ကျောက်မြောင်းထဲက လက်ရာကောင်းကောင်းနဲ့ ရခိုင်မုန့်တီကို ညွှန်းပါဆိုရင်တော့ သတိပဌာန်လမ်းထိပ်နားက ငြိမ်းချမ်းအေး ရခိုင်မုန့်တီဆိုင်လေးကိုပဲ ညွှန်းရမှာပါပဲ။
၂၀၀၀ခုနှစ်ကတည်းက စဖွင့်ခဲ့တဲ့ဆိုင်လေး
ဒီငြိမ်းချမ်းအေး ရခိုင်မုန့်တီဆိုင်ကိုတော့ ၂၀၀၀ ခုနှစ်က စတင်ဖွင့်ခဲ့တာပါ။ အဲဒီအချိန်တုန်းကတော့ စီးပွားရေးတွေအဆင်မပြေလို့ ဒီဆိုင်လေးကို ဖွင့်လိုက်တာလို့ သိရပါတယ်။ ဆိုင်က ခုလို စားပွဲခုံလေးတွေနဲ့ မဟုတ်ဘဲ လမ်းဘေးဆိုင်လေးဖြစ်ပြီး ရခိုင်မုန့်တီ တစ်ပွဲကို ၂၅ ကျပ်နဲ့ ရောင်းချခဲ့ပြီး တစ်ရက်ကို ၂ပိဿ ၃ ပိဿသာ ရောင်းရတယ်လို့ ဆိုပါတယ်။ ခုချိန်မှာတော့ ရခိုင်မုန့်တီတစ်ပွဲကို ၈၀၀ ကျပ်ဖြစ်နေပါပြီ။
အဓိပ္ပါယ်ရှိတဲ့ ငြိမ်းချမ်းအေး ဆိုတဲ့ ဆိုင်နာမည်လေး
ယခုဆိုင်ပိုင်ရှင် မချောစုအေး ရဲ့ မိဘနှစ်ပါးက ရခိုင်ကနေ ရန်ကုန်ကို တက်လာပြီး ဖွင့်ခဲ့တဲ့ ဆိုင်ကလေးဖြစ်ပြီး ငြိမ်းချမ်းအေး ဆိုတဲ့ ဆိုင်နာမည်ကိုတော့ မိခင်ဖြစ်သူက ပေးခဲ့တာလို့ သိရပါတယ်။ ဆင်းရဲပြီး မငြိမ်းမချမ်းဖြစ်နေတဲ့ ဘဝကနေ ငြိမ်းချမ်းတဲ့ ဘဝလေးရရှိအောင် ဖွင့်ခဲ့တဲ့ ရခိုင်မုန့်တီဆိုင်ကလေးဖြစ်လို့ ငြိမ်းချမ်းအေးလို့ နာမည်ပေးခဲ့တာလို့ ဆိုင်ပိုင်ရှင် မချောစုအေးက ပြောပါတယ်။
မိသားစုအတွက် အထောက်အပံ့အများကြီးပေးခဲ့တဲ့ ရခိုင်မုန့်တီဆိုင်ကလေး
ဆိုင်လေးက ရရှိတဲ့ ဝင်ငွေဟာ မိသားစုရဲ့ စားဝတ်နေရေး သာမက ပညာရေး ၊ လူမှုရေး ၊ ကျန်းမာရေး ကိစ္စအဝဝကို စီမံနိုင်ခဲ့တာဖြစ်ကြောင်း ဆိုင်ရှင်က ဆိုပါတယ်။
တစ်နေ့တာ ရောင်းရမှုနှုန်း
“တစ်နေ့တာရောင်းရတာတော့ မုန့်ဖတ်ဆို အချိန် ၂၅ ပိဿကုန်တယ်။ ပဲကြာဆံတို့ ၊ ခေါက်ဆွဲတို့ မပါသေးဘူး။ အကုန်လုံးရောင်းရတာကတော့ တစ်နေ့ကို ငါးသိန်းကျော် ခြောက်သိန်းနီးပါး လောက် ရောင်းရတယ်” လို့ ဆိုင်ရှင် မချောစုအေးက ပြောပြပါတယ်။
ရရှိနိုင်တဲ့ စားဖွယ်စုံ
ငြိမ်းချမ်းအေး ဆိုင်ကလေးကနေ ရခိုင်မုန့်တီ အရည်၊ အသုပ် ၊ ပဲကြာဇံသုပ် ၊ ခေါက်ဆွဲသုပ် ၊ သနပ်စုံသုပ် ၊ သင်္ဘောသီးသုပ်၊ ပြည်ကြီးငါးသုပ်၊ ပုဇွန်သုပ် ၊ ငါးနီတူသုပ်၊ ငါးဖယ်သုပ် ၊ ငါးဖယ်အစာသွတ်၊ ထမင်းသုပ် နဲ့ မုန့်ခေါပြင် ၊ လှော်စာတို့ ရရှိနိုင်ပါတယ်။
Delivery နဲ့လည်း မှာယူစားသုံးနိုင်ပါတယ်။ Foodpanda , Grab စတာတွေကနေလည်း မှာယူနိုင်သလို ဖုန်းဆက်ပြီး မှာယူလို့လည်းရပါတယ်။
ရခိုင်စာကောင်းကောင်းလေးစားချင်သူတွေအတွက် တာမွေမြို့ ၊ ကျောက်မြောင်း ၊ သတိပဌာန်လမ်းထိပ်က ငြိမ်းချမ်းအေး ရခိုင်မုန့်တီဆိုင်လေးကို လက်တို့လိုက်ပါရစေ။