မာဆေးဆိုက်ဒ်ဒါဘီပွဲရလဒ်ကြောင့်ပဲ နှစ်သင်းလုံးရဲ့ ကံကြမ္မာက ဆန့်ကျင်ဘက် လားရာဆီ ဦးတည်ခဲ့ပါတယ်။ လီဗာပူးကတော့ ဒီရလဒ်ကြောင့် ပရီးမီးယားလိဂ်ချန်ပီယံဆုအတွက် မျှော်လင့်ချက်ရှိနေဆဲဖြစ်ပြီး အဲဗာတန်ကတော့ တန်းဆင်းဇုန်က လွတ်ဖို့ နောက်ပွဲတွေမှာ နည်းနည်းတောင် အမှားခံလို့မရတော့ပါဘူး။
ချန်ပီယံလိဂ်ရှိနေပေမယ့် လီဗာပူးကတော့ မာနေး၊ ဆာလာ၊ ဂျိုတာတို့နဲ့အတူ ရှေ့၊ လယ်၊ နောက် လူစုံပါဝင်ခဲ့ပါတယ်။ တန်းကျန်ရစ်ဖို့ ကြိုးစားရမယ့် လမ်းပတ်ရဲ့ အဲဗာတန်ကလည်း ရစ်ချာလီဆန်၊ ဂရေး၊ ဂေါ်ဒွန်၊ အီဝိုဘီ၊ ဒိုကိုရီ၊ ကိုးလ်မန်း၊ မိုက်ကယ်ကင်းတို့နဲ့ လီဗာပူးကို မာမာထန်ထန် တုံ့ပြန်နိုင်ဖို့ ကြိုးစားခဲ့ပါတယ်။
ပွဲချိန်တွင်းမှာလည်း အဲဗာတန်က လီဗာပူးကို ပိတ်ကစားရုံဘဲမဟုတ်ဘဲ ဂေါ်ဒွန်၊ အီဝိုဘီ၊ ရစ်ချာလီဆန်တို့ရဲ့ တိုးအားတွေနဲ့အတူ တန်ပြန်တိုက်စစ်ကနေ ဂိုးရအောင် ကြိုးစားခဲ့ပါတယ်။ မာဆေးဆိုက်ဒ်ဒါဘီဆိုတဲ့အတိုင်း နှစ်ဖက်ကစားသမားတွေအကြား ထိတွေ့မှုတွေလည်းရှိခဲ့ပြီး ပွဲကမြိုင်ခဲ့ပါတယ်။
အထူးသဖြင့် ပထမပိုင်းပြီးခါနီးဖြစ်ပွားခဲ့တဲ့ရန်ပွဲမှာ ပြိုင်ဘက်မျက်နှာကို လှမ်းရိုက်ခဲ့တဲ့ မာနေး အထုတ်မခံရတာ ကံကောင်းခဲ့တယ်ဆိုရမှာပါ။ ပထမပိုင်းတပိုင်းလုံးမှာတော့ နှစ်သင်းလုံးက ဂိုးပေါက်တည့်အောင် ခြိမ်းခြောက်နိုင်ခဲ့တာမျိုးမရှိပါဘူး။ ဒုတိယပိုင်းမှာတော့ ပွဲက ပိုကြည့်ကောင်းလာခဲ့သလို ကလော့ပ်ကလည်း ဒီယက်ဇ်၊ အိုရီဂီတို့ကိုထည့်ပြီး အပြောင်းအလဲလုပ်ခဲ့ပါတယ်။
ဒီအပြောင်းအလဲက ချက်ချင်းထိရောက်ခဲ့တယ်လို့ဆိုရမှာဖြစ်ပြီး အိုရီဂီက ဆာလာကို ချအပေး၊ ဆာလာ ‘မ’ တင်ပေးလိုက်တဲ့ ဘောလုံးကို ရော်ဘတ်ဆန်က ခေါင်းတိုက်ပိတ်သွင်းခဲ့ပါတယ်။ အဲဗာတန် ဘယ်ခြမ်းတိုက်စစ်က ဂေါ်ဒွန်ရဲ့ ရုန်းအားပြေးအားကိုလည်း လီဗာပူးနောက်တန်းက အာနိုးလ်၊ မာတစ်ပ်တို့ ခက်ခက်ခဲခဲ ထိန်းချုပ်ခဲ့ရပါတယ်။
(၈၅) မိနစ်မှာတော့ လီဗာပူးတို့ အနိုင်သေချာစေမယ့် ဂိုးထပ်ရခဲ့ပါတယ်။ ဒီဂိုးကိုတော့ လူးဝစ်ဒီယက်ဇ်ရဲ့ လှပတဲ့ နောက်ပြန်ကန်ချက်ကတဆင့် အိုရီဂီက ထပ်ဆင့်ခေါင်းတိုက်သွင်းယူခဲ့တာကြောင့် လီဗာပူးတို့ နှစ်ဂိုးပြတ်နဲ့ အနိုင်ရရှိခဲ့ပါတယ်။
ဒီရလဒ်ကြောင့်ပဲ အဲဗာတန်ကတော့ တန်းဆင်းဇုန်ရဲ့ အဆင့် (၁၈) နေရာမှာသာရှိနေခဲ့ပြီး အဆင့် (၁၇) က ဘန်လေကို ကျော်နိုင်ဖို့ဆိုရင် ပွဲကျန်တပွဲအပြင် လက်ကျန်ပွဲအားလုံးကို မဖြစ်မနေ အနိုင်ကစားရတော့မှာပါ။ လီဗာပူးကတော့ ချန်ပီယံဆုအတွက် မန်စီးတီးကို တမှတ်အကွာနဲ့ ဖိအားပေးထားနိုင်ဆဲဖြစ်ပြီး ချန်ပီယံဆုအတွက် မျှော်လင့်နိုင်စွမ်းရှိနေပါသေးတယ်။