ယူနိုက်တက်ကတော့ လိုင်လီနောက်ခံလူ ဒီနိုင်းယိုရိုကို ခေါ်ယူနိုင်ခဲ့ပြီဖြစ်ပါတယ်။ အသက် (၁၈) နှစ်အရွယ် အဆိုပါ နောက်ခံလူအတွက် ယူနိုက်တက်တို့ ယူရိုသန်း (၆၀) အထိ ပေးချေခဲ့ရတာပါ။
ဒါ့အပြင် အပိုဆုကြေး ယူရို (၁၂) သန်းလည်း ပါဝင်ခဲ့ပြီး ယိုရိုက ဒီနေ့မှာပဲ အသင်းရဲ့ ကစားသမားဖြစ်လာတော့မှာပါ။ ယူနိုက်တက်ဟာ အဆိုပါ နောက်ခံလူကို ရီးရဲလ်မက်ဒရစ်၊ ပီအက်စ်ဂျီတို့နဲ့ အပြိုင်အဆိုင် ခေါ်ယူခဲ့ရတာလည်း ဖြစ်ပါတယ်။
ယိုရိုအတွက် ရီးရဲလ်က ပြောင်းရွှေ့ကြေး ယူရိုသန်း (၃၀)၊ ပီအက်စ်ဂျီက ပြောင်းရွှေ့ကြေး ယူရို (၄၅) သန်းအထိသာ ပေးဖို့ စီစဉ်ခဲ့တာပါ။ ဒါပေမယ့် ယူနိုက်တက်ဘက်က ပြောင်းရွှေ့ကြေးပိုပေးခဲ့တာကြောင့် ကစားသမားကို အသင်းပြောင်းဖို့ လိုင်လီဘက်ကလည်း ဖိအားပေးခဲ့ပါတယ်။
ယိုရိုဟာ ရီးရဲလ်ကို ပြောင်းရွှေ့ဖို့အတွက်သာ စိတ်အားထက်သန်ခဲ့ပေမယ့် သူ့ရဲ့ အေးဂျင့်အဖွဲ့ဝင်တွေနဲ့ လိုင်လီဘက်က ယိုရိုကို ယူနိုက်တက်ဆီသာ ပြောင်းရွှေ့ဖို့ တွန်းအားပေးခဲ့တာပါ။ အဲ့ဒါကြောင့်လည်း ယိုရိုတစ်ယောက် ယူနိုက်တက်ကို ရောက်လာခဲ့ပြီး ပရိသတ်တွေကတော့ အသင်းရဲ့ အပြောင်းအရွှေ့ လှုပ်ရှားမှုအပေါ် ကျေနပ်အားရနေကြပါတယ်။