တန်ဖိုးနည်းဖုန်းကိုင်ချင်သူတွေအတွက် Google နဲ့ Jio ပေါင်းထုတ်ထားတဲ့ အိန္ဒိယဘက်ဂျက်ဖုန်း ထွက်လာပြီ ဖြစ်ပါတယ်။
JioPhone Next နာမည်နဲ့ ဒီဖုန်းကို ဩဂုတ်လကုန်ပိုင်းက ဈေးကွက်ထဲ ရောင်းချမယ်လို့ ယူဆခဲ့တာပါ။ ဇွန်လထဲမှာ ကြေညာခဲ့တဲ့ JioPhone Next မှာ Google ရဲ့ အသံအခြေပြု AI အကူနည်းပညာ Google Assistant ၊ Screen ပေါ်က စာသားတွေကို အလိုအလျောက် အသံထွက်ဖတ်ပြမယ့်စနစ် ၊ ဘာသာပြန်စနစ် နဲ့ စမတ်ကင်မရာတစ်လုံး ပါမယ်လို့ Google CEO ဆွန်ဒါပီချိုင်းက ဆိုပါတယ်။
Photo: Google India
မျက်နှာပြင် ၅.၄၅ လက်မ JioPhone Next ဟာ 720 x 1440p ရုပ်ထွက်ပါရှိပြီး ဖြုတ်/တပ်နိုင် 3500mAh ဘက်ထရီ ၊ RAM 2GB/32GB storage နဲ့ လာပါတယ်။ Quadcore Snapdragon QM215 processor သုံးပြီး dual SIM LTE support ပေးထားပါတယ်။ ဆော့ဖ်ဝဲလ်ပိုင်းမှာ PragatiOS လို့ ခေါ်တဲ့ အန်းဒရိုက်ဗားရှင်းနဲ့ လာပြီး ရူပီး ၆၅၀၀ (မြန်မာငွေ ၁ သိန်းခွဲကျော်) ဈေးနဲ့ ရောင်းချသွားမယ်လို့ ဆိုပါတယ်။
"JioPhone Next ဟာ အိန္ဒိယအတွက် ဒီဇိုင်းထုတ်ထားတဲ့တန်ဖိုးသင့်စမတ်ဖုန်းပါ။ ရည်ရွယ်ချက်က အိန္ဒိယမှာ ရှိတဲ့လူတိုင်း အင်တာနက်က ဖန်တီးပေးတဲ့ အခွင့်အလမ်းတွေကနေ အကျိုးရှိစေဖို့ ဖြစ်ပါတယ်။" လို့ Google CEO က ပြောပါတယ်။
"ဒီဖုန်းကို တည်ဆောက်ဖို့ ကျွန်တော်တို့အဖွဲ့တွေဟာ ရှုပ်ထွေးတဲ့ ဖွဲ့စည်းတည်ဆောက်ပုံနဲ့ ဒီဇိုင်းစိန်ခေါ်ချက်တွေ အတူတူ လက်တွဲဖြေရှင်းခဲ့ကြတယ်။ ဒီထုတ်ကုန်ကို သန်းနဲ့ချီတဲ့လူတွေ အသုံးပြုပြီး သူတို့ရဲ့ဘဝနဲ့ လူမှုအသိုင်းအဝိုင်းကို ဘယ်လိုပိုကောင်းအောင် လုပ်ဆောင်သွားသလဲဆိုတာ တွေ့ရဖို့ စိတ်လှုပ်ရှားနေပါတယ်။ "
JioPhone Next မော်ဒယ်ကို ဝယ်မယ့် အိန္ဒိယဖောက်သည်တွေဟာ JioMart နဲ့ Jio site တွေမှာ မှာယူနိုင်မယ်လို့ ဆိုပါတယ်။ Jio Platforms ဟာ ဒုတိယသုံးပတ် အသားတင်အမြတ်ငွေ နှစ်အလိုက် ၂၅% မြင့်တက်ပြီး ဒေါ်လာ ၅၀၂ သန်း ရခဲ့တယ်လို့ဆိုပါတယ်။