ပြည်ပကတင်သွင်းလာတဲ့ ကုန်ပစ္စည်း၊ ပြည်တွင်းမှာ ထုတ်လုပ်နေတဲ့ ကုန်ပစ္စည်းတွေမှာ ပါဝင်တဲ့ အညွှန်းစာတွေကို မြန်မာဘာသာနဲ့ ဖော်ပြဖို့အတွက် စီးပွားကူးသန်းဝန်ကြီးဌာန စားသုံးသူရေးရာ ဦးစီးဌာနကနေ ညွှန်ကြားသွားမှာဖြစ်တယ်လို့ စားသုံးသူရေးရာဦးစီးဌာန ညွှန်ကြားရေးမှူး ဦးဆွေတင့်ကြူးက ပြောပါတယ်။ အောက်တိုဘာ ၅ ရက်က ပြုလုပ်ခဲ့တဲ့ ကျန်းမာရေးနဲ့ ညီညွတ်ပြီး ဘေးအန္တာရယ်ကင်းရှင်းတဲ့ စားသောက်ကုန်များဆီသို့ ဆွေးနွေးပွဲ မှာ ပြောကြားခဲ့ပါတယ်။
အဆိုပါ ညွှန်ကြားချက်ကို မကြာခင်မှာ ထုတ်ပြန်သွားမှာဖြစ်ပြီးတော့ ကြေညာစာ ထုတ်ပြီး ၆ လ ပြည့်တဲ့နောက်မှာ အာဏကာသက်ရောက်မှာ ဖြစ်ပါတယ်။
“ နောက်ပိုင်းမှာကျန်းမာရေးနဲ့ညီညွှတ်တဲ့အစားအသောက်တွေဖြစ်ဖို့အတွက် ပြည်ပကသွင်းတဲ့စားသောက်ကုန်တွေမှာ အညွှန်းစာတွေကို မြန်မာနဲ့ဖော်ပြဖို့ လုပ်ဆောင်မှာပါ " လို့သူကပြောပါတယ်။
စည်းကမ်းမလိုက်နာတဲ့ စီးပွားရေးလုပ်ငန်းရှင်တွေကိုတော့ စားသုံးသူရေး အကာကွယ်ပေးရေးဥပဒေအရအရေးယူခံရမယ်လို့ သိရပါတယ်။ ဒါ့အပြင် ကျန်းမာရေးနဲ့ ညီညွတ်တဲ့ အစားအသောက်တွေဖြစ်လာစေဖို့ တိုင်းနဲ့ ပြည်နယ်တွေမှာ ရွှေ့လျား ဓာတ်ခွဲခန်း ၁၄ ခု ထားရှိမယ်လို့ ကျန်းမာရေးနဲ့ အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးက အဆိုပါ အခမ်းအနားမှာပြောခဲ့ပါတယ်။
ဒါ့အပြင် ပြည်တွင်း၊ပြည်ပက တင်သွင်းတဲ့ မည်သည့်စားသောက်ကုန်ကိုမဆို စစ်းဆေးနိုင်ရန် အစားအသောက် စစ်ဆေးရေး ဓာတ်ခွဲခန်းကို ဗိုလ်ချိုလမ်းမှာရှိတဲ့စက်မှုဝန်ကြီးဌာနမှာ ဖွင့်လှစ်သွားဖို့ စီစဉ်နေတယ်လို့ စားသောက်ကုန်ထုတ်လုပ်တင်ပို့ရောင်းချသူများအသင်းကသိရပါတယ်။