အက်သလက်တီကိုမက်ဒရစ်နည်းပြ ဆီမြွန်နီက ယူနိုက်တက်ကို အနိုင်ယူဖြတ်ကျော်ခဲ့တဲ့ ချန်ပီယံလိဂ်ရှုံးထွက် (၁၆) သင်းအဆင့် ပွဲစဥ်အပြီးမှာ သူ့ရဲ့ မဟာပြိုင်ဘက် ရော်နယ်ဒိုနဲ့ပတ်သက်လို့ ထိုးနှက်ပြောကြားသွားခဲ့ပါတယ်။
အိုးထရက်ဖို့ဒ်မှာ ကစားခဲ့တဲ့ ချန်ပီယံလိဂ်ရှုံးထွက် ဒုတိယအကျော့မှာ အက်သလက်တီကိုက လိုဒီရဲ့တလုံးတည်းသောသွင်းဂိုးကြောင့် နှစ်ကျော့ပေါင်းရလဒ် ၂-၁ ဂိုးနဲ့ ကွာတားဖိုင်နယ်အဆင့်ကို တက်ရောက်နိုင်ခဲ့ပါတယ်။ ဒီနှစ်သင်း ထိပ်တိုက်တွေ့ခဲ့ပြီဆိုကတည်းက ရော်နယ်ဒိုနဲ့ဆီမြွန်နီတို့ရဲ့ တချိန်က အားပြိုင်မှုတွေကို မီဒီယာတွေက မီးမောင်းထိုးပြခဲ့ပါတယ်။
ဆီမြွန်နီရဲ့ အက်သလက်တီကိုဟာ ရော်နယ်ဒိုပါဝင်တဲ့ ရီးရဲယ်မက်ဒရစ်ကို ချန်ပီယံလိဂ်မှာ အကြိမ်ကြိမ် အရှုံးပေးခဲ့ရဖူးပါတယ်။ ရော်နယ်ဒို ဂျူဗင်တပ်စ်ကို ရောက်ရှိလာချိန်မှာတောင် သူ့ရဲ့ ဟက်ထရစ်နဲ့ အက်သလက်တီကိုမက်ဒရစ်ကို ချန်ပီယံလိဂ်ရှုံးထွက်အဆင့်ကနေ ထွက်ခွာစေခဲ့ဖူးပါတယ်။
ဒါပေမယ့် ဒီတခေါက် ယူနိုက်တက် ကစားသမားဘဝနဲ့ ဆီမြွန်နီကို ရင်ဆိုင်ခဲ့ချိန်မှာတော့ ရော်နယ်ဒိုတယောက် ရှုံးနိမ့်ခဲ့ရတာဖြစ်ပါတယ်။ ဆီမြွန်နီကတော့ ဒီလိုအခွင့်ကောင်းအခါကောင်းကို စောင့်နေခဲ့တယ်လို့ဆိုရင်လည်း မမှားပါဘူး။
ယူနိုက်တက်ကို အနိုင်ယူပြီးတဲ့နောက်မှာ ဆီမြွန်နီက “ရီးရဲယ်မက်ဒရစ်ရဲ့ အကောင်းစား ကွင်းလယ်သာ မရှိခဲ့ရင် ရော်နယ်ဒိုက သူ့ရဲ့ Tap-in သွင်းဂိုးတွေနဲ့ အက်သလက်တီကို,ကို ဖြုတ်ချလို့ရမှာမဟုတ်ပါဘူး။ အဲ့ဒါတွေသာမရှိရင် သူက ဘာမှမဟုတ်ဘူးဆိုတာကို အခု ဒီနေ့ပွဲက သက်သေပြသခဲ့ပါတယ်” လို့ ပြောကြားသွားခဲ့ပါတယ်။
ဆီမြွန်နီရဲ့ ပြောစကားက ယူနိုက်တက် အသင်းဖော်တွေကိုပါ ထိုးနှက်သွားခဲ့တာဖြစ်ပါတယ်။ မနေ့က ကစားခဲ့တဲ့ပွဲမှာလည်း ယူနိုက်တက်ကွင်းလယ်က တွမ်မီနေး၊ ဖရက်ဒ်၊ ဘရူနိုဖာနန်ဒက်စ်တို့ရဲ့ ခြေစွမ်းတွေက အားရစရာမရှိခဲ့ဘဲ ရော်နယ်ဒိုလည်း ဂိုးပေါက်ပျောက်၊ ယူနိုက်တက်လည်း ချန်ပီယံလိဂ်က ထွက်ခဲ့ရပါတယ်။