အီတလီလက်ရွေးစင် အသင်းရဲ့ ဝါရင့် နောက်ခံလူကြီး ဘိုနူချီက (၂၀၂၂) ကာတာကမ္ဘာ့ဖလားပြိုင်ပွဲကို အီတလီတို့ ဝင်ရောက်ယှဥ်ပြိုင်ခွင့်မရတဲ့အပေါ် ကပ်သီးကပ်သပ်ဝေဖန်ပြောကြားလိုက်ပါတယ်။ အီတလီဟာ ခြေစစ်ပွဲအုပ်စုအဆင့်မှာ ဒုတိယသာရခဲ့တာကြောင့် ပလေးအော့ဖ် ကစားခဲ့ရပါတယ်။
ပလေးအော့ဖ် အိမ်ကွင်းပွဲမှာ အီတလီတို့ မထင်မှတ်ဘဲ မြောက်မက်ဆီဒိုးနီးယားကို အိမ်ကွင်းမှာတင် ရှုံးနိမ့်ခဲ့တာကြောင့် ကာတာကမ္ဘာ့ဖလားနဲ့ လွဲချော်ခဲ့တာပါ။ အီတလီဟာ ခြေစစ်ပွဲအုပ်စုအဆင့်မှာ (၈) ပွဲကစားပြီး ရှုံးပွဲလုံးဝမရှိခဲ့တဲ့အသင်းပါ။ ဒါပေမယ့် ဆွစ်ဇာလန်က သူတို့ကိုကျော်ကာ အုပ်စုပထမနဲ့ ခြေစစ်ပွဲ တိုက်ရိုက်အောင်မြင်ခဲ့ပါတယ်။
အီတလီကတော့ (၂၀၀၆) ကမ္ဘာ့ဖလားမှာ ဗိုလ်စွဲပြီးတည်းက (၂၀၁၀) နဲ့ (၂၀၁၄) ကမ္ဘာ့ဖလားတို့မှာ ပြိုင်ပွဲရဲ့ အုပ်စုကနေ ထွက်ခဲ့ရပါတယ်။ အခု နောက်ဆုံး (၂၀၁၈) နဲ့ (၂၀၂၂) မှာတော့ ခြေစစ်ပွဲတောင် မအောင်ဘဲ အခြေအနေဆိုးခဲ့ရတာပါ။ ခြေစစ်ပွဲ အုပ်စုအဆင့်မှာ ရှုံးပွဲမရှိဘဲ ကာတာကမ္ဘာ့ဖလားနဲ့ လွဲချော်ခဲ့တဲ့အပေါ် ဘိုနူချီက အခုလိုပဲ ဝေဖန်လာပါတယ်။
ဘိုနူချီက “အရာအားလုံးက တပွဲတည်းနဲ့ ဆုံးဖြတ်သွားခဲ့ပါတယ်။ တကယ်ကို အဓိပ္ပာယ်မဲ့တဲ့ ကိစ္စပါ။ အခြားအသင်းတွေကျတော့ လေးပွဲ၊ ငါးပွဲလောက်ရှုံးပြီး ခြေစစ်ပွဲအောင်သွားပါတယ်။ ကျနော်တို့ကျတော့ မိနစ် (၉၀) ရဲ့ အချိန်ပိုနှစ်မိနစ်မှာ ဂိုးပေးရပါတယ်”
“အဲ့ဒီမှာတင် အရာအားလုံး ပြီးဆုံးသွားပါတယ်။ တကယ်ကို ရှင်းရှင်းလင်းလင်းကြီး ရူးမိုက်တဲ့ဖြစ်ရပ်တခုပါ” လို့ ပြောကြားသွားခဲ့ပါတယ်။ အီတလီဟာ ယူရို- ၂၀၂၀ မှာ ဗိုလ်စွဲခဲ့ပေမယ့် အဲ့ဒီပြိုင်ပွဲကြီးအပြီး (၈) လအကြာမှာပဲ ကမ္ဘာ့ဖလားနဲ့ လွဲချော်သွားခဲ့တာဖြစ်ပါတယ်။