လီဗာပူးအသင်းရဲ့ ကြယ်ပွင့်တိုက်စစ်မှူး မိုဟာမက်ဆာလာက တွစ်တာအကောင့်မှာ ထုတ်ပြန်ချက်တစ်စောင်ကို ရေးသားခဲ့ပြီး ယင်းစာထဲမှာ မိုဟာမက်ဆာလာက ၎င်းရဲ့စာတွေကို ဘာကြောင့် အီဂျစ်ဘောလုံးအဖွဲ့ချုပ်က ဆက်လက်ပြီး လစ်လျူရှုထားတာလဲလို့ မေးခွန်းထုတ်ခဲ့ပါတယ်။
မိုဟာမက်ဆာလာဟာ အီဂျစ်ဘောလုံးအဖွဲ့ချုပ်ဆီက အဖြေကို တောင်းဆိုခဲ့ပြီး နိုင်ငံအုပ်ချုပ်ရေးအဖွဲ့အစည်းကိုလည်း ဆက်လက်ပြီး တောင်းဆိုသွားမယ်လို့ သိရပါတယ်။ မိုဟာမက်ဆာလာဟာ အရင်တုန်းကလည်း အီဂျစ်ဘောလုံးအဖွဲ့ချုပ်ကို ၎င်းရဲ့ပုံရိပ်အသုံးပြုခွင့်ပြဿနာနဲ့ပတ်သက်ပြီး ပြောကြားခဲ့ဖူးပါတယ်။
လီဗာပူအသင်းရဲ့ကြယ်ပွင့်ကစားသမား မိုဟာမက်ဆာလာဟာ ချန်ပီယံလိဂ်ဗိုလ်လုပွဲမှာရရှိခဲ့တဲ့ ပုခုံးဒဏ်ရာကနေ ပြန်လည်သက်သာလာပြီးနောက် အီဂျစ်အသင်းအတွက် ၂၀၁၈ ကမ္ဘာ့ဖလားပြိုင်ပွဲမှာ စွမ်းဆောင်ရည်ကောင်း မပြသနိုင်ခဲ့သူဖြစ်ပါတယ်။ အီဂျစ်ဘောလုံးအဖွဲ့ချုပ်ဟာ မိုဟာမက်ဆာလာရဲ့တရားဝင်စပွန်ဆာဖြစ်တဲ့ ဗိုဒါဖုန်းကုမ္ပဏီရဲ့ပြိုင်ဘက်ဖြစ်တဲ့ WE ရဲ့စပွန်ဆာကို ရယူပြီး အီဂျစ်အသင်းရဲ့လေယာဉ်မှာ မိုဟာမက်ဆာလာရဲ့ရုပ်ပုံပါဝင်တဲ့ အီဂျစ်လက်ရွေးစင်အသင်းပုံကို အသုံးပြုခဲ့မှုကြောင့် ယခုနှစ်အစောပိုင်းမှာ ဆာလာနဲ့ ပြဿနာဖြစ်ခဲ့ပါသေးတယ်။
လက်ရှိအချိန်မှာ ဆာလာနဲ့ အီဂျစ်ဘောလုံးအဖွဲ့ချုပ်ရဲ့ကြားက နောက်ထပ်တင်းမာမှု ဖြစ်လာစေမယ့် ကိစ္စရပ်တစ်ခုကို အီဂျစ်ဘောလုံးအဖွဲ့ချုပ်က ထပ်မံပြုလုပ်ခဲ့တာဖြစ်ပါတယ်။ အီဂျစ်ဘောလုံးအဖွဲ့ချုပ်ဟာ အငြင်းပွားဖွယ်ရာ ချီချန်ခေါင်းဆောင်တစ်ဦးဖြစ်တဲ့ ရမ်ဇန်ကာဒီရော့ဗ်ရဲ့ နိုင်ငံရေးအမြတ်ထုတ်မှုမှာ မိုဟာမက်ဆာလာရဲ့ ရုပ်ပုံကို အသုံးချခွင့်ပေးခဲ့တာဖြစ်ပါတယ်။
ပြီးခဲ့တဲ့လက မိုဟာမက်ဆာလာက လက်ရွေးစင်အသင်းကို ပြောင်းလဲဖို့လိုအပ်ပြီလို့ ပြောကြားပြီးနောက် အီဂျစ်ဘောလုံးအဖွဲ့ချုပ်ရဲ့ အမှုဆောင်မန်နေဂျာ သာဝပ်ဆွေလန်က မိုဟာမက်ဆာလာနဲ့ပတ်သက်တဲ့ကိစ္စကို ဖြေကြားဖို့ ငြင်းဆန်ခဲ့ပါတယ်။ မိုဟာမက်ဆာလာဟာ လာမယ့်လမှာ လက်ရွေးစင်အသင်းနည်းပြသစ် ဇေးဗီးယားအဂီရာရဲ့လက်အောက်မှာ ၂၀၁၉ အာဖရိကဖလား ခြေစစ်ပွဲအတွက် နိုင်ဂျီးရီးယားအသင်းနဲ့ယှဉ်ပြိုင်ဖို့ အီဂျစ်ကို ပြန်လာမှာဖြစ်ပါတယ်။
ဒါပေမယ့် ယင်းပွဲစဉ်မှာ မိုဟာမက်ဆာလာ ပါဝင်ဖို့အတွက် အခက်အခဲရှိနိုင်ပြီး ယမန်နေ့က မိုဟာမက်ဆာလာဟာ ၎င်းရဲ့တွစ်တာအကောင့်ကနေတစ်ဆင့် အီဂျစ်ဘောလုံးအဖွဲ့ချုပ်ကို မေးခွန်းထုတ်ခဲ့ပါတယ်။
"ဘောလုံးအဖွဲ့ချုပ်အနေနဲ့ ကစားသမားတွေရဲ့ ပြဿနာကို ဖြေရှင်းပေးဖို့အတွက် အဖြေရှာပေးတာဟာ သာမန်ကိစ္စဖြစ်ပါတယ်။ အဲဒါဆို သူတို့အနေနဲ့ သက်တောင့်သက်သာဖြစ်တယ်လို့ ခံစားရမှာပါ"
"ဒါပေမယ့် တကယ်တမ်းတော့ ကျွန်တော် မြင်နေရတာက လုံးဝကို ဆန့်ကျင်ဘက်ပါပဲ။ ကျွန်တော့်ရဲ့စာတွေနဲ့ ကျွန်တော့်ရှေ့နေ့ရဲ့စာတွေကို လစ်လျူရှုထားတာ သာမန်တော့မဟုတ်ပါဘူး"
"ဘာကြောင့် ဒါတွေဖြစ်နေလဲဆိုတာ ကျွန်တော် နားမလည်ပါဘူး။ ကျွန်တော်တို့ကို တုံ့ပြန်ဖို့ အချိန်ရှိရဲ့လား"လို့ ရေးသားခဲ့ပါတယ်။
Share
Copyright © 2020 Duwun.