာသီမှာ ယူနိုက်တက်ရဲ့ လက်ထောက်နည်းပြအဖြစ် အသင်းကို ပြန်ရောက်လာခဲ့တာပါ။ တန်ဟက်ခ်ကလည်း ပြီးခဲ့တဲ့နွေရာသီမှာ ရပ်ရှ်ဖို့ဒ်တစ်ယောက် ရာသီသစ်အတွင်း ဂိုးသွင်းခြေစွမ်းပြမယ် ပြောခဲ့ဖူးပါတယ်။
အခုချိန်မှာလည်း တန်ဟက်ခ်က “နစ္စတယ်ရွိုင်း ဒီမှာရှိနေတာက အသင်းက တိုက်စစ်မှူးတွေကို ကူညီပေးနိုင်ဖို့ဆိုတာ ရှင်းလင်းပါတယ်။ ဒါပေမယ့် သူက ဒီထက် ပိုပြီး လုပ်ပြနိုင်ပါသေးတယ်။ ရပ်ရှ်ဖို့ဒ်ဆိုရင်လည်း သူ့ဘာသာသူ တိုးတက်အောင် လုပ်ရမှာပါ။ ရပ်ရှ်ဖို့ဒ်မှာ လုပ်နိုင်စွမ်းရှိပါတယ်”
“သူက ဂိုးတွေ အများကြီး သွင်းနိုင်ပြီး ဒါမျိုးကို ငယ်ငယ်ရွယ်ရွယ်နဲ့ လုပ်ပြထားတာပါ။ ကျနော် ရပ်ရှ်ဖို့ဒ်အပေါ် (၁၀၀) ရာခိုင်နှုန်းအပြည့် ယုံကြည်ချက်ရှိပါတယ်။ လွန်ခဲ့တဲ့ နှစ်နှစ်က လုပ်ပြခဲ့သလိုမျိုး သူ လာမယ့်နှစ်မှာ ထပ်လုပ်ပြပါလိမ့်မယ်” လို့ ပြောကြားခဲ့ပါတယ်။