သြဂုတ်လအတွင်းဖြစ်ပွားခဲ့တဲ့ ဆွာတမံ ရေပိုလွှဲပဲကျပြီး ကျေးရွာတော်တော်များများ ရေလွှမ်းခံလိုက်ရပြီးနောက်မှာ စိုက်ပျိုးရေး၊ မွေးမြူရေးနဲ့ ဆည်မြောင်းဝန်ကြီးဌာနအနေနဲ့ တစ်နိုင်ငံလုံးမှာရှိတဲ့ ဆည်တွေ တမံတွေရဲ့ ကြံ့ခိုင်မှုကို စစ်ဆေးမှုတွေပြုလုပ်နေပြီဖြစ်ပါတယ်။
ပြီးခဲ့တဲ့ သြဂုတ်လ ၂၉ ရက်နေ့က ဆွာတမံ ရေပိုလွှဲနေရာက ကျိုးပျက်ပြီး ကျေးရွာ ၈၅ ခုလောက်ရေလွှမ်းခံလိုက်ရပြီးနောက်မှာ အစိုးဖက်က ဆည်မြောင်းကျွမ်းကျင်သူတွေက နေ့စဉ် ဆည်တာတမံ လေးခုလောက်ကို လိုက်လံစစ်ဆေးမှုတွေပြုလုပ်နေတယ်လို့ ဆည်မြောင်းတာဝန်ရှိသူက Duwun ကို အောက်တိုဘာ ၅ ရက်နေ့ကပြောပါတယ်။
"ဆည်တမံတွေ တော်တော်များများကတော့ ငလျှင်နဲ့အခြားဒဏ်တွေ ခံနိုင်ရည်ရှိအောင်တည်ဆောက်ထား့ပါတယ်။ စစ်ဆေးမှုတွေပြီးရင်တော့ ပြင်ဆင်စရာရှိတာတွေ ဘာတွေလည်းရှိလာနိုင်ပါတယ်။"လို့ သူကပြောပါတယ်။
Photo: Facebook/Myanmar Fire Services Department
ဒီအထူးစုံစမ်းစစ်ဆေးမှုတွေကို စက်တင်ဘာ လလည်လောက်ကတည်းက စတင်ဆောက်ရွက်နေတာဖြစ်ပါတယ်။ မြန်မာနိုင်ငံမှာ တမံပေါင်း ၂၃၅ ခုရှိတာကြောင့် အဖွဲ့ ၄ ဖွဲ့နဲ့ လိုက်လံ စစ်ဆေးနေပြီး လိုအပ်ချက်တွေ၊ ပြုပြင်ရမယ့် အရာတွေနဲ့ ကုန်ကျစရိတ်တွေကိုလည်း တွက်ချက်ကြမှာဖြစ်ပါတယ်။
ဆွာတမံ ရေပိုလွှဲပဲ့ကျတဲ့ ဖြစ်စဉ်ကြောင့် လူပေါင်း ၆၃၀၀၀ လောက်အိုးမဲ့အိမ်မဲ့ဖြစ်ခဲ့ရပြီး ကျေးရွာပေါင်း၈၀ ကျော်ရေမြုပ်ခဲ့ပါတယ်။ ဒါ့အပြင် ရန်ကုန် - မန္တလေး အမြန်လမ်းမှာ ရေကျော်ပြီး တံတားနိမ့်ကျတာတွေနဲ့ ရထားလမ်းပျက်စီးတာတွေကြောင့် ခရီးသွားလာရေးတွေ ရပ်ဆိုင်းခဲ့ရပါသေးတယ်။